ଟୋକିଓ, ୨୭ା୭ (ପି.ଟି.)-କୁଏଟ୍ର ଅବଦୁଲ୍ଲା ଅଲ୍-ରଶିଦିଙ୍କ କ୍ଷେତ୍ରରେ ବୟସ ବାଧକ ହୋଇପାରି ନାହିଁ। ୫୮ ବର୍ଷ ବୟସରେ ଟୋକିଓ ଅଲିମ୍ପିକ୍ସ ଶୁଟିଂ ପୁରୁଷ ସ୍କିଟ୍ ଇଭେଣ୍ଟରେ ସେ ବ୍ରୋଞ୍ଜ ପଦକ ହାସଲ କରିଛନ୍ତି। କୌତୂହଳର ବିଷୟ ଯେ, ୭ ଥର ଅଲିମ୍ପିଆନ ପ୍ରତିଯୋଗିତାରେ ଆର୍ସେନାଲ ଏଫ୍ସି ଶର୍ଟ ପରିଧାନ କରିଥିଲେ। ସେ କହିଛନ୍ତି, ୫୮ ବର୍ଷ ବୟସରେ ଶୁଟିଂରେ ସବୁଠାରୁ ବୟସ୍କ ଶୁଟର ଭାବେ ବ୍ରୋଞ୍ଜ ପଦକ ଜିତିପାରିଥିବାରୁ ଗୌରବାନ୍ବିତ ମନେ କରୁଛି। ଏହା ସ୍ବର୍ଣ୍ଣଠାରୁ ମଧ୍ୟ ଅଧିକ ମୂଲ୍ୟବାନ। ତେଣୁ ଏଥିରେ ସେ ବହୁତ ଖୁସି ଅଛନ୍ତି। ଅବଦୁଲ୍ଲା ପ୍ୟାରିସରେ ହେବାକୁ ଥିବା ୨୦୨୪ ଅଲିମ୍ପିକ୍ସରେ ଭାଗ ନେବାଲାଗି ଅଭିଳାଷ ରଖିଛନ୍ତି। ସେତେବେଳେ ତାଙ୍କୁ ୬୧ ବର୍ଷ ବୟସ ହୋଇଯାଇଥିବ। ଅଲିମ୍ପିକ୍ସର ଏହି ସଂସ୍କରଣରେ ସେ ସ୍ବର୍ଣ୍ଣ ଜିତିବା ଲକ୍ଷ୍ୟ ରଖିଛନ୍ତି। ଅବଦୁଲ୍ଲା ୧୯୯୬ରେ ଆଟ୍ଲାଣ୍ଟାରେ ତାଙ୍କ ଅଲିମ୍ପିକ ଯାତ୍ରା ଆରମ୍ଭ କରିଥିଲେ। ଟୋକିଓରେ ୬ଜଣଙ୍କୁ ନେଇ ଅନୁଷ୍ଠିତ ଫାଇନାଲରେ ସେ ୪୬ ଶଟ୍ ସହ ବ୍ରୋଞ୍ଜ ବିଜୟୀ ହୋଇଥିଲେ। ଅଲିମ୍ପିକ୍ସରେ ଏହା ହେଉଛି ତାଙ୍କର ଦ୍ୱିତୀୟ ପଦକ। ଏହା ପୂର୍ବରୁ ୫ବର୍ଷ ପୂର୍ବେ ୨୦୧୬ ରିଓ ଗେମ୍ସରେ ସେ ଜଣେ ସ୍ବାଧୀନ ଆଥଲେଟ୍ ଭାବେ ଏକ ବ୍ରୋଞ୍ଜ ପଦକ ଜିତିଥିଲେ। ସେତେବେଳେ ମଧ୍ୟ ସେ ଜଣାଶୁଣା ଇଂଲିଶ ଫୁଟ୍ବଲ କ୍ଲବ ଆର୍ସେନାଲ ଏଫ୍ସିର ଜର୍ସି ପରିଧାନ କରି ପ୍ରତିଯୋଗିତାରେ ଭାଗ ନେଇଥିଲେ। କାରଣ ଅନ୍ତର୍ଜାତୀୟ ଅଲିମ୍ପିକ କମିଟି (ଆଇଓସି) ଦ୍ୱାରା ବାସନ୍ଦ ହୋଇଥିବାରୁ କୁଏଟ୍ ଏହି ମେଗା ଇଭେଣ୍ଟରେ ଅଂଶଗ୍ରହଣରୁ ବଞ୍ଚତ୍ତ ହୋଇଥିଲା। ପୁରସ୍କାର ବିତରଣ ଉତ୍ସବରେ ଖୁସି ଜାହିର କରିବା ପରିବର୍ତ୍ତେ ମୋ ମୁଣ୍ଡ ତଳକୁ ହୋଇଯାଇଥିଲା। ଅଲିମ୍ପିକ ପତାକା ଦେଖିବାଲାଗି ମୋର ଆଦୌ ଆଗ୍ରହ ନ ଥିଲା। ମୋ ଦେଶ କୁଏଟ୍ର ପତାକା ଦେଖିବାକୁ ଚାହୁଁଥିଲି। ଅବଦୁଲ୍ଲାଙ୍କ ପୁଅ ତଲାଲ ମଧ୍ୟ ଜଣେ ଶୁଟର। ଉଭୟ ଟୋକିଓ ଗେମ୍ସ ଆସିଛନ୍ତି। ବାପ ଓ ପୁଅଙ୍କ ଏହା ଦ୍ୱିତୀୟ ଅଲିମ୍ପିକ୍ସ। ତଲାଲ ଜଣେ ଟ୍ରାପ୍ ଶୁଟର।
