ନୂଆଦିଲ୍ଲୀ,୨୮।୨: କଥାରେ ଅଛି, ଦୁଃଖ ଯେତେବେଳେ ଆସେ ଭାଇ-ବନ୍ଧୁ-କୁଟୁମ୍ବ ଧରି ଆସେ। ବରୋଦା କ୍ରିକେଟର ବିଷ୍ଣୁ ସୋଲାଙ୍କିଙ୍କ କ୍ଷେତ୍ରରେ ଏହି ଉକ୍ତିର ଯଥାର୍ଥ ପ୍ରତିପାଦିତ ହୋଇଛି। ଝିଅ ପରେ ବାପାଙ୍କୁ ହରାଇଥିବା ବିଷ୍ଣୁ ସବୁ ଭୁଲି ଦଳ ପାଇଁ ମ୍ୟାଚ୍ ଖେଳୁଥିବା ଦେଖି ସମଗ୍ର ଦେଶ ତାଙ୍କୁ ସଲାମ୍ କରୁଛି। ସୋଲାଙ୍କି ଏବେ ଭୁବନେଶ୍ୱରରେ ରଣଜୀ ଟ୍ରଫି ଖେଳୁଛନ୍ତି ଏବଂ ଚଣ୍ଡିଗଡ଼ ବିପକ୍ଷରେ ଏକ ଶତକ ହାସଲ କରିଛନ୍ତି। ତାଙ୍କର ଏହି ଶତକ ଶତକ ଅତ୍ୟନ୍ତ ସ୍ବତନ୍ତ୍ର। ସେ ଝିଅର ଅନ୍ତିମ ସଂସ୍କାର କରିବା ପରେ ଏହି ଦ୍ରୁତ ଇନିଂସ ଖେଳିଥିଲେ। ଏହି ମ୍ୟାଚ ପୂର୍ବରୁ ତାଙ୍କର ନବଜାତ ଝିଅର ମୃତ୍ୟୁ ହୋଇଥିଲା। ତାଙ୍କର ଅନ୍ତିମ ସଂସ୍କାର କରିବା ପରେ ସେ ପଡ଼ିଆକୁ ଫେରି ଏକ ଶତକ ସ୍କୋର କରିଥିଲେ, କିନ୍ତୁ ଏହି ମ୍ୟାଚ ତାଙ୍କ ପାଇଁ ଏତେ ସହଜ ନ ଥିଲା।
ଏଲିଟ ଗ୍ରୁପ ବିରେ ଚଣ୍ଡିଗଡ଼ ବିପକ୍ଷ ମ୍ୟାଚର ଶେଷ ଦିନରେ ସେ ସକାଳେ ଆଉ ଏକ ଦୁଃସମ୍ବାଦ ପାଇଥିଲେ। ମ୍ୟାଚ୍ର ଶେଷ ଦିନରେ ବିଷ୍ଣୁ ତାଙ୍କ ପିତାଙ୍କ ଦେହାନ୍ତ ହୋଇଥିବା ଖବର ପାଇଥିଲେ। ଏହି କାରଣରୁ ସେ ଆହୁରି ଭାଙ୍ଗି ଯାଇଥିଲେ, କିନ୍ତୁ ଏହା ସତ୍ତ୍ୱେ ସେ ଦଳ ଛାଡି ନ ଥିଲେ। ତାଙ୍କୁ ଏହି ଖବର ଟିମ ମ୍ୟାନେଜର ଦେଇଥିଲେ। ବିଷ୍ଣୁ ଏକ ଭିଡିଓ କଲରେ ଡ୍ରେସିଂ ରୁମର ଏକ କୋଣରେ ବସି ପିତାଙ୍କ ଅନ୍ତିମ ସଂସ୍କାରକୁ ଦେଖିଥିଲେ। ରାଜ୍ୟ ୟୁନିଅନର ସଚିବ ଅଜିତ ଲେଲେ କହିଛନ୍ତି, ସୋଲାଙ୍କିଙ୍କୁ ଘରକୁ ଫେରିବା ପାଇଁ ବିକଳ୍ପ ଦିଆଯାଇଛି, କିନ୍ତୁ ସୋଲାଙ୍କି ଦଳ ସହିତ ରହିବାକୁ ନିଷ୍ପତ୍ତି ନେଇଛନ୍ତି। ସୋଲାଙ୍କିଙ୍କ ପିତା ଗତ ଦୁଇ ମାସ ଧରି ଅସୁସ୍ଥ ଥିଲେ ଏବଂ ହସ୍ପିଟାଲରେ ଥିଲେ।
