ପଟ୍ଟାଙ୍ଗୀ, ୨୭।୨(ଡି.ଏନ୍.ଏ.): ରାଜ୍ୟରେ ସରିଛି ତ୍ରିସ୍ତରୀୟ ପଞ୍ଚାୟତ ନିର୍ବାଚନ। ଶନିବାର ପ୍ରଥମ ପର୍ଯ୍ୟାୟ ଭୋଟଗଣତି ଆରମ୍ଭ ହୋଇଛି। ଚୂଡ଼ାନ୍ତ ବିଜୟୀ ତାଲିକା ପ୍ରକାଶ ପାଇ ନ ଥିଲେ ସୁଦ୍ଧା ୩୧୪ ବ୍ଲକର ୩୧୫ ଜିଲା ପରିଷଦ ଜୋନ୍ରେ ହୋଇଥିବା ଗଣତିରେ ବିଜେଡିର ୨୭୫ରୁ ଊର୍ଦ୍ଧ୍ୱ ଜୋନ୍ରେ ଆଗୁଆ ରହିବା ଏକତରଫା ବିଜୟକୁ ସୁନିଶ୍ଚିତ କରାଉଛି। ହେଲେ ସୀମା ବିବାଦକୁ ନେଇ ଚର୍ଚ୍ଚାରେ ଥିବା କୋରାପୁଟ ଜିଲା ପଟ୍ଟାଙ୍ଗୀ ବ୍ଲକର କୋଟିଆରେ କିନ୍ତୁ ଭିନ୍ନ ଫଳାଫଳ ଦେଖିବାକୁ ମିଳିଛି। ଏଠାରେ ରାଜ୍ୟର ବିଭିନ୍ନ ଦଳର ନେତାଙ୍କ ରଣନୀତି ସମ୍ପୂର୍ଣ୍ଣ ଫେଲ୍ ମାରିଛି। ପଟ୍ଟାଙ୍ଗୀ ବ୍ଲକ ଜୋନ୍-୧ରେ କୋଟିଆ ଆସୁଥିବାରୁ ପଡ଼ୋଶୀ ଆନ୍ଧ୍ରକୁ ମୁହଁତୋଡ଼ ଜବାବ ଦେବାକୁ ମମତା ଜାନିଙ୍କୁ ସର୍ବଦଳୀୟ ପ୍ରାର୍ଥୀ କରାଯାଇଥିଲା। ହେଲେ ତାଙ୍କ ବିରୋଧରେ ସ୍ବାଧୀନ ପ୍ରାର୍ଥୀଭାବେ ଟିକାଇ ଗେମେଲଙ୍କ ବିଜୟ ହୋଇଥିବା ବିଡିଓ ସୌମ୍ୟ ସାର୍ଥକ ମିଶ୍ର ସୂଚନା ଦେଇଛନ୍ତି। ମମତା ୬,୬୪୪ ଖଣ୍ଡ ଭୋଟ ପାଇଥିବାବେଳେ ସ୍ବାଧୀନରୁ ପ୍ରାର୍ଥୀ ହୋଇଥିବା ଗେମେଲ ୧୦,୩୬୪ ଭୋଟ ପାଇଛନ୍ତି। ଏହି ଫଳାଫଳ ସ୍ଥାନୀୟ ଅଞ୍ଚଳର ରାଜନୈତିକ ନେତୃବୃନ୍ଦଙ୍କ ବିଫଳ ରଣନୀତିକୁ ସୂଚାଉ ଥିବା ଜଣାପଡ଼ିଛି। ଗତ ବର୍ଷ ଏହି ଅଞ୍ଚଳରେ ଆନ୍ଧ୍ର ପଞ୍ଚାୟତ ନିର୍ବାଚନ କରି ନିଜର ସ୍ଥିତି ଜାହିର କରିବାକୁ ଚେଷ୍ଟା କରିଥିବାବେଳେ ଏବେ ଓଡ଼ିଶାର ସବୁ ରାଜନୈତିକ ଦଳ ପକ୍ଷରୁ ପ୍ରାର୍ଥୀ ହୋଇଥିବା ମମତାଙ୍କ ପରାଜୟ ଅନେକ ବିଫଳତାକୁ ଅଙ୍ଗୁଳି ନିର୍ଦ୍ଦେଶ କରୁଛି।
ସକାଳ ୮ଟାରେ ପଟ୍ଟାଙ୍ଗୀ ବ୍ଲକ କାର୍ଯ୍ୟାଳୟରେ ଭୋଟ ଗଣତି ଆରମ୍ଭ ହୋଇଥିଲା। ଗଣତି ପରେ ଏହାର ଫଳାଫଳ ଉପରେ ସମସ୍ତଙ୍କ ନଜର ରହିଥିଲା। ଶେଷରେ ସ୍ବାଧୀନ ପ୍ରାର୍ଥୀ ଗେମେଲ ୩,୭୧୦ ଭୋଟରେ ବିଜୟୀ ହେବା ସମସ୍ତଙ୍କୁ ଚକିତ କରିଛି। ସେହିପରି କୋଟିଆ ପଞ୍ଚାୟତରେ ଲିୟୁ ଗେମେଲ ସରପଞ୍ଚ ଭାବେ ନିର୍ବାଚିତ ହୋଇଛନ୍ତି। ଅପରପକ୍ଷରେ ଏହି ବିଜୟ ମୋର ନୁହେଁ ଏହା ୭ଟି ପଞ୍ଚାୟତର ଭୋଟରଙ୍କ ବିଜୟ ବୋଲି ଗେମେଲ କହିଛନ୍ତି। କୋଟିଆ ପଞ୍ଚାୟତ ତଥା ଅନ୍ୟ ୬ ପଞ୍ଚାୟତର ସର୍ବାଙ୍ଗୀନ ଉନ୍ନତି ନିମନ୍ତେ ସଂଘର୍ଷ କରିବା ସହ ସରକାରଙ୍କ ସମସ୍ତ ଯୋଜନା ଜନସାଧାରଣଙ୍କ ନିକଟରେ ପହଞ୍ଚାଇବା ମୋର ମୂଳ ଲକ୍ଷ୍ୟ ବୋଲି ଗେମେଲ କହିଛନ୍ତି।
