ନୂଆଦିଲ୍ଲୀ,୨୪।୪: ମାଷ୍ଟର ବ୍ଲାଷ୍ଟର ସଚିନ୍ ତେନ୍ଦୁଲକରଙ୍କୁ ଶନିବାର ୪୮ ବର୍ଷ ପୂରଣ ହୋଇଛି। ସେ ୧୯୭୩ ଏପ୍ରିଲ୍ ୨୪ରେ ମୁମ୍ବାଇଠାରେ ଜନ୍ମ ଗ୍ରହଣ କରିଥିଲେ। ସଚିନ୍ ତାଙ୍କଠାରୁ ୬ ବର୍ଷ ବୟସ୍କ ଅଞ୍ଜଳିଙ୍କୁ ବିବାହ କରିଥିଲେ। ଅଞ୍ଜଳିଙ୍କ ଜନ୍ମ ୧୯୬୭ ନଭେମ୍ବର ୧୦ରେ ହୋଇଥିଲା। ପ୍ରେମ ବୟସର ତାରତମ୍ୟକୁ ମାନି ନ ଥିଲା। ଶେଷରେ ସଚିନ୍ ଏବଂ ଅଞ୍ଜଳି ୧୯୯୫ ମେ’ ୨୪ରେ ବିବାହ ବନ୍ଧନରେ ଆବଦ୍ଧ ହୋଇଥିଲେ। ସଚିନଙ୍କ ଜୀବନରେ ୨୪ ତାରିଖର ବେଶ୍ ଗୁରୁତ୍ୱ ରହିଛି। ଅଞ୍ଜଳିଙ୍କ ସହିତ ତାଙ୍କର ସାକ୍ଷାତ୍ ୧୯୯୦ ଅଗଷ୍ଟ ୨୪ରେ ମୁମ୍ବାଇ ବିମାନ ବନ୍ଦରରେ ହୋଇଥିଲା। ପରେ ତାଙ୍କ ବିବାହ ମଧ୍ୟ ୨୪ ତାରିଖରେ ହେବା ସହିତ ଭିନ୍ନ ଭିନ୍ନ ମାସର ଏହି ତାରିଖରେ ସେ ବହୁ ରେକର୍ଡ ମଧ୍ୟ କରିଛନ୍ତି। ୧୯୯୦ରେ ଇଂଲଣ୍ଡ ଗସ୍ତରୁ ଭାରତ ଫେରି ପ୍ରଥମେ ଏକ ସେକେଣ୍ଡ ହ୍ୟାଣ୍ଡ୍ ମାରୁତି-୮୦୦ କାର୍ କିଣିଥିଲେ। ତାଙ୍କ ପାଖରେ ଡ୍ରାଇଭିଂ ଲାଇସେନ୍ସ୍ ମଧ୍ୟ ନ ଥିଲା। ତେବେ ପରବର୍ତ୍ତୀ ସମୟରେ ସମୟ ବଦଳିଥିଲା। ସଚିନ୍ଙ୍କ ପାଖରେ ବିଳାସପୂର୍ଣ୍ଣ ଗାଡିର ଲାଇନ୍ ଲାଗି ଯାଇଥିଲା ବୋଲି ତାଙ୍କ ବନ୍ଧୁ ସୁନୀଲ ସଚିନ୍ଙ୍କ ସହିତ ବାନ୍ଦ୍ରାର ସାହିତ୍ୟ ସହବାସ କଲୋନୀରେ ବିତାଇ ଥିବା ପୁରୁଣା ଦିନକୁ ମନେ ପକାଇ ଏକ ସାକ୍ଷାତ୍କାରରେ କହିଥିଲେ।
