ନୂଆଦିଲ୍ଲୀ, ୧।୬ : ଦେଶରେ କରୋନା ମହାମାରୀ ସଙ୍କଟ ଜାରି ରହିଛି। ଏପରିସ୍ଥଳେ ବର୍ତ୍ତମାନ ଦେଶର ମିଜୋରାମ, ତ୍ରିପୁରା ଏବଂ ସିକିମ ଆଦି ୩ ଉତ୍ତର-ପୂର୍ବ ରାଜ୍ୟରେ ଆଫ୍ରିକାନ୍ ସ୍ବାଇନ୍ ଫ୍ଲୁ ନେଇ ଆତଙ୍କ ଦେଖାଦେଇଛି। ମାମଲାର ଗମ୍ଭୀରତାକୁ ଦୃଷ୍ଟିରେ ରଖି ମିଜୋରାମ ରାଜ୍ୟ ସରକାର ‘ରାଜ୍ୟ ବିପର୍ଯ୍ୟୟ’ ଘୋଷଣା କରିଛନ୍ତି। ତେବେ ଏହା ଆନୁଷ୍ଠାନିକ ଭାବେ ଘୋଷଣା କରାଯାଇ ନାହିଁ।
ଆଫ୍ରିକାନ୍ ସ୍ବାଇନ୍ ଫ୍ଲୁ ଯୋଗୁ ଏପର୍ଯ୍ୟନ୍ତ ୩୭ ହଜାରରୁ ଅଧିକ ଘୁଷୁରୀଙ୍କର ମୃତ୍ୟୁ ଘଟିଛି। ଇଣ୍ଡିଆ ଟୁଡେ ରିପୋର୍ଟ ଅନୁଯାୟୀ, ରାଜ୍ୟ ପଶୁପାଳନ ଏବଂ ପ୍ରାଣୀ ଚିକିତ୍ସା ମନ୍ତ୍ରୀ ଡ.କେ. ବିଛୁଆ ପିଟିଆଇକୁ କହିଛନ୍ତି ଯେ ଏହି ରୋଗକୁ ରାଜ୍ୟ ବିପର୍ଯ୍ୟୟ ବୋଲି ଘୋଷଣା କରିବାକୁ ମୁଖ୍ୟମନ୍ତ୍ରୀ ଜୋରା ମଥାଙ୍ଗା ଅନୁମୋଦନ କରିଛନ୍ତି। ଏଥି ସହିତ ଖୁବ ଶୀଘ୍ର ଏକ ସରକାରୀ ସୂଚନା ଦିଆଯିବ ବୋଲି ଆଶା କରାଯାଉଛି।
ରାଜ୍ୟର ସାତଟି ଜିଲାର ୫୦ ରୁ ଅଧିକ ଗାଁ ଏହି ରୋଗ ବ୍ୟାପିଛି। ଆଫ୍ରିକାନ୍ ସ୍ବାଇନ ଫ୍ଲୁ ଏକ ଅତ୍ୟଧିକ ସଂକ୍ରାମକ ଏବଂ ବିପଜ୍ଜନକ ପ୍ରାଣୀ ରୋଗ ଯାହା ଘରୋଇ ଏବଂ ବଣୁଆ ଘୁଷୁରୀକୁ ସଂକ୍ରମିତ କରିଥାଏ। ଏହାର ସଂକ୍ରମଣ ଯୋଗୁ ଘୁଷୁରୀମାନଙ୍କୁ ହେମୋରାଜିକ ଜ୍ୱର ହୋଇଥାଏ।
୧୯୨୦ ଦଶକରେ ଆଫ୍ରିକାରେ ଏହି ରୋଗ ପ୍ରଥମେ ଦେଖାଯାଇଥିଲା। ଏହି ରୋଗରେ ମୃତ୍ୟୁ ହାର ଶତପ୍ରତିଶତ ପାଖାପାଖି ଅଛି ଏବଂ ଏପର୍ଯ୍ୟନ୍ତ ଏହି ଜ୍ୱରର କୌଣସି ଉପଶମ ନାହିଁ। ଏହାର ସଂକ୍ରମଣକୁ ରୋକିବା ପାଇଁ ଏକମାତ୍ର ଉପାୟ ହେଉଛି ଆକ୍ରାନ୍ତ ପ୍ରାଣୀମାନଙ୍କୁ ହତ୍ୟା କରିବା। ଅପରପକ୍ଷରେ, ଯେଉଁମାନେ ଏହି ରୋଗରେ ପୀଡିତ ଘୁଷୁରୀ ମାଂସ ଖାଇଥା’ନ୍ତି, ସେମାନଙ୍କଠାରେ ଜ୍ୱର, ଅବସାଦ ଭଳି କେତେକ ଗମ୍ଭୀର ସମସ୍ୟା ଆରମ୍ଭ ହୋଇଥାଏ।
ଗଣମାଧ୍ୟମ ରିପୋର୍ଟ ଅନୁଯାୟୀ, ମେ ୨୫ ରେ ପ୍ରକାଶିତ ପଶୁପାଳନ ଏବଂ ପ୍ରାଣୀ ଚିକିତ୍ସା ବିଭାଗର ତଥ୍ୟ ଦର୍ଶାଇଛି ଯେ ମାର୍ଚ୍ଚ ୨୦୨୧ ପରଠାରୁ ଏହି ରୋଗ ରେ ୩୭ ହଜାରରୁ ଅଧିକ ଘୁଷୁରୀଙ୍କର ମୃତ୍ୟୁ ଘଟିଛି। ଆଫ୍ରିକାନ୍ ସ୍ବାଇନ୍ ଫ୍ଲୁ୍ ଯୋଗୁ ଘୁଷୁରୀ ପାଳନ କରିଥିବା ଚାଷୀ ଆର୍ଥିକ କ୍ଷତିର ସମ୍ମୁଖୀନ ହୋଇଛନ୍ତି। ଏହି ରୋଗର ସଂକ୍ରମଣକୁ ରୋକିବା ପାଇଁ ଇତିମଧ୍ୟରେ ୧୪,୧୭୪ ଘୁଷୁରୀଙ୍କୁ ହତ୍ୟା କରାଯାଇଛି।
ଏହି ତଥ୍ୟରେ କୁହାଯାଇଛି ଯେ ଚଳିତ ବର୍ଷ ଫେବୃଆରୀ ମାସରୁ ବର୍ତ୍ତମାନ ସୁଦ୍ଧା ଆଫ୍ରିକାନ୍ ସ୍ବାଇନ୍ ଫ୍ଲୁରେ ୩,୮୯୦ ଘୁଷୁରୀଙ୍କର ମୃତ୍ୟୁ ଘଟିଛି। ସେହିପରି ସଂକ୍ରମଣକୁ ରୋକିବା ଲାଗି ୩,୨୬୪ ଘୁଷୁରୀଙ୍କୁ ହତ୍ୟା କରାଯାଇଛି। ମନ୍ତ୍ରୀ କହିଛନ୍ତି ଯେ ଚାଷୀମାନଙ୍କୁ ହତ୍ୟା କରାଯାଇଥିବା ଘୁଷୁରୀ ପାଇଁ ସରକାରଙ୍କ ପକ୍ଷରୁ କ୍ଷତିପୂରଣ ପ୍ରଦାନ କରାଯାଇଛି। ମିଜୋରାମ, ତ୍ରିପୁରା ଏବଂ ସିକିମରେ ଆଫ୍ରିକାନ୍ ସ୍ବାଇନ୍ ଫ୍ଲୁ ସଂକ୍ରମଣ ଯୋଗୁ ସରକାର ଲୋକଙ୍କୁ ଘୁଷୁରୀ ମାଂସ ଖାଇବାକୁ ବାରଣ କରିଛନ୍ତି।
