ନୂଆଦିଲ୍ଲୀ,୫।୮: ଆଦିତ୍ୟ ପୁରୀଙ୍କ ପରେ ପ୍ରମୁଖ ଘରୋଇ କ୍ଷେତ୍ର ବ୍ୟାଙ୍କ ଏଚ୍ଡିଏଫ୍ସି ବ୍ୟାଙ୍କର ନୂଆ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ (ସିଇଓ)ପଦବୀରେ କିଏ ନିଯୁକ୍ତ ହେବେ ସେ ନେଇ ବେଶ୍ ଚର୍ଚ୍ଚା ଲାଗି ରହିଥିଲା। ମଙ୍ଗଳବାର ସମସ୍ତ କଳ୍ପନାଜଳ୍ପନାରୁ ପରଦା ହଟିଛି। ଏହି ପଦବୀରେ ନିଯୁକ୍ତି ଲାଗି ଶଶୀଧର ଜଗଦ୍ଦୀଶନଙ୍କ ନାମ ସାମ୍ନାକୁ ଆସିଥିବା ଜଣାପଡିଛି। ବର୍ତ୍ତମାନ ସିଇଓ ଥିବା ଆଦିତ୍ୟ ପୁରୀଙ୍କ ପରେ ଜଗଦ୍ଦୀଶନ ବ୍ୟାଙ୍କର ମଙ୍ଗ ସମ୍ଭାଳିବାକୁ ଯାଉଛନ୍ତି। ପୁରୀ ଅକ୍ଟୋବରରେ ଅବସର ନେବେ। ୫୫ ବର୍ଷୀୟ ଜଗଦ୍ଦୀଶନ ବର୍ତ୍ତମାନ ବ୍ୟାଙ୍କର ଗ୍ରୁପ୍ ହେଡ୍ ଭାବେ କାର୍ଯ୍ୟ କରୁଥିବା ବେଳେ ଆଦିତ୍ୟ ପୁରୀଙ୍କ ପରେ ବ୍ୟାଙ୍କର ଉତ୍ତରାଧିକାରୀ ହେବେ ବୋଲି ଜଣାପଡିଛି। ଏଚ୍ଡିଏଫ୍ସି ବ୍ୟାଙ୍କର ନୂଆ ସିଇଓ ପଦବୀ ଦୌଡ଼ରେ ୩ ବ୍ୟକ୍ତି ରହିଥିଲେ। ଜଗଦ୍ଦୀଶନଙ୍କ ନାମକୁ ରିଜର୍ଭ ବ୍ୟାଙ୍କ ମଙ୍ଗଳବାର ମଞ୍ଜୁରୀ ପ୍ରଦାନ କରିଥିବା ଜଣାପଡ଼ିଛି। ତାଙ୍କ ନାମକୁ ସୋମବାର ମଧ୍ୟରାତ୍ରିରେ ମଞ୍ଜୁରୀ ମିଳିଥିବା ବେଳେ ଶୀଘ୍ର ବ୍ୟାଙ୍କ ପକ୍ଷରୁ ଏ ସଂକ୍ରାନ୍ତରେ ଔପଚାରିକ ଘୋଷଣା କରାଯିବ।
୧୯୯୬ରେ ସେ ଏଚ୍ଡିଏଫ୍ସି ବ୍ୟାଙ୍କରେ ଯୋଗଦେବା ପରେ ଫାଇନାନ୍ସ, ମାନବ ସମ୍ବଳ ଭଳି ବିଭିନ୍ନ ବିଭାଗର ମୁଖ୍ୟ ଭାବେ କାର୍ଯ୍ୟ କରିଛନ୍ତି। ସେ ଚାର୍ଟାର୍ଡ ଆକାଉଣ୍ଟ ଏବଂ ଅର୍ଥନୀତିରେ ମାଷ୍ଟର ଡିଗ୍ରୀ ହାସଲ କରିଛନ୍ତି। ସିଇଓ ପଦବୀ ଲାଗି ଏଚ୍ଡିଏଫ୍ସିର ହୋଲ୍ସେଲ ବ୍ୟାଙ୍କିଙ୍ଗ୍ ଡିଭିଜନ ମୁଖ୍ୟ ଜୈଜାଦ ଭରୁଚା, ସିଟି ବ୍ୟାଙ୍କର ସୁନୀଲ ଗର୍ଗଙ୍କ ସମେତ ଅନ୍ୟମାନେ ଦାବିଦାର ରହିଥିଲେ। ବର୍ତ୍ତମାନ ଏଚ୍ଡିଏଫ୍ସିରେ ସିଇଓ ଥିବା ପୁରୀ ୧୯୯୪ ସେପ୍ଟେମ୍ବରରୁ ବ୍ୟାଙ୍କରେ କାମ କରି ଆସୁଛନ୍ତି। କୌଣସି ବ୍ୟାଙ୍କରେ ଦୀର୍ଘ ସମୟ ମୁଖ୍ୟ ଭାବେ କାର୍ଯ୍ୟ କରିଥିବା ବ୍ୟକ୍ତି ଭାବେ ସେ ବିବେଚିତ ହୋଇଛନ୍ତି। ତାଙ୍କ ପରେ ବ୍ୟାଙ୍କର ମଙ୍ଗ କିଏ ଧରିବ ସେ ନେଇ ନିବେଶକମାନେ ଆଶଙ୍କା ପ୍ରକଟ କରିଥିଲେ। ତାଙ୍କ ଉତ୍ତରାଧିକାରୀ ଚୟନ ବେଳେ ବିଭିନ୍ନ ଗୁରୁତ୍ୱପର୍ଣ୍ଣ ଦିଗ ଉପରେ ଧ୍ୟାନ ରଖାଯିବ ବୋଲି ସେ ନିବେଶକଙ୍କୁ ବ୍ୟାଙ୍କର ବାର୍ଷିକ ସାଧାରଣ ବୈଠକରେ ଭରସା ଦେଇଥିଲେ। ଯିଏବି ବ୍ୟାଙ୍କର ପରବର୍ତ୍ତୀ ମୁଖ୍ୟ ହେବେ ତାଙ୍କ ନିକଟରେ ଭଲ ଅଭିଜ୍ଞତା ରହିଛି ବୋଲି ପୁରୀ କହିଥିଲେ।
