ଟେନସା,୨୬ା୮(ଡି.ଏନ.ଏ.):ଯେଉଁଠି ଶିକ୍ଷା ଅଧିକାରୀଙ୍କ ମୁଖ୍ୟ କାର୍ଯ୍ୟାଳୟ ଭୂତ କୋଠି ପରି ଦିଶୁଛି । କାନ୍ଥଗୁଡିକ ଫାଟି ଗଲାଣି, ଛାତରୁ ପାଣି ଗଳୁଛି। ବସିବା ପାଇଁ ଜାଗା ନାହିଁ ସେହି ବ୍ଲକରେ ବିଦ୍ୟାଳୟଗୁଡିକ କେମିତି ଥିବ ତାହା ନ ଦେଖିଲେ କେହି ବିଶ୍ୱାସ କରିବେ ନାହିଁ। ଆଦିବାସୀ ଅଧ୍ୟୁଷିତ ଅଞ୍ଚଳରେ ଶିକ୍ଷାର ବିକାଶ ପାଇଁ ରାଜ୍ୟ ସରକାର ବିପୁଳ ଅର୍ଥ ବ୍ୟୟ କରୁଥିବା ବେଳେ ସୁନ୍ଦରଗଡ଼ ଜିଲା କୋଇଡା ବ୍ଲକରେ ଏହାର କୌଣସି ସୁଫଳ ଦେଖିବାକୁ ମିଳୁନାହିଁ। ଏହି ବ୍ଲକର ଅଧିକାଂଶ ବିଦ୍ୟାଳୟରେ ଘର ନ ଥିବା ବେଳେ ଖରା, ବର୍ଷାରେ ଛାତ୍ରୀଛାତ୍ର ତଳେ ବସି ପାଠ ପଢୁଛନ୍ତି ବୋଲି ବିଭିନ୍ନ ଗଣ ମାଧ୍ୟମରେ ଖବରପ୍ରକାଶ ପାଉଛି। ସେଠାରେ ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ କଥା ପଚାରେ କିଏ। ବିଦ୍ୟାଳୟର ଉନ୍ନତି ପାଇଁ ଜିଲା ଖଣିଜ ପାଣ୍ଠିରୁ ଟଙ୍କା ଖର୍ଚ୍ଚ ହେଉଛି। ହେଲେ କୋଇଡା ବ୍ଲକ ଶିକ୍ଷା ଅଧିକାରୀ କାର୍ଯ୍ୟାଳୟ ଜରାଜୀର୍ଣ୍ଣ ହୋଇ ପଡିଥିଲେ ହେଁ ଏଥିପ୍ରତି କାହାରି ନଜର ନାହିଁ। ଅବହେଳିତ ଭାବେ ପଡିରହିଥିବା କୋଇଡା ବ୍ଲକ ରିସର୍ଚ୍ଚ ସେଣ୍ଟରକୁ ସଫା କରାଯାଇ ୨୦୧୪ ମସିହାରେ କୋଇଡା ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ କରାଗଲା। ଏହାର ରକ୍ଷଣାବେକ୍ଷଣ ପ୍ରତି ଦୃଷ୍ଟି ଦିଆ ନ ଯିବାରୁ କାର୍ଯ୍ୟାଳୟ ଛାତ ଓ କାନ୍ଥରୁ ବର୍ଷା ହେଲେ ପାଣି ଗଳୁଛି। ବର୍ଷା ପାଣି ପଡି ଅଫିସର କମ୍ପ୍ୟୁଟରଗୁଡିକ ଅଚଳ ହୋଇ ପଡିରହିଛି। ଫାଇଲପତ୍ର ନଷ୍ଟ ହୋଇଗଲାଣି। କାର୍ଯ୍ୟାଳୟରେ ତିନି ଜଣ ଅତିରିକ୍ତ ବ୍ଲକ ଶିକ୍ଷା ଅଧିକାରୀ, ଜଣେ ବ୍ଲକ ଶିକ୍ଷା ଅଧିକାରୀ ରହିବା କଥା। ହେଲେ ତିନି ବର୍ଷ ହେଲା ଅତିରିକ୍ତ ବ୍ଲକ ଶିକ୍ଷା ଅଧିକାରୀ ନାହାନ୍ତି। ଦୁଇ ବର୍ଷ ହେଲା ବ୍ଲକ ଶିକ୍ଷା ଅଧିକାରୀ ନ ଥିଲେ ା ଗତ ଜାନୁୟାରୀରେ ବ୍ଲକ ଶିକ୍ଷା ଅଧିକାରୀ ଯୋଗ ଦେଇଥିଲେ ମଧ୍ୟ ଚଳିତ ମାସରେ ସେ ଅବସର ଗ୍ରହଣ କରିବେ । ବ୍ଲକ ଶିକ୍ଷା ଅଧିକାରୀଙ୍କ କାର୍ଯ୍ୟାଳୟ କଥା ବୁଝିବାକୁ କେହି ନାହାନ୍ତି। କାର୍ଯ୍ୟଳୟ କୋଠା ଉପରେ ଗଛ ଲତା ଉଠିଥିବା ବେଳେ ପରିସର ଅଳିଆ ଆବର୍ଜନାରେ ଭରି ରହିଛି। ଏହାକୁ ସଫା ସୁତୁରା କରାଯାଉ ନାହିଁ। କୋଠା ମରାମତି କରାଯାଉ ନାହିଁ। ଚୂନ ମରାଯାଉ ନାହିଁ। ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେଇ ବିହିତ ପଦକ୍ଷେପ ନେବା କୁ ଦାବି ହେଉଛି ା
