ଧାମନଗର, ୧୫।୨(ଡି.ଏନ.ଏ): ଭଦ୍ରକ ଜିଲା ଧାମନଗର ବ୍ଲକ ଅଧୀନ ୧୧ ଓ ଭଣ୍ଡାରିପୋଖରୀ ବ୍ଲକର ୫କୁ ମିଶାଇ ମୋଟ ୧୬ ଗଁାର ଠିକଣା ବଦଳିଛି। ଆଗରୁ ଏସବୁ ଗଁାର ଠିକଣା ଯାଜପୁର ଜିଲାର ସମ୍ପୃକ୍ତି ରହୁଥିଲା। ଲୋକେ ଯେତେବେଳେ ଠିକଣା ଲେଖୁଥିଲେ, ସେତେବେଳେ ପିନ୍କୋଡ ଦେଉଥିଲେ ୭୫୫୦୦୬। ଏହି ପିନକୋଡ ହେଉଛି ଯାଜପୁର ଜିଲା ଦଶରଥପୁର ଉପଡାକଘରର। ବ୍ରିଟିଶ ଅମଳରୁ ଏହି ପିନକୋଡ୍ରେ ନିଜକୁ ପରିଚିତ କରୁଥିଲେ ଧାମନଗର ବ୍ଲକ ଆନନ୍ଦପୁର ପଞ୍ଚାୟତର ୪ ଗଁା, ଭଣ୍ଡାରିପୋଖରୀ ବ୍ଲକ ଷୋଳମପୁର ପଞ୍ଚାୟତର ବିରୋଳି, ସଠଗଁା ଓ ଦାଣ୍ଡକୂଳ ଗଁା ଲୋକେ। ସେହିପରି ଧାମନଗର ବ୍ଲକ ସୋହଡ଼ା ପଞ୍ଚାୟତର ଷେଣ୍ଢପୁର, କଣ୍ଟାପାରୀ, ବେଦପୁର, ମିଶ୍ରସାହି ଗଁା ଲୋକେ ବି ଏହି ପିନ୍କୋଡ ବ୍ୟବହାର କରୁଥିଲେ। ଏସବୁ ଗଁା ସହ ହସନାବାଦ ପଞ୍ଚାୟତର ମମଦୁଲ୍ଲା ଡାକଘର ଅଧୀନରେ ଥିବା ୫ ଗଁା ମଧ୍ୟ ସୋମବାରଠାରୁ ଅଲଗା ଠିକଣାରେ ପରିଚିତ ହୋଇଛି। ବ୍ରିଟିଶ ଶାସନ ଅମଳରେ ଧାମନଗର ବ୍ଲକର ଏସବୁ ଗଁା ଦିହୁଡ଼ି ଆନନ୍ଦପୁର, କଣ୍ଟାପାରୀ ଓ ମମଦୁଲ୍ଲା ପୋଷ୍ଟ ଅଫିସ ଅଧୀନରେ ଥିଲା। ଏହି ୩ ଶାଖା ଡାକଘରର ପିନକୋଡ ୭୫୫୦୦୬ ରହିଥିଲା। ସୋମବାରଠାରୁ ଏହାର ପୂର୍ଣ୍ଣଛେଦ ପଡ଼ିଛି। ତିନି ଶାଖା ଡାକଘରର ପିନ୍କୋଡ ବଦଳିଛି। ଯାଜପୁର ଜିଲାର ଦଶରଥପୁରରୁ ବାହାରି ଧାମନଗର ଉପଡାକଘର ସହ ଯୋଡ଼ି ହୋଇଛି। ଏବେ ପିନ୍କୋଡ୍ ୭୫୬୧୧୭ ହୋଇଛି।
୩ ଶାଖା ଡାକଘରର ଚିଠି ଓ ଆକାଉଣ୍ଟ କାମ ସବୁ ଧାମନଗରରୁ ଆରମ୍ଭ ହୋଇଛି। ସୋମବାର ସକାଳେ ଦିହୁଡ଼ି ଆନନ୍ଦପୁରର ରନର ନିରାକାର ଦାସ ଡାକ ନେଇ କଣ୍ଟାପାରୀ ଯାଇଥିଲେ। ସେଠାରୁ ଡାକ ଧରି ଦୋବଲ ପୋଷ୍ଟ ଅଫିସରେ ପହଞ୍ଚିଥିଲେ। ଦୋବଲ ଡାକଘରର ରନର ନିଜ ଡାକ ସହ ଏ ଦୁଇ ଡାକଘରର ଚିଠିପତ୍ର ନେଇ ଧାମନଗର ଉପଡାକଘରେ ପହଞ୍ଚତ୍ଥିଲେ। ଏହାସହ ନୂଆକରି ଯୋଡ଼ି ହୋଇଥିବା ତିନି ଡାକଘରର ପୋଷ୍ଟମାଷ୍ଟର ଆସି ଧାମନଗର ଉପଡାକଘର ପୋଷ୍ଟମାଷ୍ଟରଙ୍କ ସହ ଆଲୋଚନା କରିଥିଲେ। ପୋଷ୍ଟାଲ ପେମେଣ୍ଟ ବ୍ୟାଙ୍କର ସମସ୍ତ କାର୍ଯ୍ୟ ନିରୀକ୍ଷଣ କରିଥିଲେ। ଏହାସହ ଆକାଉଣ୍ଟ ସେଟିଂ କାର୍ଯ୍ୟରେ ସହଯୋଗ କରିଥିଲେ। ପ୍ରକାଶ ଥାଉକି, ଚଳିତମାସ ୨ ତାରିଖରେ ଏନେଇ ଓଡ଼ିଶା ମହାଡାକପାଳଙ୍କ କାର୍ଯ୍ୟାଳୟରୁ ଯାଜପୁର ଓ ଭଦ୍ରକ ଡାକ ଡିଭିଜନ, ଭାରତୀୟ ଡାକ ବିଭାଗର ସୂଚନା ପ୍ରଯୁକ୍ତି ବିଭାଗ, ଦଶରଥପୁର ଓ ଧାମନଗର ଉପଡାକଘରକୁ ଜଣାଇ ଦିଆଯାଇଥିଲା। ତଦନୁଯାୟୀ ଗତ ୮ ତାରିଖରୁ ତିନି ଶାଖା ଡାକଘର ଦିହୁଡ଼ି ଆନନ୍ଦପୁର, କଣ୍ଟାପାରୀ ଓ ମମଦୁଲ୍ଲା ପୋଷ୍ଟ ଅଫିସରେ ସମସ୍ତ କାମ ବନ୍ଦ ରହିଥିଲା।
