ପୁରୀ ଅଫିସ,୫ା୮: ଚଳିତବର୍ଷ ତିନିରଥ ଭଙ୍ଗା ନ ଯାଇ ମହାପ୍ରଭୁଙ୍କ ପ୍ରମୋଦ ଉଦ୍ୟାନ ଜଗନ୍ନାଥ ବଲ୍ଲଭ ମଠରେ ସଂରକ୍ଷଣ କରି ରଖାଯିବ। ଶ୍ରୀମନ୍ଦିର ପ୍ରଶାସନର ଏହି ନିଷ୍ପତ୍ତି ପରେ ରଥ ଖୋଲା କାମ ଜାରିରହିଛି। ମାତ୍ର ଏଥିରେ ଅସହଯୋଗ ଚେତାବନୀ ଦେଇଛନ୍ତି ମହାରଣା ସେବକ। ସେମାନଙ୍କର କିଛି ପ୍ରାପ୍ୟ ଏପର୍ଯ୍ୟନ୍ତ ମିଳିନାହିଁ। ତେଣୁ ଏ ନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଲିଖିତ ଭାବେ ଜଣାଇଛନ୍ତି। ପ୍ରାପ୍ୟ ନ ମିଳିଲେ ଆଗକୁ ରଥ ଖୋଲିବେନି ବୋଲି ସେମାନେ କହିଛନ୍ତି। ଫଳରେ ରଥଖୋଲାକୁ ନେଇ ବିବାଦ ଉପୁଜିଛି। ଅନ୍ୟପକ୍ଷରେ ମଙ୍ଗଳବାର ସୁଦ୍ଧା ଦେବୀ ସୁଭଦ୍ରାଙ୍କ ଦର୍ପଦଳନ ରଥ ଖୋଲା କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚତ୍ଛି। ଏଥିରୁ ବାହାରିଥିବା କାଠ ଗୁଣ୍ଡିଚା ମନ୍ଦିର ପରସରରେ ରଖାଯାଇଛି। ମୁଖ୍ୟ ପ୍ରଶାସକଙ୍କୁ ପ୍ରଦତ୍ତ ସ୍ମାରକପତ୍ରରେ ଦର୍ଶାଯାଇଛି ଯେ, ଏଥର ତିନିରଥ ସଂରକ୍ଷଣ ନିଷ୍ପତ୍ତିରେ ସେମାନେ ସହଯୋଗ କରିଆସୁଛନ୍ତି। ମାତ୍ର ପ୍ରଶାସନଠାରୁ ସେମାନଙ୍କର କେତେକ ପ୍ରାପ୍ୟ ପାଉଣା ଆଜି ପର୍ଯ୍ୟନ୍ତ ମିଳିନାହିଁ। ଚଳିତବର୍ଷ ଯେଉଁ କାଠ କରତ କଳରେ ଚିରଟ ହେଲା ସେ ବାବଦରେ ଅର୍ଥାତ୍ ଗୋଟିଏ କାଠ ପିଛା ୨ ହଜାର ଟଙ୍କା ପାଇବେ ବୋଲି ଜଣାଇଥିଲେ। ପ୍ରତିବର୍ଷ ରଥ ଭଙ୍ଗା ଗଲେ ମହାରଣା ସେବକମାନେ ଦୁଆରବେଢା ନେଇଥାନ୍ତି। ତିନି ରଥରୁ ୧୨ଟି ଦୁଆର ବେଢା ବାହାରିଥାଏ। ଯେହେତୁ ଏଥର ସଂରକ୍ଷଣ କରାଯିବ ତେଣୁ ପ୍ରତି ଦୁଆରବେଢା ବାବଦ ୫୦ ହଜାର ଟଙ୍କା ଲେଖାଏ ମୋଟ ୬ଲକ୍ଷ ଟଙ୍କା ପାଇବେ। ପ୍ରଶାସନ ନିର୍ଦ୍ଦେଶ ଅନୁସାରେ ସେମାନେ ସବୁ କାମ କରୁଛନ୍ତି। ମାତ୍ର ରଥ କାମ ସରିଗଲା ପରେ ସେମାନଙ୍କ କଥା ବିଚାର କରାଯାଉ ନାହିଁ। ନନ୍ଦିଘୋଷ ରଥର ମୁଖ୍ୟ ମହାରଣା ସେବକ ବିଜୟ କୁମାର ମହାପାତ୍ର କହିଛନ୍ତି, ରଥ ନିର୍ମାଣ ଅନୁକୂଳ ହେବାର ୧୨ ଦିନ ପରେ କାମ ଆରମ୍ଭ ହେଲା। ଏହି ୧୨ ଦିନର ମଜୁରି ବି ଏଯାଏ ମିଳିନାହିଁ। ଏମିତି ଅନ୍ୟ କେତେକ ପ୍ରାପ୍ୟ ପାଉଣା ସେମାନଙ୍କର ରହିଛି। ଯଥାଶୀଘ୍ର ସେମାନଙ୍କର ପ୍ରାପ୍ୟ ପ୍ରଦାନ କରାଯାଉ ବୋଲି ମହାରଣା ସେବକମାନେ ମୁଖ୍ୟ ପ୍ରଶାସକଙ୍କୁ ଜଣାଇଛନ୍ତି। ଏ ନେଇ ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ ଜେନା କହିଛନ୍ତି, ମହାରଣା ସେବକମାନେ ଯଦି କହୁଛନ୍ତି ତେବେ ଦୁଆରବେଢା ନିଅନ୍ତୁ। ନୂତନ ଭାବେ ଏହା ତିଆରି କରାଯିବ।
