ବୋରିଗୁମ୍ମା,୧୦ା୨: ଭୁବନେଶ୍ୱରରୁ ଗାଡ଼ି ଭଡ଼ାରେ ନେଇ ଚାଳକଙ୍କୁ ହତ୍ୟାକରି କାର୍ ନେଇ ଫେରାର ହୋଇଯାଇଥିବା ପ୍ରେମୀଯୁଗଳଙ୍କୁ ପୋଲିସ ଗିରଫ କରିଛି। କାର୍ ଭଡ଼ା ନେଇ କୋରାପୁଟ ଆସିଥିବା ପ୍ରେମୀ ଯୁଗଳ ହିଁ ସୁଧୀର ସାହୁ ହତ୍ୟାକାଣ୍ଡର ମୁଖ୍ୟ ଅଭିଯୁକ୍ତ ବୋଲି କୋରାପୁଟ ଏସ୍ପି ବରୁଣ ଗୁଣ୍ଟୁପାଲି ବୋରିଗୁମ୍ମା ଥାନାରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ବୁଧବାର ସୂଚନା ଦେଇଛନ୍ତି। ଗିରଫ ପରେ ପ୍ରେମୀଯୁଗଳଙ୍କୁ କୋର୍ଟ ଚାଲାଣ କରାଯାଇଛି।
ଏସ୍ପି ଗୁଣ୍ଟୁପାଲି କହିଛନ୍ତି, କୋରାପୁଟ ଜିଲାର ଗୁପ୍ତେଶ୍ୱର ଯିବାକୁ ପ୍ରେମୀ ଯୁଗଳ ଗତ ମାସ ୨୫ତାରିଖରେ କୋରାପୁଟରେ ପହଞ୍ଚତ୍ ଥିଲେ। ରାତି ୧୦ଟାରେ ସେମାନେ ଏକ ଢାବାରେ ପହଞ୍ଚିଥିଲେ । ସେଠାରେ ଗାଡ଼ି ଚାଳକ ସୁଧୀର ଓ ଅଭିଯୁକ୍ତ ପ୍ରେମୀଯୁଗଳ ମଦ୍ୟପାନ କରି ଖାଇ ଥିଲେ। ପରେ ସେମାନେ ଗୁପ୍ତେଶ୍ୱର ପରିବର୍ତ୍ତେ ବଲାଙ୍ଗୀର ଜିଲା ହରିଶଙ୍କର ଯିବାକୁ ବାହାରିଥିଲେ। କାର୍ ଚାଳକ ସୁଧୀର ଅତ୍ୟଧିକ ମଦ୍ୟପାନ କରିଥିବାରୁ ଅଭିଯୁକ୍ତ ହିଁ କାର୍ ଚଳାଇ ରାଣୀଗଡ଼ ରାସ୍ତାରେ ଆସୁଥିଲେ। ବୋରିଗୁମ୍ମା ଥାନା ଅନ୍ତର୍ଗତ ଛତ୍ରଲା ନିକଟରେ ଗାଡ଼ି ରଖି ୩ ଜଣ ଶୋଇ ପଡ଼ିଥିଲେ। ଏହି ସମୟରେ ସୁଧୀର ଅଭିଯୁକ୍ତଙ୍କ ପ୍ରେମିକାଙ୍କ ଦେହରେ ବାରମ୍ବାର ହାତ ମାରିଥିଲେ। ଏଥିରେ ଉତ୍କ୍ଷିପ୍ତ ହୋଇ ପ୍ରେମୀଯୁଗଳ ଗାମୁଛାରେ ସୁଧୀରଙ୍କ ବେକ ଚିପି ହତ୍ୟା କରିଥିଲେ। ହତ୍ୟାକାଣ୍ଡ ପରେ ଛତ୍ରଲା ନିକଟରେ ସୁଧୀରଙ୍କ ମୃତଦେହ ଫିଙ୍ଗି ବୋରିଗୁମ୍ମା ରାସ୍ତା ଦେଇ ଫେରାର ହୋଇଯାଇଥିଲେ। ରାଉରକେଲା ଅମରଭବନ ହୋଟେଲରେ ଥିବା ସୂଚନା ପାଇ ପୋଲିସ ସେଠାରୁ ପ୍ରେମୀଯୁଗଳଙ୍କୁ ଗିରଫ କରିଥିଲା। ପୋଲିସ ତାଙ୍କଠାରୁ କାର୍, ୩ଟି ମୋବାଇଲ ଫୋନ ଜବତ କରିଛି। ପ୍ରେମିକଙ୍କ ଘର ଯାଜପୁର ଟାଉନ ଥାନା ଅଞ୍ଚଳରେ ହୋଇଥିବା ବେଳେ ପ୍ରେମିକାଙ୍କ ଘର ବିଞ୍ଝାରପୁର ଅଞ୍ଚଳରେ ବୋଲି ଏସ୍ପି କହିଛନ୍ତି। ୩୫ ବର୍ଷୀୟ ପ୍ରେମିକ ଜଣକ ବିବାହିତ। ସେ ୨୦ ବର୍ଷୀୟା ପ୍ରେମିକାଙ୍କୁ ନେଇ ଭୁବନେଶ୍ୱର ନନ୍ଦନକାନନ ନିକଟସ୍ଥ ଏକ ଆପାର୍ଟମେଣ୍ଟରେ ଲିଭ୍ ଇନ୍ ରିଲେଶନରେ ରହି ଆସୁଥିଲେ।
