ଧାମନଗର,୨୬।୫(ଡି.ଏନ.ଏ): ଭଦ୍ରକ ଜିଲା ଧାମନଗର ବ୍ଲକ ଆନନ୍ଦପୁର ପଞ୍ଚାୟତ ଅନ୍ତର୍ଗତ ଚମ୍ପାବାଗ ଅଙ୍ଗନଓ୍ବାଡି କେନ୍ଦ୍ରରେ ଠିକାଦାର କାମସାରି ବିଲ୍ ନ ପାଇବାରୁ ତାଲା ପକାଇ ରଖିଥିବାରୁ ଅସନ୍ତୋଷ ପ୍ରକାଶ ପାଇଛି। ଏହି ଅଙ୍ଗନଓ୍ବାଡି କେନ୍ଦ୍ର ମରାମତି ପାଇଁ ବୁଲବୁଲ ସହାୟତାରେ ଦୁଇଲକ୍ଷ ଟଙ୍କା ଦିଆଯାଇଥିଲା। ସମ୍ପୃକ୍ତ ଠିକାଦାର ୨୦୨୧ ମାର୍ଚ୍ଚ ରେ ମରାମତି କାର୍ଯ୍ୟ ଶେଷ କରିଥିଲେ। ହେଲେ ଅଦ୍ୟାବଧି ସେ ବିଲ୍ ପାଇନାହାନ୍ତି। ଏଥିପାଇଁ ସେ ବାରମ୍ବାର ବ୍ଲକ କାର୍ଯ୍ୟାଳୟ ଦୌଡ଼ି ଦୌଡ଼ି ନିରାଶ ହୋଇଛନ୍ତି। ସୋମବାର କେନ୍ଦ୍ର ଚାଲୁଥିବା ସମୟରେ ଅଙ୍ଗନଓ୍ବାଡି କର୍ମୀ ଓ ସହାୟକଙ୍କୁ ପଦାକୁ ବାହାର କରି ସେ ତାଲା ପକାଇ ଦେଇଥିଲେ। ଏନେଇ ଅଙ୍ଗନଓ୍ବାଡି କର୍ମୀ ବିଭାଗକୁ ଅବଗତ କରାଇଥିଲେ। ପରେ ବିଭାଗୀୟ ଅଧିକାରୀ ସମ୍ପୃକ୍ତ ଠିକାଦାରଙ୍କ ସହିତ କଥା ହେବା ପରେ ମଙ୍ଗଳବାର ତାଲା ଖୋଲିଥିଲେ। ଏ ସମ୍ପର୍କରେ ଉକ୍ତ ପଞ୍ଚାୟତର କନିଷ୍ଠ ଯନ୍ତ୍ରୀ ଦେବେନ୍ଦ୍ର ନାୟକଙ୍କୁ ପଚାରିବାରୁ ଦୁଇ ଲକ୍ଷ ଟଙ୍କାର ମରାମତି କାର୍ଯ୍ୟ ହୋଇନାହିଁ। ଯେଉଁ କାର୍ଯ୍ୟ ହୋଇଛି ତାହା ନିମ୍ନମାନର ହୋଇଥିବାରୁ ବିଲ୍ କରାଯାଇନାହିଁ। ଯେତିକି କାର୍ଯ୍ୟ ହୋଇଛି ସେ ଅନୁପାତରେ ବିଲ୍ କରାଯିବ ବୋଲି ସେ ପ୍ରକାଶ କରିଛନ୍ତି।
