ପୁରୀ ଅଫିସ, ୭।୧୦: ଶ୍ରୀମନ୍ଦିର ସଂଲଗ୍ନ ନୋ ପାର୍କିଂ ଜୋନ୍ରେ ବୁଧବାର ନିୟମ ଉଲ୍ଲଂଘନ କରି ଚାନ୍ଦବାଲି ବିଧାୟକ ତଥା ବିଜେଡି ନେତା ବ୍ୟୋମକେଶ ରାୟ ୨ହଜାର ଟଙ୍କା ଜରିମାନା ଦେଇଛନ୍ତି। ସେହିପରି ସେ କଟକଣା ଭାଙ୍ଗି ସସ୍ତ୍ରୀକ ଶ୍ରୀମନ୍ଦିର ଯାଇ ମହାପ୍ରଭଙ୍କୁ ଦର୍ଶନ କରିଥିବା ଅଭିଯୋଗ ହୋଇଛି। ଏହି ଘଟଣା ଏବେ ସାଧାରଣରେ ଚର୍ଚ୍ଚାର ବିଷୟ ପାଲଟିଛି।
ସୂଚନା ଅନୁଯାୟୀ, ଶ୍ରୀମନ୍ଦିର ଐତିହ୍ୟ କରିଡର ପରିସରରେ ଅର୍ଥାତ୍ ଶ୍ରୀମନ୍ଦିର ଚାରିପାଖରେ ଯାନବାହନ ରଖିବା ଉପରେ ଜିଲା ପ୍ରଶାସନ ପକ୍ଷରୁ କଟକଣା ଜାରି କରାଯିବା ସହ ନୋ ପାର୍କିଂ ଜୋନ୍ ଘୋଷଣା କରାଯାଇଛି। ସେହିଭଳି ମରିଚିକୋଟଠାରୁ ତିନିଚକିଆ ଓ ଚାରିଚକିଆ ଗାଡ଼ିକୁ ଶ୍ରୀମନ୍ଦିର ଆଡ଼କୁ ଛଡ଼ାଯାଉନାହିଁ। ଏହି କଟକଣା ଭାଙ୍ଗିଲେ ଜରିମାନା ଦେବାକୁ ପଡୁଛି। ବୁଧବାର ବିଧାୟକ ରାୟ ଏହି କଟକଣାକୁ ଉଲ୍ଲଂଘନ କରିଛନ୍ତି। ଅପରାହ୍ନ ପ୍ରାୟ ୨ଟାରେ ସେ ଏକ କାର୍ (ନଂ. ଓଡି ୨୨ ଏନ୍ ୦୦୦୧)ରେ ପୁରୀ ଆସିଥିଲେ। କାର୍ଟି ସିଂହଦ୍ୱାର ନିକଟ ଏମାର ମଙ୍ଗୁ ମଠ ପାଖରେ ରହିଥିଲା। ତେବେ ସେଠାରେ କାର୍ଯ୍ୟରତ ପୋଲିସ କର୍ମଚାରୀମାନେ ତାଙ୍କୁ ଅଟକାଇ ନ ଥିଲେ। ସେଠାରେ ଗାଡ଼ି ରହିବା ନେଇ ବିଭିନ୍ନ ସାମାଜିକ ଗଣମାଧ୍ୟମରେ ପ୍ରତିକ୍ରୟା ପ୍ରକାଶ ପାଇଥିଲା। ପୋଲିସ ପ୍ରଶାସନକୁ ଲୋକେ ସମାଲୋଚନା କରିବା ସହ କାର୍ଯ୍ୟାନୁଷ୍ଠାନ ଦାବି କରିଥିଲେ। ଏହାପରେ ପୋଲିସ ପ୍ରଶାସନର ଚେତା ପଶିଥିଲା। ରାତି ୮ଟା ୪୫ରେ ଘଟଣାସ୍ଥଳରେ ଟ୍ରାଫିକ ଥାନା ଏସ୍ଆଇ ଦିଲୀପ୍ କୁମାର ବେହେରା ପହଞ୍ଚତ୍ ଗାଡ଼ି ରଖିବାକୁ ବାରଣ କରିବା ସହ ଆଇନ ଉଲ୍ଲଂଘନ ଅଭିଯୋଗରେ ୨ହଜାର ଟଙ୍କା ଜରିମାନା କାଟିଥିଲେ। ବିଧାୟକ ରାୟ ଏହି ଜରିମାନା ଅର୍ଥ ଦେଇଥିବା ପୁରୀ ସିଟି ଡିଏସ୍ପି ଜନାର୍ଦ୍ଦନ ପାଢୀ କହିଛନ୍ତି। ସେହିପରି ମହାଳୟାରେ ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହିଥିବାବେଳେ ବିଧାୟକ ରାୟ ଓ ତାଙ୍କ ସହଧର୍ମିଣୀ ଶ୍ରୀମନ୍ଦିର ଯାଇ ମହାପ୍ରଭୁଙ୍କ ଦର୍ଶନ କରିଥିବା ଅଭିଯୋଗ ହୋଇଛି। ସାମାଜିକ କର୍ମୀ ତଥା କଂଗ୍ରେସ ଯୁବ ନେତା ସ୍ବାଧୀନ ପଣ୍ଡା ଏ ନେଇ ଅଭିଯୋଗ କରିଛନ୍ତି। ଯେଉଁଠାରେ ଭକ୍ତଙ୍କୁ ଶ୍ରୀମନ୍ଦିର ପରିସରକୁ ଛଡ଼ାଯାଉନାହିଁ, ସେଠାରେ ବିଧାୟକ ଓ ତାଙ୍କ ସହଧର୍ମିଣୀ କିପରି ଶ୍ରୀମନ୍ଦିର ଗଲେ ବୋଲି ସେ ପ୍ରଶ୍ନ କରିଛନ୍ତି। କେଉଁ ଅଧିକାରୀ ତାଙ୍କୁ ଅନୁମତି ଦେଲେ ଓ ଏ ନେଇ ସହଯୋଗ କଲେ ସେମାନଙ୍କୁ ଚିହ୍ନଟ କରାଯାଇ କାର୍ଯ୍ୟାନୁଷ୍ଠାନ ହେଉ ବୋଲି ପଣ୍ଡା ଦାବି କରିଛନ୍ତି। ସିସିଟିଭି ଫୁଟେଜ ଅନୁଧ୍ୟାନ କଲେ ସତ୍ୟ ଲୋକଲୋଚନକୁ ଆସିବ ବୋଲି ସେ କହିଛନ୍ତି। ଅପରପକ୍ଷେ ଏ ନେଇ ବିଧାୟକ ରାୟଙ୍କ ମତାମତ ମିଳିପାରିନାହିଁ।
