ଭୁବନେଶ୍ୱର, ୩୧।୭(କ୍ରୀଡ଼ା ପ୍ରତିନିଧି)-
ଟୋକିଓରେ ଚାଲିଥିବା ଅଲିମ୍ପିକ୍ସର ମହିଳା ୧୦୦ ମିଟର ହିଟ୍ରୁ ଓଡ଼ିଶାର ଦୂତୀ ଚାନ୍ଦଙ୍କ ଅଭିଯାନ ଶେଷ ହୋଇଛି। ଏହି ଇଭେଣ୍ଟରେ ଭାରତକୁ ଏକମାତ୍ର ପ୍ରତିନିଧିତ୍ୱ କରିଥିବା ଦୂତୀ ହିଟ୍-୫ରେ ନୈରାଶ୍ୟଜନକ ଭାବେ ୭ମ ସ୍ଥାନରେ ରହିଥିଲେ। ତାଙ୍କ ଟାଇମିଂ ଥିଲା ୧୧.୫୪ ସେକେଣ୍ଡ। ଗତ ମାସରେ ଅନୁଷ୍ଠିତ ଆନ୍ତଃରାଜ୍ୟ ଆଥ୍ଲେଟିକ ମିଟ୍ରେ ଦୂତୀ ୧୧.୧୭ ସେକେଣ୍ଡ ସମୟ ନେଇଥିଲେ। ମାତ୍ର ଟୋକିଓରେ ସେ ନିଜ ଶ୍ରେଷ୍ଠ ପ୍ରଦର୍ଶନ କରିପାରି ନ ଥିଲେ। ଏହି ହିଟ୍ରେ ଜାମାଇକାର ଶେଲି-ଆନ୍ ଫ୍ରାସର ପ୍ରାଇସ ୧୦.୮୪ ସେକେଣ୍ଡ ସମୟ ନେଇ ପ୍ରଥମସ୍ଥାନ ଅଧିକାର କରିଥିଲେ। ସୁଇଜରଲାଣ୍ଡର ଆଜ୍ଲା ଡେଲ୍ ପୋଣ୍ଟେ ୧୦.୯୧ ଏବଂ ନାଇଜେରିଆର ଗ୍ରେସ୍ ନୋକୋଚା ନାଜୁବେଚି ୧୧.୦୦ ସେକେଣ୍ଡ ନେଇ ପରବର୍ତ୍ତୀ ୨ ସ୍ଥାନରେ ରହିଥିଲେ। ହିଟ୍-୫ରୁ ଏହି ୩ ଜଣ ସେମିଫାଇନାଲ ପାଇଁ ଯୋଗ୍ୟତା ପାଇଥିଲେ। ଦୂତୀ ୨୦୦ ମିଟର ରେସ୍ରେ ମଧ୍ୟ ଅଂଶଗ୍ରହଣ କରିବେ।
