ଭୁବନେଶ୍ୱର, ୨।୧(ବ୍ୟୁରୋ):ସାପ କାମୁଡ଼ିଲେ ମଣିଷ ପାଇଁ ଯେତିକି ଗୁରୁତ୍ୱ ପ୍ରଦାନ କରାଯାଏ, ପ୍ରାଣୀଙ୍କ କ୍ଷେତ୍ରରେ ତାହା ଦେଖାଯାଏ ନାହିଁ। ବନ୍ୟପ୍ରାଣୀ ହେଉ କି ଗୃହପାଳିତ, ସାପ କାମୁଡ଼ିଲେ ଭଗବାନ୍ ଭରସା। ମଣିଷକୁ ସାପ କାମୁଡ଼ିଲେ ଯେଉଁ ଆଣ୍ଟିଭେନମ ଦିଆଯାଏ, ପ୍ରାଣୀଙ୍କୁ ମଧ୍ୟ ସେହି ଆଣ୍ଟିଭେନମ ଦିଆଯାଏ। କିନ୍ତୁ ଆଣ୍ଟିଭେନମ ଅଭାବ ଯୋଗୁ ବହୁ ପ୍ରାଣୀ ମୃତ୍ୟୁମୁଖରେ ପଡ଼ୁଛନ୍ତି। ରବିବାର ଓୟୁଏଟି ଭେଟେରିନାରି କଲେଜସ୍ଥିତ ସେଣ୍ଟ୍ରାଲ କ୍ଲିନିକକୁ ସାପ କାମୁଡ଼ାର ଶିକାର ହୋଇଥିବା ଦୁଇଟି କୁକୁରଙ୍କୁ ଅଣାଯାଇଥିଲା। ତେବେ ଆଣ୍ଟିଭେନମ୍ ଅଭାବରୁ ଗୋଟିଏ କୁକୁରର ସଙ୍ଗେ ସଙ୍ଗେ ମୃତ୍ୟୁ ଘଟିଥିବାବେଳେ ଅନ୍ୟଟି ଦେହରୁ ସାଲାଇନ ଖୋଲି ଅନ୍ୟ ଡାକ୍ତରଖାନାକୁ ନେଇଯିବାକୁ କହି ଫେରାଇ ଦିଆଯାଇଥିଲା। କେବଳ ଓୟୁଏଟି ନୁହେଁ, ସାରା ରାଜ୍ୟରେ ଥିବା ପ୍ରାଣୀ ଚିକିତ୍ସାଳୟରେ ଏଭଳି ସ୍ଥିତି ଲାଗି ରହିଛି। ସବୁଠି ଆଣ୍ଟିଭେନମ୍ର ଅଭାବ ଲାଗି ରହିଥିବା ଜଣାପଡିଛି।
ସୂଚନାନୁସାରେ, ପଟିଆ ଅଞ୍ଚଳର ଅକ୍ଷୟ ପରିଡ଼ାଙ୍କ ଲାବ୍ରାଡର କୁକୁର ‘ଜ୍ୟାକି’ ରବିବାର ସକାଳ ପ୍ରାୟ ୪ଟାରେ ଏକ ଚନ୍ଦନ ବୋଡ଼ା ସାପକୁ ପାଟିରେ ଧରି ଘର ଭିତରକୁ ଯାଇଥିଲା। ଅକ୍ଷୟ ମଲା ସାପଟିକୁ ବାହାରେ ଫୋପାଡ଼ି ସାପ କାମୁଡାର ଶିକାର ହୋଇଥିବା ‘ଜ୍ୟାକି’କୁ ଓୟୁଏଟି ସେଣ୍ଟ୍ରାଲ କ୍ଲିନିକ୍ରେ ଭର୍ତ୍ତି କରିଥିଲେ। ସେଠାରେ ପ୍ରଥମ ଡୋଜ୍ ଆକାରରେ ମାତ୍ର ଦୁଇ ଭାଏଲ ଆଣ୍ଟିଭେନମ୍ ଦିଆଯାଇଥିଲା, ଯାହାକୁ ନିଜେ ଅକ୍ଷୟ ବାହାରୁ କିଣି ନେଇଥିଲେ। ହେଲେ ମଧ୍ୟାହ୍ନ ପ୍ରାୟ ୧୨ଟା ବେଳକୁ ଡ୍ୟୁଟିରେ ଥିବା ପ୍ରାଣୀ ଚିକିତ୍ସକ କ୍ଲିନିକ୍ ବନ୍ଦ ଟାଇମ୍ ହୋଇଗଲା କହି କୁକୁର ଶରୀରରୁ ସାଲାଇନ ଖୋଲି ଶହୀଦନଗର ଭେଟେରିନାରି ଡାକ୍ତରଖାନା ନେଇଯିବାକୁ କହି ଚାଲିଯାଇଥିଲେ। ତେବେ ଅକ୍ଷୟ ଉକ୍ତ ଡାକ୍ତରଖାନା ଉପରେ ଭରସା ନ ରଖି କୁକୁରକୁ ଘରକୁ ନେଇ ଦୁଇ ଘଣ୍ଟା ବ୍ୟବଧାନରେ ୮ ଭାଏଲ ଆଣ୍ଟିଭେନମ ଦେଇଛନ୍ତି। ସେପଟେ ଚନ୍ଦକାର ସୂର୍ଯ୍ୟକାନ୍ତ ସାମନ୍ତରାୟଙ୍କ ୯ବର୍ଷର ଡୋବରମ୍ୟାନ କୁକୁର ‘ପେପ୍ସୀ’ର ବାମପଟ ତଳ ପାଟିକୁ ମଧ୍ୟ ଏକ ଚନ୍ଦନ ବୋଡ଼ା କାମୁଡ଼ିଥିଲା। ବିଷ ପ୍ରଭାବରେ କୁକୁରଟି ଅସୁସ୍ଥ ହୋଇପଡୁଥିବାବେଳେ ସୂର୍ଯ୍ୟକାନ୍ତ ତାକୁ ଓୟୁଏଟିକୁ ନେଇଥିଲେ। ହେଲେ ସେଠାରେ ଆଣ୍ଟିଭେନମ ଇଞ୍ଜେକ୍ସନ ନ ଥିଲା। ଏପରିକି ଆଖପାଖରେ କୌଣସି ଔଷଧ ଦୋକାନରେ ମଧ୍ୟ ତାହା ମିଳି ନ ଥିଲା। ଅଳ୍ପ ସମୟ ଭିତରେ ତରଳ ରକ୍ତ ଝାଡ଼ା କରିବା ସହିତ ‘ପେପ୍ସୀ’ ସବୁଦିନ ପାଇଁ ଆଖି ବୁଜିଦେଇଥିଲା।
ଏନେଇ ଭୁବନେଶ୍ବର ଏମ୍ସର ଫୋରେନସିକ ମେଡିସିନ ବିଭାଗର ଅତିରିକ୍ତ ପ୍ରଫେସର ତଥା ଓସ୍ଡମାର ସ୍ନେକ୍ବାଇଟ ରିଡକ୍ସନ ପ୍ରୋଗ୍ରାମ କୋର୍ କମିଟି ସଦସ୍ୟ ଡା. ସୁଦୀପ୍ତ ରଞ୍ଜନ ସିଂହ କୁହନ୍ତି, ସହରରେ ହୁଏତ କୁକୁର-ସାପ ଦ୍ୱନ୍ଦ୍ୱ ବିଷୟ ଗଣମାଧ୍ୟମରେ ଚର୍ଚ୍ଚା ହୁଏ। କିନ୍ତୁ ଗାଁ ଗହଳିରେ ସାପ କାମୁଡ଼ାରେ କେତେ ଗାଈ ଗୋରୁ ବା ଛେଳି ମେଣ୍ଢା ମରନ୍ତି ତାହାର ହିସାବ କାହା ପାଖରେ ନାହିଁ। ଦୈନିକ ୧୦/୧୫ ଲିଟର କ୍ଷୀର ଦେଉଥିବା ଗାଈଟିଏ ମରିଗଲେ ଚାଷୀଟି କେତେ କ୍ଷତିଗ୍ରସ୍ତ ହେବ ତାହା ସହରୀ ଲୋକ ଅନୁଭବ କରିବା ବି କଷ୍ଟ। ପ୍ରାଣୀଙ୍କ ପାଇଁ ସାପ କାମୁଡ଼ା ପାଇଁ ଗାଇଡ୍ଲାଇନ ସହିତ ଏବେ ଡାଟାବେସ ତିଆରି କରିବା ସମୟ ଆସିଯାଇଛି। ଏ ନେଇ ସ୍ନେକ୍ ହେଲ୍ପଲାଇନ ସାଧାରଣ ସମ୍ପାଦକ ତଥା ଓସ୍ଡମା ସ୍ନେକବାଇଟ ରିଡକ୍ସନ ପ୍ରୋଗ୍ରାମ କୋର୍ କମିଟି ସଦସ୍ୟ ଶୁଭେନ୍ଦୁ ମଲ୍ଲିକ କୁହନ୍ତି, ଓୟୁଏଟି ଭେଟେରିନାରି କଲେଜ ରାଜ୍ୟରେ ସବୁଠାରୁ ବଡ଼ ପ୍ରାଣୀ ଚିକିତ୍ସାଳୟ ହୋଇ ଶହୀଦନଗରକୁ ରୋଗୀ ପଠାଇବା ଆଶ୍ଚର୍ଯ୍ୟ ଲାଗୁଛି।
