ନାଉଗାଁ,୨୫।୫(ସ୍ବ.ପ୍ର.): ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ବିଦ୍ୟାଳୟ ଓ ଗଣ ଶିକ୍ଷା ବିଭାଗ ଓ ସମନ୍ବିତ ଶିଶୁ ବିକାଶ ବିଭାଗ ପକ୍ଷରୁ ବିଦ୍ୟାଳୟ ଓ ଅଙ୍ଗନଓ୍ବାଡ଼ି କେନ୍ଦ୍ରଗୁଡ଼ିକର ସମୟ ପରିବର୍ତ୍ତନ କରାଯାଇଛି। ସକାଳ ୬ ରୁ ୯ ଟା ପର୍ଯ୍ୟନ୍ତ ବିଦ୍ୟାଳୟ ଓ ଅଙ୍ଗନଓ୍ବାର୍ଡି କେନ୍ଦ୍ର ଖୋଲା ରଖିବାକୁ ନିର୍ଦ୍ଦେଶ ଦିଆଯାଇଛି। କିନ୍ତୁ ନାଉଗାଁ ବ୍ଲକର ଡାବର ୟୁଜିଏମ୍ଇ ବିଦ୍ୟାଳୟ ଓ ଏହାର ପରିସରରେ ଥିବା ଅଙ୍ଗନଓ୍ବାଡି କେନ୍ଦ୍ରରେ ଏହି ନିୟମ ଉଲ୍ଲଂଘନ ହୋଇଛି। ଶିକ୍ଷକ ଓ ଅଙ୍ଗନଓ୍ବାଡି କର୍ମୀମାନେ ମନମୁଖି ଭାବେ ଆସୁଥିବାରୁ ପିଲାଙ୍କ ପାଠପଢ଼ା ବାଧାପ୍ରାପ୍ତ ହେଉଥିବା ନେଇ ସାଧାରଣରେ ଅଭିଯୋଗ ହୋଇଛି।
ଡାବର ୟୁଜିଏମ୍ଇ ବିଦ୍ୟାଳୟରେ ପ୍ରଥମରୁ ସପ୍ତମ ଶ୍ରେଣୀ ପର୍ଯ୍ୟନ୍ତ ୩୯ ଜଣ ପିଲା ପାଠ ପଢ଼ିଥାନ୍ତି। ଏହି ବିଦ୍ୟାଳୟରେ ପ୍ରଧାନ ଶିକ୍ଷୟିତ୍ରୀଙ୍କୁ ମିଶାଇ ମୋଟ୍ ୫ ଜଣ ଶିକ୍ଷକ ରହିଛନ୍ତି। ତେବେ ମଙ୍ଗଳବାର ସକାଳ ୭ ଟା ପର୍ଯ୍ୟନ୍ତ ବିଦ୍ୟାଳୟ ଶ୍ରେଣୀ ଗୃହ ନିକଟରେ ପିଲା ବୁଲୁଥିବାବେଳେ କୌଣସି ଶିକ୍ଷକଙ୍କ ଦେଖା ନ ଥିଲା। ୭ଟା ପରେ ବିଦ୍ୟାଳୟକୁ ପ୍ରଥମେ ପ୍ରଧାନ ଶିକ୍ଷୟିତ୍ରୀ ସୁଜ୍ୟୋତ୍ସ୍ନା ସାହାଣୀ ଆସିଥିଲେ। କିଛି ସମୟ ପରେ ଅନ୍ୟ ଶିକ୍ଷୟିତ୍ରୀ ଓ ଶିକ୍ଷକ ଆସିଥିଲେ। ଶିକ୍ଷକମାନେ ବିଦ୍ୟାଳୟକୁ ଡ୍ରେସ କୋର୍ଡ ପିନ୍ଧି ଆସିବାର ନିୟମ ରହିଛି। ମାତ୍ର ଜଣଙ୍କ ବ୍ୟତୀତ ଅନ୍ୟ କୌଣସି ଶିକ୍ଷକ ଏହା ପିନ୍ଧି ନ ଥିଲେ। କେବଳ ମଙ୍ଗଳବାର ନୁହେଁ ଅନ୍ୟ ଦିନ ଗୁଡ଼ିକରେ ମଧ୍ୟ ଶିକ୍ଷକଙ୍କ ମନମୁଖି କାରବାର ଦେଖିବାକୁ ମିଳଚି। ସୋମବାର ଉପସ୍ଥାନ ଖାତାକୁ ଦେଖିଲେ କେବଳ ପ୍ରଧାନ ଶିକ୍ଷୟିତ୍ରୀ ବିଦ୍ୟାଳୟକୁ ଆସିଥିବା ବେଳେ ଅନ୍ୟମାନେ ଅନୁପସ୍ଥିତ ଥିବା ଜଣାପଡିଛି। ଏକା ସଙ୍ଗରେ ୪ ଜଣ ଶିକ୍ଷକ କାହିଁକି ଅନୁପସ୍ଥିତ ଥିଲେ ସେ ବିଷୟରେ ପ୍ରଧାନ ଶିକ୍ଷୟତ୍ରୀ ସାହାଣୀଙ୍କୁ ପଚରାଯାଇଥିଲା। କିନ୍ତୁ ସେ କୌଣସି ଉତ୍ତର ଦେଇ ନ ଥିଲେ। ଏବିଷୟରେ ବିଇଓ ମନୋରମା ରାଉତଙ୍କୁ ଯୋଗାଯୋଗ କରାଯାଇ ଥିଲେ ମଧ୍ୟ ସେ ଫୋନ ଉଠାଇ ନ ଥିଲେ। ଏ ସମ୍ପର୍କରେ ଅତିରିକ୍ତ ବିଇଓ ଅକ୍ଷୟ ବେହେରା କହିଛନ୍ତି, ଏ ପ୍ରସଙ୍ଗରେ ଉକ୍ତ ବିଦ୍ୟାଳୟକୁ ଯାଇ ତଦନ୍ତ କରିବା ପରେ କାର୍ଯ୍ୟାନୁଷ୍ଠାନ ନିଆଯିବ।
ସେହିପରି ବିଦ୍ୟାଳୟ ପରିସରରେ ଡାବର-୧ ଅଙ୍ଗନଓ୍ବାଡ଼ି କେନ୍ଦ୍ର ରହିଛି। ଏହି କେନ୍ଦ୍ରରେ ଅଙ୍ଗନଓ୍ବାର୍ଡି କର୍ମୀ ଭାବେ ରୁନି ବାଳାଦେବୀ କାର୍ଯ୍ୟ କରନ୍ତି। ତାଙ୍କ ସହ ଜଣେ ସହାୟିକା ମଧ୍ୟ ରହିଛନ୍ତି। ମଙ୍ଗଳବାର ଏହି ଅଙ୍ଗନଓ୍ବାଡି କେନ୍ଦ୍ରରେ ତାଲା ଝୁଲୁଥିବାର ଦେଖିବାକୁ ମିଳିଛି।
ଏହି ଅଙ୍ଗନଓ୍ବାଡି କେନ୍ଦ୍ରର ସୁଫରଭାଇଜର ଭାବେ ମଞ୍ଜୁଲତା ବିଶ୍ୱାଳ ରହିଛନ୍ତି। ମାତ୍ର ସେ ଏହି କେନ୍ଦ୍ରକୁ ଠିକ୍ ଭାବେ ପରିଚାଳନା କରୁ ନ ଥିବାରୁ ଅଙ୍ଗନଓ୍ବାଡି କର୍ମୀ ମନଇଚ୍ଛା କେନ୍ଦ୍ରକୁ ଆସୁଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ଏବିଷୟରେ ସୁପରଭାଇଜର ବିଶ୍ୱାଳ କହିଛନ୍ତି ନିକଟରେ ଥିବା ଡାବର-୨ ଅଙ୍ଗନଓ୍ବାଡି କେନ୍ଦ୍ରରେ ଓଜନ ଉତ୍ସବ ପାଳନ କରାଯାଉଥିଲା। ସେଠାକାର କର୍ମୀଙ୍କୁ ସାହାଯ୍ୟ କରିବା ପାଇଁ ଡାବର-୧ରୁ ଅଙ୍ଗନଓ୍ବାଡି କର୍ମୀ ଯାଇଥିଲେ। କିନ୍ତୁ ଡାବର-୨ କେନ୍ଦ୍ରରେ ଏହି ସମୟରେ କର୍ମୀ ସଂଯୁକ୍ତା ସ୍ବାଇଁ ଓ ଗୋଟିଏ ପିଲା ବ୍ୟତୀତ ଆଉ କେହି ଉପସ୍ଥିତ ନ ଥିବା ଜଣାପଡ଼ିଛି। ଏ ବିଷୟରେ ସିଡିପିଓ କାଞ୍ଚନବାଳା ମହାନ୍ତି କହିଛନ୍ତି, ଅଙ୍ଗନଓାର୍ଡୀ କର୍ମୀ ଓଜନ ଉତ୍ସବକୁ ଯାଇଥିଲେ ଓ ସହାୟିକା ପିଲାଙ୍କୁ ଡାକିବା ପାଇଁ ଗାଁ କୁ ଯାଇଥିବାରୁ କେଦ୍ର ଖୋଲା ଯାଇ ପାରି ନ ଥିଲା।
