ଦୁନିଆରେ କିଛି ଜିନିଷ ଅଚାନକ ଘଟିପାରେ। କିନ୍ତୁ ବେଳେବେଳେ କିଛି ଘଟଣା ଏମିତି ଘଟେ, ଯାହାକୁ ସହଜେ ବିଶ୍ୱାସ କରି ହୁଏ ନାହିଁ। ଆମେରିକାର ଅରେଞ୍ଜ୍ କାଉଣ୍ଟିରେ ଏପରି ଏକ ଘଟଣା ଘଟିଛି।
ନିକଟରେ ଜିଲ ଜଷ୍ଟିନିଆନି ଏବଂ ଏରିନ ଚେପ୍ଲାକ ନାମକ ଦୁଇ ଯାଆଁଳା ଭଉଣୀଙ୍କ ଗୋଟିଏ ଡାକ୍ତରଖାନାରେ, ଗୋଟିଏ ଦିନରେ ପୁତ୍ର ସନ୍ତାନ ଜନ୍ମ ଦେଇଛନ୍ତି। ଜିଲ ଏବଂ ଏରିନଙ୍କ ଜୀବନରେ ଏହି ସୁଖ ପ୍ରାୟ ଚାରି ଘଣ୍ଟା ମଧ୍ୟରେ ଆସିଥିଲା। ଡାକ୍ତରଖାନାର ରେକର୍ଡ ଅନୁଯାୟୀ, ଉଭୟ ଶିଶୁ (ବାଳକ) ସମାନ ଓଜନ ଏବଂ ଉଚ୍ଚତା ସହିତ ଜନ୍ମ ହୋଇଥିଲେ। ଉଭୟ ପିଲାଙ୍କ ଓଜନ ପାଖାପାଖି ୭ ପାଉଣ୍ଡ ଏବଂ ଜନ୍ମ ସମୟରେ ସେମାନଙ୍କର ଉଚ୍ଚତା ୨୦ ଇଞ୍ଚ ରହିଛି।
ଏହି ଦୁଇ ଭଉଣୀ କହିଛନ୍ତି, ଆମେ ସବୁବେଳେ ପରସ୍ପରର ନିକଟତର ହୋଇ ରହିଛୁ। ଆମେ ବର୍ତ୍ତମାନ ପର୍ଯ୍ୟନ୍ତ ସମାନ ଜୀବନ ବିତାଇଛୁ। ସେଥିପାଇଁ ଜୀବନର ଏହି ଗୁରୁତ୍ୱପୂର୍ଣ୍ଣ ଅବସ୍ଥାକୁ ମଧ୍ୟ ସମାନ କରିବା ପାଇଁ ନିଷ୍ପତ୍ତି ନେଇଥିଲୁ। ସୌଭାଗ୍ୟବଶତଃ ମା’ ହେବାର ଖୁସି ମଧ୍ୟ ଗୋଟିଏ ସମୟରେ ଆସିଛି। ଗର୍ଭାବସ୍ଥାର ପ୍ରତ୍ୟେକ ପର୍ଯ୍ୟାୟରେ ଆମେ ଦୁହେଁ ପରସ୍ପରକୁ ସମର୍ଥନ କରିଥିଲୁ।
