ବୈଶିଙ୍ଗା,୩ା୯(ଡି.ଏନ.ଏ.): ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ ସନ୍ତରା ପଞ୍ଚାୟତର ପତଡ଼ା ଗ୍ରାମରେ ଘଟିଥିବା ଡବଲ ମର୍ଡର ଘଟଣାର ମୁଖ୍ୟ ଅଭିଯୁକ୍ତ ଚୁଇଁ ଓରଫ ଫକୀର ଖଁାଙ୍କୁ ୯ ବର୍ଷ ପରେ ଗୁରୁବାର ବିଳମ୍ବିତ ରାତିରେ ପୋଲିସ ଗିରଫ କରିଛି। ସୂଚନା ଅନୁଯାୟୀ, ୨୦୧୩ ନଭେମ୍ବର ୧୫ ତାରିଖ ରାତିରେ ପତଡ଼ା ଗ୍ରାମର ଅନୀଲ ଗିରି ଓ ତାଙ୍କ ସ୍ତ୍ରୀଙ୍କୁ ହତ୍ୟା କରାଯାଇଥିଲା। ଅନୀଲ ଡ୍ରାଇଭିଂ କରୁଥିବା ବେଳେ ଜାମୁନଣ୍ଡା ଗଁାର ବଳିଆ ଦଣ୍ଡପାଟଙ୍କଠାରୁ କିଛି ଟଙ୍କା ଧାର ନେଇଥିଲେ। ଏହି ଟଙ୍କା ନେଣ ଦେଣକୁ ନେଇ କିଛିଦିନ ପୂର୍ବରୁ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏଥିରେ ପ୍ରତିଶୋଧ ପରାୟଣ ହୋଇ ଅନୀଲଙ୍କୁ ହତ୍ୟା କରିବା ପାଇଁ ବଳିଆ ଯୋଜନା କରିଥିଲେ। ଘଟଣାଦିନ ସହଯୋଗୀ ଠକୁରୁ ସେଠୀ ଏବଂ ଫକୀର ଖାଁଙ୍କ ସହ ସେ ଅନୀଲଙ୍କ ଘରେ ପହଞ୍ଚି ଟଙ୍କା ମାଗିଥିଲେ। ଏନେଇ ଯୁକ୍ତିତର୍କ ହେବାରୁ ଅନୀଲଙ୍କୁ ଧାରୁଆ ଅସ୍ତ୍ରରେ ବିଭତ୍ସ ଭାବେ ହତ୍ୟା କରିଥିଲେ। ପାଖ କୋଠରୀରେ ଥିବା ତାଙ୍କ ଅନ୍ତସତ୍ତ୍ୱା ସ୍ତ୍ରୀ ପ୍ରତିବାଦ କରିବାରୁ ତାଙ୍କୁ ମଧ୍ୟ ହତ୍ୟା କରିଥିବା ଅଭିଯୋଗ ହୋଇଥିଲା। ଏହି ଘଟଣାର ତଦନ୍ତ ଚଳାଇ ପୋଲିସ ଦୁଇ ଅଭିଯୁକ୍ତ ବଳିଆ ଓ ଠକୁରୁଙ୍କୁ ଗିରଫ କରିଥିବା ବେଳେ ଫକୀର ଖଁା ଫେରାର ହୋଇଯାଇଥିଲେ। ସେ ବିଭିନ୍ନ ସ୍ଥାନରେ ନାମ ବଦଳାଇ ରହୁଥିବା ବେଳେ ଶୁଳିଆପଦାରେ ଥିବା ନେଇ ଖବରପାଇ ବୈଶିଙ୍ଗା ଥାନା ଆଇଆଇସି ପ୍ରଭାଂଶୁ ଶେଖର ମିଶ୍ର ସଦଳବଳ ଚଢାଉ କରି ଗୁରୁବାର ରାତିରେ ତାଙ୍କୁ ଗିରଫ କରିଥିଲେ। ଶୁକ୍ରବାର ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
