ଓଭାଲ,୨।୯: ଇଂଲଣ୍ଡ ବିପକ୍ଷରେ ଏଠାରେ ଗୁରୁବାର ଠାରୁ ଆରମ୍ଭ ହୋଇଥିବା ଚତୁର୍ଥ ଟେଷ୍ଟର ପ୍ରଥମ ଇନିଂସରେ ଭାରତ ୧୯୧ ରନ୍ରେ ଅଲଆଉଟ୍ ହୋଇଯାଇଛି। ପୂର୍ବ ମ୍ୟାଚ୍ ଭଳି ଏଥର ମଧ୍ୟ ପୂରା ଫେଲ୍ ମାରିଥିଲା ଟପ୍ ଅର୍ଡର। କେବଳ ଅଧିନାୟକ ବିରାଟ କୋହଲି(୫୦) ଖେଳିଥିଲେ ଅର୍ଦ୍ଧଶତକୀୟ ଇନିଂସ। ଗୋଟିଏ ପରେ ଗୋଟିଏ ଉଇକେଟ ଯେଉଁ ଭଳି ପଡ଼ୁଥିଲା ଲାଗୁଥିଲା ଟିମ୍ ଇଣ୍ଡିଆ ୧୫୦ ଅତିକ୍ରମ କରିପାରିବ ନାହିଁ। ଦଳ ଏକଦା ୧୨୭ ରନ୍ ମଧ୍ୟରେ ୭ ଉଇକେଟ ହରାଇ ସାରିଥିଲା। କିନ୍ତୁ ଶାର୍ଦ୍ଦୁଳ ଠାକୁରଙ୍କ ବିସ୍ଫୋରକ ଅର୍ଦ୍ଧଶତକ ଯୋଗୁ ୧୯୧ ରନ୍ କରିବାକୁ ସକ୍ଷମ ହୋଇଥିଲା ଟିମ୍ ଇଣ୍ଡିଆ। ଶାର୍ଦ୍ଦୁଳ ୩୬ ବଲର ସମ୍ମୁଖୀନ ହୋଇ ୧୫୮ ଷ୍ଟ୍ରାଇକରେଟ୍ରେ ଖେଳିଥିଲେ ୫୭ ରନ୍ର ଇନିଂସ। ତାଙ୍କ ପାଳିରେ ସାମିଲ ଥିବା ୭ ଚୌକା ଓ ୩ ଛକା। ବୋଲିଂରେ କ୍ରିସ ଓ୍ବକ୍ସ ୪ ଓ ଓଲି ରବିନସନ ୩ ଉଇକେଟ ନେଇଥିଲେ।
