ଇସ୍ଲାମାବାଦ,୧୫।୬: ପାକିସ୍ତାନର ପୂର୍ବତନ ରାଷ୍ଟ୍ରପତି ପରଭେଜ ମୁଶରଫଙ୍କ ସ୍ବାସ୍ଥ୍ୟାବସ୍ଥା ବର୍ତ୍ତମାନ ଖରାପ୍ ରହିଛି। ଏହି ସମୟରେ ସେ ସୁସ୍ଥ ହେବା ବହୁତ କଷ୍ଟକର ବୋଲି କୁହାଯାଉଛି। ଗତ ୩ସପ୍ତାହ ଧରି ୭୮ବର୍ଷୀୟ ମୁଶରଫଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିବା ଜଣାପଡ଼ିଛି। ଇତିମଧ୍ୟରେ ପୂର୍ବତନ ପ୍ରଧାନମନ୍ତ୍ରୀ ତଥା ପାକିସ୍ତାନ ମୁସଲିମ୍ ଲିଗ୍(ପିଏମ୍ଏଲ୍-ଏନ୍) ସୁପ୍ରିମୋ ନଓ୍ବାଜ ଶରିଫ ପୂର୍ବତନ ରାଷ୍ଟ୍ରପତି ପରଭେଜ ମୁଶରଫଙ୍କୁ ପାକିସ୍ତାନ ଫେରାଇ ଆଣିବା ପାଇଁ ଶାହବାଜ ସରକାରଙ୍କୁ ଭେଟିଛନ୍ତି। ନଓ୍ବାଜ ଟୁଇଟ କରି କହିଛନ୍ତି ଯେ, ମୁଶରଫଙ୍କ ସହ ତାଙ୍କର କୌଣସି ବ୍ୟକ୍ତିଗତ ଶତ୍ରୁତା କିମ୍ବା ଝଗଡ଼ା ନାହିଁ। ମୋର ପରିବାରବର୍ଗ ଯେଉଁ କଷ୍ଟ ପାଇଛନ୍ତି ସେହି କଷ୍ଟ ଆଉ କେହି ଭୋଗ ନ କରନ୍ତୁ ବୋଲି ସେ ଚାହୁଁ ନାହାନ୍ତି। ତେଣୁ ମୁଶରଫଙ୍କ ସୁସ୍ବାସ୍ଥ୍ୟ ପାଇଁ ସେ ଭଗବାନଙ୍କ ନିକଟରେ ପ୍ରାର୍ଥନା କରିଛନ୍ତି। ଏଥିସହ ଯଦି ସେ ପାକିସ୍ତାନକୁ ଫେରିବାକୁ ଚାହୁଁଛନ୍ତି ତେବେ ସରକାର ସମସ୍ତ ସୁବିଧା ଯୋଗାଇଦିଅନ୍ତୁ ବୋଲି ନଓ୍ବାଜ ଶରିଫ କହିଛନ୍ତି। ଏନେଇ ସେ ମୁଶରଫଙ୍କ ପରିବାରଙ୍କୁ ମଧ୍ୟ ଭେଟିଥିଲେ। ପରିବାର ପକ୍ଷରୁ ପ୍ରତିକ୍ରିୟା ଆସିଲେ ସମସ୍ତ ବ୍ୟବସ୍ଥା କରାଯିବ ବୋଲି ନଓ୍ବାଜ ଶରିଫ କହିଛନ୍ତି।
