ନୂଆଦିଲ୍ଲୀ,୧୯।୨: ଆଇପିଏଲ୍ ନିଲାମର କିଛି ମିନିଟ ମଧ୍ୟରେ କୋଟିପତି ହୋଇଥିଲେ ଚେତନ ସାକାରିୟା। ତାଙ୍କର ବେସ୍ ପ୍ରାଇସ୍ ୨୦ ଲକ୍ଷ ଟଙ୍କା ଥିବା ବେଳେ ରାଜସ୍ଥାନ ରୟାଲ୍ସ ଟିମ୍ ତାଙ୍କୁ ୧.୨୦ କୋଟି ଟଙ୍କାରେ କ୍ରୟ କରିଥିଲା। ଭାବନଗର ଜିଲାର ଏକ ସାଧାରଣ ପରିବାରରୁ ଆସିଥିବା ଚେତନଙ୍କ ପାଇଁ ଏହା ବେଶ ଉତ୍ସାହର କ୍ଷଣ ଥିଲା। ହେଲେ ସେ ପ୍ରତିକ୍ରିୟା ଦେଇ ଦୁଃଖି ଥିବା କହିଛନ୍ତି।
ଚେତନ କହିଛନ୍ତି, ଗତ ମାସରେ ସାନ ଭାଇ ରାହୁଲ ଆତ୍ମହତ୍ୟା କରିନେଇଥିଲେ। ସେତେବେଳେ ମୁଁ ଘରେ ନ ଥିଲି। ସୟଦ ମୁସ୍ତାକ ଅଲୀ ଟ୍ରଫିର ମ୍ୟାଚ୍ ଖେଳିବାକୁ ଯାଇଥିଲି। ଘରକୁ ଆସିବା ପର୍ଯ୍ୟନ୍ତ ମୋତେ ସେ ବିଷୟରେ କେହି କହି ନ ଥିଲେ। ଏପରିକି ତାଙ୍କ ବିଷୟରେ ପଚାରିଲେ ସେ ବାହାରକୁ ଯାଇଥିବା କହୁଥିଲେ। ପରେ ସତ ଜାଣିବା ପରେ ତାଙ୍କୁ ଧକ୍କା ଲାଗିଛି। ଜୀବନରେ ଏକ ଖାଲିପଣ ସୃଷ୍ଟି ହୋଇଛି। ଆଇପିଏଲ୍ରେ ୧.୨ କୋଟି ଟଙ୍କା ମିଳିବ ବୋଲି ଆଶା କରି ନ ଥିଲି। ଏଥିରେ ଜୀବନରେ ପରିବର୍ତ୍ତନ ନିଶ୍ଚୟ ଆସିବ। ହେଲେ ଏହି ଖୁସି ଭାଇଙ୍କ ବିନା ଅସମ୍ପୂର୍ଣ୍ଣ ଲାଗୁଛି। ସେ ଥିଲେ ବହୁତ ଖୁସି ହୋଇଥାନ୍ତେ ସେ କହିଛନ୍ତି।
ତେବେ ଚେତନଙ୍କ ଜୀବନ ସେତେଟା ସହଜ ନ ଥିଲା। ଗୁଜରାଟ ସ୍ଥିତ ଭାବନଗରରୁ ୧୦ କିମି ଦୂରରେ ଥିବା ବର୍ତେଜ ସହରରେ ଅଟୋ ଚଳାଇ ପରିବାର ଚଳାଉଥିଲେ ଚେତନଙ୍କ ବାପା। ୫ ବର୍ଷ ପୂର୍ବେ ତାଙ୍କ ଘରେ ଗୋଟିଏ ଟିଭି ନ ଥିଲା। ସେ ମ୍ୟାଚ୍ ଦେଖିବାକୁ ବନ୍ଧୁଙ୍କ ଘରକୁ ଯାଉଥିଲେ ନଚେତ ଟିଭି ଶୋ’ରୁମ୍ ବାହାରେ ଛିଡ଼ା ହେଉଥିଲେ।
ଅଷ୍ଟ୍ରେଲିୟ କିମ୍ବଦନ୍ତୀ ଗ୍ଲେନ ମ୍ୟାକ୍ଗ୍ରାଙ୍କ ଅଧିନରେ ସେ ଏମ୍ଆର୍ଏଫ୍ ପେସ୍ ଏକାଡେମୀରେ ଟ୍ରେନିଂ ନେଇଛନ୍ତି। ଏହାଛଡ଼ା ୟୁଏଇରେ ଖେଳାଯାଇଥିବା ଆଇପିଏଲ୍ ୨୦୨୦ରେ ସେ ନେଟ୍ ବୋଲର୍ ଭାବେ ଆର୍ସିବି ସହ ଜଡ଼ିତ ହୋଇଥିଲେ। ଏଣୁ ନିଲାମରେ ଆର୍ସିବି ତାଙ୍କୁ କିଣିବାକୁ ଇଚ୍ଛା ରଖିଥିଲା। ହେଲେ ରାଜସ୍ଥାନ ରୟାଲ୍ସ ତାଙ୍କୁ କିଣିବାରେ ସଫଳ ହୋଇଛି।
ଆଇପିଏଲ ଲାଗି ଚୟନ ହେବା ପରେ ସାକାରିୟାଙ୍କ ଘରେ ଅତିଥିଙ୍କ ଭିଡ ଲାଗି ରହିଥିବା ବେଳେ ଗୋଟିଏ ପରେ ଗୋଟିଏ ଫୋନ୍ କଲ୍ ତାଙ୍କୁ ଆସୁଛି। ଏକଦା ପୁଅ ସରକାରୀ ଚାକିରି କରୁ ବୋଲି ଚାହୁଁଥିବା ବାପା ମଧ୍ୟ ଖୁସି ଥିବା ସେ କହିଛନ୍ତି।
