ବ୍ୟାଙ୍କକ୍,୧୪।୧(ପି.ଟି.): ଏଠାରେ ଆରମ୍ଭ ହୋଇଥିବା ଥାଇଲାଣ୍ଡ ଓପନ୍ ସୁପର ୧୦୦୦ ଟୁର୍ନାମେଣ୍ଟରେ ଭାରତର କିଡାମ୍ବୀ ଶ୍ରୀକାନ୍ତ ପୁରୁଷ ସିଙ୍ଗଲ୍ସ ଦ୍ୱିତୀୟ ରାଉଣ୍ଡରେ ପ୍ରବେଶ କରିଛନ୍ତି। ସେହିପରି ମହିଳା ସିଙ୍ଗଲ୍ସରେ ଅଭିଜ୍ଞ ସାଇନା ନେହ୍ବାଲ ମଧ୍ୟ ଦ୍ୱିତୀୟ ରାଉଣ୍ଡକୁ ଉଠିଛନ୍ତି। ତେବେ ପାରୁପାଲ୍ଲୀ କାଶ୍ୟପ ପ୍ରଥମ ରାଉଣ୍ଡ ମ୍ୟାଚ ଅଧାରୁ ଓହରିଯାଇଛନ୍ତି।
ଶ୍ରୀକାନ୍ତ ମାତ୍ର ୩୧ ମିନିଟ୍ର ନିଜ ଦେଶର ସୌରଭ ବର୍ମାଙ୍କୁ ୨୧-୧୨, ୨୧-୧୧ରେ ପରାସ୍ତ କରି ଅଗ୍ରଗତି କରିଛନ୍ତି। ତେବେ କାଶ୍ୟପ କାନାଡ଼ାର ଜାସନ ଆନ୍ଥୋନୀ ହୋ- ଶୁଏଙ୍କ ବିପକ୍ଷ ଓପନିଂ ରାଉଣ୍ଡ ମ୍ୟାଚରୁ ରିଟାୟାର ହୋଇଥିଲେ। ରାଜ୍ୟଗୋଷ୍ଠୀ କ୍ରୀଡ଼ା ଚାମ୍ପୟନ କାଶ୍ୟପ ତୃତୀୟ ଗେମ୍ରେ ୮-୧୪ରେ ପଛରେ ପଡିଥିବା ବେଳେ କାଫ୍ ମସଲ ଇଞ୍ଜୁରିର ଶିକାର ହୋଇଥିଲେ। ସେ ପ୍ରଥମ ଗେମ୍ରେ ୯-୧୨ରେ ପରାସ୍ତ ହୋଇଥିଲେ। ତେବେ ଦ୍ୱିତୀୟ ରାଉଣ୍ଡରେ ସେ ପ୍ରତ୍ୟାବର୍ତ୍ତନ କରି ୨୧-୧୩ରେ ବାଜି ମାରିଥିଲେ। ଶ୍ରୀକାନ୍ତ ଦ୍ୱିତୀୟ ରାଉଣ୍ଡରେ ମାଲେସିଆର ଜି ଜିଆ ଲିଙ୍କୁ ଭେଟିବେ। ଲି ଅନ୍ୟଏକ ପ୍ରଥମ ରାଉଣ୍ଡ ମ୍ୟାଚରେ ଭାରତର ଏଚ୍.ଏସ୍. ପ୍ରଣୟଙ୍କୁ ୧୩-୨୧, ୨୧-୧୪, ୨୧-୮ରେ ପରାସ୍ତ କରି ଅଗ୍ରଗତି କରିଥିଲେ। ସେହିପରି ଅନ୍ୟତମ ଭାରତୀୟ ଖେଳାଳି ସମୀର ବର୍ମା ଇଣ୍ଡୋନେସିଆର ଶେସାର ହିରେନ ରୁଷ୍ଟାଭିଟୋଙ୍କଠାରୁ ପ୍ରଥମ ରାଉଣ୍ଡରେ ୧୫-୨୧, ୧୭- ୨୧ରେ ପରାସ୍ତ ହୋଇ ବିଦାୟ ନେଇଛନ୍ତି। ମହିଳା ସିଙ୍ଗଲ୍ସ ପ୍ରଥମ ରାଉଣ୍ଡ ମୁକାବିଲାରେ ସାଇନା ମାଲେସିଆର ସେଲ୍ଭାଡୁରେ କିସୋନାଙ୍କୁ ୨୧-୧୫, ୨୧-୧୫ରେ ପରାସ୍ତ କରି ଅଗ୍ରଗତି କରିଛନ୍ତି। ଦ୍ୱିତୀୟ ରାଉଣ୍ଡରେ ସାଇନା ଥାଇଲାଣ୍ଡର ବୁସାନନ ଅଙ୍ଗବାମରୁଙ୍ଗଫାନଙ୍କୁ ଭେଟିବେ।
ପୁରୁଷ ଡବଲ୍ସରେ ସାତ୍ତ୍ୱିକସାଇରାଜ ରାଙ୍କିରେଡ୍ଡୀ ଓ ଚିରାଗ ସେଟ୍ଟୀ ୧୯-୨୧, ୨୧-୧୬, ୨୧-୧୪ରେ ଦକ୍ଷିଣ କୋରିଆ ଯୋଡି କିମ୍ ଜି ଜଙ୍ଗ୍ ଓ ଲି ୟଙ୍ଗ ଡାଏଙ୍କୁ ପରାସ୍ତ କରି ଅଗ୍ରଗତି କରିଛନ୍ତି। ଅନ୍ୟତମ ଭାରତୀୟ ଯୋଡି ଅର୍ଜୁନ ମାଡଥିଲ ରାମଚନ୍ଦ୍ରନ ଓ ଧ୍ରୁବ କପିଳ ୨୧-୧୩, ୮-୨୧, ୨୨-୨୪ରେ ମାଲେସିଆ ଯୋଡି ଅଙ୍ଗ ୟେ ସିନ ଓ ତେଓ ଏ ୟିଙ୍କଠାରୁ ପରାସ୍ତ ହୋଇଛନ୍ତି। ମିକ୍ସ ଡବଲ୍ସରେ ଭାରତୀୟ ଯୋଡି ଏନ୍ ସିକ୍କି ରେଡ୍ଡୀ ଓ ସୁମିତ ରେଡ୍ଡୀ ମଧ୍ୟ ପରାସ୍ତ ହୋଇଛନ୍ତି। ଅନ୍ୟତମ ଭାରତୀୟ ପୁରୁଷ ଡବଲ୍ସ ଯୋଡି ମନୁ ଅଟ୍ରି ଓ ବି. ସମିଥ ରେଡ୍ଡୀ ପ୍ରଥମ ରାଉଣ୍ଡରେ ଥାଇଲାଣ୍ଡ ଯୋଡି ବୀରାଫତ ଫକଜାରୁଙ୍ଗ୍ ଓ ଓ୍ବଙ୍ଗ୍ସାଥ୍ରୋନ ଥୋଙ୍ଗଖାମଙ୍କଠାରୁ ୧୯-୨୧, ୧୪-୨୧ରେ ପରାସ୍ତ ହୋଇଛନ୍ତି।
