କଟକ ଅଫିସ,୨୧ା୨:ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ହତ୍ୟା ମାମଲାରେ ଅଭିଯୁକ୍ତ ଗୋପାଳ ଦାସ ଓ ତାଙ୍କ ପରିବାରକୁ ସୁରକ୍ଷା ଯୋଗାଇଦେବା ନେଇ ସୋମବାର ହାଇକୋର୍ଟରେ ଏକ ମାମଲା ରୁଜୁ ହୋଇଛି। ମାମଲାକୁ ଶୁଣାଣି ପାଇଁ ଗ୍ରହଣ କରାଯାଇଥିବା ଆବେଦନକାରୀ ଆଇନଜୀବୀ ସୁମନ୍ତ କୁମାର ସ୍ବାଇଁ ସୂଚନା ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ଗତ ୨୯ା୧ା୨୦୨୩ରେ ତତ୍କାଳୀନ ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସଙ୍କ ହତ୍ୟା ମାମଲାରେ କାର୍ଯ୍ୟରତ ପୋଲିସ ଏଏସ୍ଆଇ ଗୋପାଳ ଦାସଙ୍କୁ ଅଭିଯୁକ୍ତ ଭାବେ ଦର୍ଶାଯାଇ ପୋଲିସ ଗିରଫ କରିଥିଲା। ମାମଲାର ତଦନ୍ତ ସହ ସତ୍ୟ ଉନ୍ମୋଚନ ପାଇଁ କ୍ରାଇମବ୍ରାଞ୍ଚ ଗୋପାଳଙ୍କୁ ବିଭିନ୍ନ ଜାଗାକୁ ନେବା ସହ ନାନା ପରୀକ୍ଷା କରାଇଛି। ହେଲେ ଏଯାଏ ସର୍ବସମ୍ମୁଖକୁ ସତ୍ୟ ଆସିପାରିନାହିଁ। ପୂର୍ବତନ ମନ୍ତ୍ରୀ ଦାସ ତାଙ୍କର କାର୍ଯ୍ୟକଳାପ ପାଇଁ ଲୋକପ୍ରିୟ ଥିଲେ। ସ୍ପଷ୍ଟ ଦିବାଲୋକରେ ତାଙ୍କର ହତ୍ୟା ସମଗ୍ର ରାଜ୍ୟ ପାଇଁ ଏକ ଗୁରୁତର ପ୍ରସଙ୍ଗ। ଗୋପାଳ ନିଜ ପୋଲିସ ଚାକିରି କାଳରେ ବହୁ ପୁରସ୍କାର ପାଇଛନ୍ତି। ସେ ନିଜ କାର୍ଯ୍ୟରେ ବହୁ ତତ୍ପର ଥିବାବେଳେ ତାଙ୍କ ବିରୋଧରେ କୌଣସି ଫୌଜଦାରି କାର୍ଯ୍ୟକଳାପ ନ ଥିଲା। ପୂର୍ବତନ ମନ୍ତ୍ରୀ ଦାସଙ୍କ ସହିତ ତାଙ୍କର ବି କୌଣସି ରାଜନୈତିକ ସମ୍ପର୍କ ବା ପ୍ରତିଦ୍ୱନ୍ଦ୍ୱିତା ନ ଥିଲା। ଏବେ ଗୋପାଳଙ୍କୁ ତଦନ୍ତକାରୀ ସଂସ୍ଥା ଓ କେତେକ ରାଜନୈତିକ ଦଳ ନିନ୍ଦିତ କରୁଛନ୍ତି। ପ୍ରତି ମୁହୂର୍ତ୍ତରେ ତାଙ୍କ ଜୀବନ ବିପଦରେ ରହିଛି। ସେହିପରି ତାଙ୍କ ପରିବାର ସଦସ୍ୟମାନେ ମଧ୍ୟ ଭୟାତୁର ଜୀବନ ବିତାଉଛନ୍ତି। ଗୋପାଳ ଜଣେ ପୋଲିସ ଅଧିକାରୀ ହୋଇଥିବାବେଳେ ପୂର୍ବତନ ମନ୍ତ୍ରୀ ନବ ଦାସଙ୍କ ହତ୍ୟା ମାମଲାରେ ସେ ସମ୍ପୃକ୍ତ ଥିବା ସନ୍ଦେହ ସୃଷ୍ଟି କରୁଛି। ରାଜନୈତିକ ବ୍ୟକ୍ତିମାନେ ସମାଜରେ ସୁରକ୍ଷିତ ନ ଥିବା ବେଳେ ସାଧାରଣ ଲୋକେ ନିଜକୁ କେବେ ସୁରକ୍ଷିତ ମନେ କରୁନାହାନ୍ତି। ଗୋପାଳ ଯଦିଓ ୨୪ଘଣ୍ଟିଆ ସିସିଟିଭି କ୍ୟାମେରା ନଜରରେ ରହୁଛନ୍ତି, ତଥାପି ତାଙ୍କର ତଥା ତାଙ୍କ ପରିବାରକୁ ଉପଯୁକ୍ତ ସୁରକ୍ଷା ପ୍ରଦାନ କରିବା ନିମନ୍ତେ ଆବେଦନରେ ଦର୍ଶାଯାଇଛି। ଏଥିରେ ପୋଲିସ ଡିଜି, ଚୌଦ୍ୱାର ଜେଲ ଅଧୀକ୍ଷକ, ଜେଲ ବିଭାଗ ଆଇଜି ଏବଂ ଆଇଟି ସେଲ୍ ଡିଜିଙ୍କୁ ପକ୍ଷଭୁକ୍ତ କରାଯାଇଛି।
