କଟକ ଅଫିସ,୧୮ା୧: କଟକ ମଧୁପାଟଣା ଥାନା ଅଧୀନ ଶ୍ରୀରାମ ନଗର ଅଞ୍ଚଳରେ ସୋମବାର ଘଟିଥିବା ମାଆ-ପୁଅ ମୃତ୍ୟୁ ଘଟଣାରେ ପୋଲିସ ମୃତା ମହିଳାଙ୍କ ସ୍ବାମୀ ସନ୍ତୋଷ ଖୁଣ୍ଟିଆଙ୍କୁ ଗିରଫ କରି ମଙ୍ଗଳବାର କୋର୍ଟ ଚାଲାଣ କରିଛି। ମୃତା ମହିଳା ଶିଳ୍ପୀ ଖୁଣ୍ଟିଆଙ୍କ ପରିବାର ପକ୍ଷରୁ ଦାଏର ଏତଲାକୁ ଭିତ୍ତି କରି ଥାନାରେ ଏକ ମାମଲା ରୁଜୁ ହୋଇଛି। ଅଭିଯୋଗ ମୁତାବକ, ସନ୍ତୋଷ ତାଙ୍କ ସ୍ତ୍ରୀ ଶିଳ୍ପୀଙ୍କୁ ବିଭିନ୍ନ ସମୟରେ ମାନସିକ ନିର୍ଯାତନା ଦେଇଆସୁଥିଲେ, ଯେଉଁଥିପାଇଁ ସେ ଆତ୍ମହତ୍ୟା କରିବାକୁ ବାଧ୍ୟ ହୋଇଥିବା ଦିଗକୁ ପୋଲିସ ଗୁରୁତର ସହ ଗ୍ରହଣ କରିଛି। ଏ ନେଇ ପୋଲିସ ପ୍ରାଥମିକ ଅବସ୍ଥାରେ ସନ୍ତୋଷଙ୍କୁ ଗିରଫ କରିଛି। ତାଙ୍କୁ କୋର୍ଟ ଚାଲାଣ ପରେ ଜେଲ ହାଜତକୁ ପଠାଇ ଦିଆଯାଇଥିବା ଡିସିପି ପିନାକ ମିଶ୍ର କହିଛନ୍ତି।
ଶ୍ରୀରାମ ନଗର ଅଞ୍ଚଳର ଏକ ଭଡ଼ାଘରେ ଶିଳ୍ପୀ ୨ ବର୍ଷର ଶିଶୁପୁତ୍ର ସହ ରହୁଥିଲେ। ଶିଶୁପୁତ୍ରର ସାବତମା’ ହେଉଛନ୍ତି ଶିଳ୍ପୀ। ପାରିବାରିକ କଳହର କରୁଣ ପରିଣତି ସ୍ବରୂପ ୨ବର୍ଷର ପୁତ୍ରକୁ ହତ୍ୟାକରି ସେ ଆତ୍ମହତ୍ୟା କରିଥିଲେ। ନେତାଜୀ ନଗର ଅଞ୍ଚଳର ବାସିନ୍ଦା ଶିଳ୍ପୀ ୨୦୨୧ ନଭେମ୍ବର ୨୬ରେ ସାଲେପୁର ଥାନା ମୁର୍କୁଣ୍ଡି ଗ୍ରାମର ସନ୍ତୋଷଙ୍କୁ ବିବାହ କରିଥିଲେ। ଉଭୟେ ପୂର୍ବରୁ ଅନ୍ୟତ୍ର ବିବାହ କରିଥିଲେ। ସନ୍ତୋଷଙ୍କ ପ୍ରଥମ ସ୍ତ୍ରୀ ଶିଶୁପୁତ୍ରଟିକୁ ଜନ୍ମ ଦେଇ ମେଡିକାଲ ବେଡ୍ରେ ମୃତ୍ୟୁବରଣ କରିଥିଲେ। ସେହିପରି ଶିଳ୍ପୀ ପ୍ରଥମ ସ୍ବାମୀଙ୍କଠାରୁ ବିବାହ ବିଚ୍ଛେଦ ହୋଇ ଏକାକୀ ରହୁଥିଲେ। ଉଭୟଙ୍କ ମଧ୍ୟରେ ସୋସିଆଲ ମିଡ଼ିଆରେ ପରିଚୟ ହେବା ପରେ ପରିବାରର ସହମତିରେ ବିବାହ ହୋଇଥିଲା। ଉଭୟ ପେସାରେ ଇଞ୍ଜିନିୟର। ହେଲେ ପରବର୍ତ୍ତୀ ସମୟରେ ବିଭିନ୍ନ କାରଣରୁ ଉଭୟଙ୍କ ମଧ୍ୟରେ ପାରିବାରିକ ବିବାଦ ଲାଗି ରହିଥିଲା। ଶିଳ୍ପୀ କଟକରେ ରହିବାକୁ ଚାହୁଁଥିବାବେଳେ ସେ ମୁର୍କୁଣ୍ଡି ଗଁାରେ ରହନ୍ତୁ ବୋଲି ସନ୍ତୋଷ ଚାହୁଁଥିଲେ। ସନ୍ତୋଷଙ୍କ ପ୍ରଥମ ସ୍ତ୍ରୀଙ୍କ ପୁତ୍ରକୁ ଶିଳ୍ପୀ ନିଜ ପାଖରେ ରଖି ଲାଳନପାଳନ କରୁଥିବାବେଳେ ସେହି ପୁଅକୁ ନେଇ ଉଭୟଙ୍କ ମଧ୍ୟରେ ମତାନ୍ତର ସୃଷ୍ଟି ହୋଇଥିଲା। ସନ୍ତୋଷଙ୍କ କଥାରେ ଶିଳ୍ପୀ ରାଜି ନ ହେବାରୁ ସେ ତାଙ୍କଠାରୁ ପୁଅକୁ ଅଲଗା କରି ନେଇଯିବାକୁ ଉଦ୍ୟମ କରିଥିଲେ। ଶିଳ୍ପୀ ପୁଅକୁ ଛାଡ଼ିବାକୁ ଚାହୁଁ ନ ଥିଲେ। ସେ ଯେଉଁଠି ରହିବେ ପୁଅ ସେଇଠି ରହିବ ବୋଲି ସେ ବାରମ୍ବାର ପୂର୍ବରୁ କହିଥିଲେ, ଯାହାର ପରିଣତି ସ୍ବରୂପ ଏଭଳି ବର୍ବରକାଣ୍ଡ ସେ କରିବସିଥିଲେ। ସେ ଶିଶୁପୁତ୍ରକୁ ବ୍ଲେଡ୍ରେ କାଟି ହତ୍ୟା କରିବା ପରେ ନିଜେ ଫ୍ୟାନ୍ରେ ବେକରେ ଲୁଗା ବାନ୍ଧି ଆତ୍ମହତ୍ୟା କରିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଭଡ଼ାଘର ଭିତରକୁ ଯିବାର ଏକମାତ୍ର ପଥ ମୁଖ୍ୟ ଦରଜା ବନ୍ଦ ଥିବାରୁ ଏହି କାଣ୍ଡ ଶିଳ୍ପୀଙ୍କ ବ୍ୟତୀତ ଅନ୍ୟ କେହି କରିବାର ସୁଯୋଗ ନାହିଁ ବୋଲି ପୋଲିସ ତଦନ୍ତରୁ ଜାଣିଛି।
ଶିଳ୍ପୀଙ୍କ ଶାଶୁଘର ପକ୍ଷର ଏତଲାକୁ ଭିତ୍ତି କରି ଏକ ମାମଲା(ନଂ.୧୭/୨୩) ରୁଜୁ ହୋଇଥିବାବେଳେ ତାଙ୍କ ବାପଘର ପକ୍ଷର ଏତଲାକୁ ଭିତ୍ତି କରି ଆଉ ଏକ ମାମଲା(ନଂ.୧୮/୨୩) ରୁଜୁ ହୋଇଛି। କେଉଁ ପରିସ୍ଥିତିରେ ମହିଳା ଜଣକ ସାବତ ପୁଅକୁ ମାରି ନିଜେ ଆତ୍ମହତ୍ୟା କଲେ ପୋଲିସ ତାହାର ତଦନ୍ତ କରୁଛି। ଶିଳ୍ପୀଙ୍କ ବାପଘର ଲୋକ ଝିଅର ମୃତ୍ୟୁ ପାଇଁ ସ୍ବାମୀ ଏବଂ ତାଙ୍କ ଶାଶୁଘର ଲୋକଙ୍କୁ ଦାୟୀ କରିଥିଲେ। ତେଣୁ ପୋଲିସ ସନ୍ତୋଷଙ୍କୁ ଗିରଫ କରିଥିବାବେଳେ ପରବର୍ତ୍ତୀ ସମୟରେ ତାଙ୍କ ପରିବାରର ଅନ୍ୟମାନଙ୍କୁ ପଚରାଉଚରା କରିବ ବୋଲି ସୂଚନା ମିଳିଛି। ତେଣୁ ଆଗାମୀ ଦିନରେ ଗିରଫଦାରି ବଢ଼ିବା ସମ୍ଭାବନା ରହିଛି। ଅପରପକ୍ଷରେ ଘଟଣାସ୍ଥଳରେ ଉପସ୍ଥିତ ଥିବା ଅନ୍ୟ ଥାନାର ଏଏସ୍ଆଇଙ୍କୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା। ତେବେ ସମ୍ପୃକ୍ତ ଏଏସ୍ଆଇଙ୍କୁ ଏନେଇ ପଚରାଉଚରା କରାଯିବ। ତାଙ୍କର କିଛି ମନ୍ଦ ଉଦ୍ଦେଶ୍ୟ ଥିବା ପ୍ରମାଣିତ ହେଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଡିସିପି ମିଶ୍ର କହିଛନ୍ତି।
