ନୂଆଦିଲ୍ଲୀ,୨୫ ।୮: ଆତଙ୍କବାଦ ବିରୋଧରେ ଲଢିବାକୁ ଚେଷ୍ଟା କରୁଥିବା ପାକିସ୍ତାନ ପୁଣିଥରେ ସମ୍ପୂର୍ଣ୍ଣ ଭାବେ ବିଫଳ ହୋଇଛି । ନୌଶେରା ସେକ୍ଟରରୁ ଧରାପଡିଥିବା ଆତଙ୍କବାଦୀମାନେ ପୁଣିଥରେ ପାକିସ୍ତାନର ଅସଲ ମୁଖ୍ୟ ଖୋଲିଛନ୍ତି ।
ଘଟଣା ହେଲା ଗିରଫ ହୋଇଥିବା ଆତଙ୍କବାଦୀ ତବାରକ ତାଙ୍କ ବୟାନରେ କହିଛନ୍ତି ତାଙ୍କ ସହ ଆଉ ୪-୫ ଜଣ ଆତଙ୍କବାଦୀ ଅସ୍ତ୍ରଶସ୍ତ୍ର ସହ ଭାରତ ଆସିଛନ୍ତି । ତାଙ୍କ ପିତାଙ୍କ ନାମ ମଲିକ ଓ ସେ ୬ ଭାଇ ଭଉଣୀ ବୋଲି କହିଛନ୍ତି । ତାଙ୍କ ଗାଁ ନାମ ସବ୍ଚକୋଟ ଓ ଏହା ଏଲଓସି ଠାରୁ ୩-୪ କିଲୋମିଟର ଦୂର ବୋଲି ଗିରଫ ଆତଙ୍କବାଦୀ ତବାରକ କହିଛନ୍ତି । ତାଙ୍କୁ ପାକିସ୍ତାନରେ ଆତଙ୍କବାଦର ଟ୍ରେନିଂ ଦିଆଯାଇଛି ଓ ଭାରତରେ ଆକ୍ରମଣ କରିବାକୁ ପଠାଯାଇଥିଲା ।
ତବାରକ କହିଛନ୍ତି ପାକିସ୍ତାନ ଆର୍ମିରେ ଥିବା ଚୌଧୁରୀ ୟୁନିସ ତାଙ୍କୁ ଭାରତ ପଠାଇଛନ୍ତି । ଝଙ୍ଗର ସୀମାରେ ଥିବା ଭାରତୀୟ ଆର୍ମି ପୋଷ୍ଟକୁ ଉଡାଇବାକୁ ତାଙ୍କୁ ପଠାଯାଇଥିବା ସେ କହିଛନ୍ତି । କ୍ୟାମେରା ସାମ୍ନାରେ ତବାରକ ପାକିସ୍ତାନ ଓ ପାକିସ୍ତାନୀ ସେନାର ସମସ୍ତ କଳା କାର୍ଯ୍ୟ ଉପରୁ ପରଦା ଉଠାଇଛନ୍ତି ।
ସୂଚନାଯୋଗ୍ୟ, ଗିରଫ ଆତଙ୍କବାଦୀ ତାର କାଟି ଭାରତକୁ ପ୍ରବେଶ କରିବାକୁ ଉଦ୍ୟମ କରୁଥିବା ବେଳେ ନୌସେରା ସେକ୍ଟରରେ ତାଙ୍କୁ ଗିରଫ କରାଯାଇଥିଲା । ଜୀବନ୍ତ ଧରାପଡିଥିବା ଏହି ଆତଙ୍କବାଦୀ ବାଜବା ସେନା ଓ ଆଇଏସର ସମସ୍ତ କଥା ଖୋଲି କହିଛନ୍ତି । ସେ କହିଛନ୍ତି ପାକିସ୍ତାନ ଆର୍ମି ଓ ଆଇଏସ ସ୍କୁଲରେ ଆତଙ୍କବାଦର ପାଠ ପଢାଯାଉଛି ।
