ଲିଡ୍ସ,୨୫।୮ : ଲୋକେଶ ରାହୁଲ, ରୋହିତ ଶର୍ମା, ବିରାଟ କୋହଲି, ଚେତେଶ୍ୱର ପୂଜାରା, ଅଜିଙ୍କ୍ୟ ରାହାନେଙ୍କ ଭଳି ତାରକା ଖଚ୍ଚିତ ଭାରତୀୟ ବ୍ୟାଟିଂ ଲାଇନଅପ୍ ଫେଲ୍ ମାରିଛି। କେବଳ ଦୁଇ ବ୍ୟାଟ୍ସମ୍ୟାନଙ୍କୁ ଛାଡ଼ି ଦେଲେ ଦୁଇ ଅଙ୍କ ସ୍କୋର ଛୁଇଁ ପାରି ନ ଥିଲେ ଅନ୍ୟ କୌଣସି ଖେଳାଳି। ଫଳରେ ଇଂଲଣ୍ଡ ବିପକ୍ଷ ତୃତୀୟ ଟେଷ୍ଟର ପ୍ରଥମ ଇନିଂସରେ ମାତ୍ର ୭୮ ରନ୍ରେ ଅଲଆଉଟ୍ ହୋଇଯାଇଛି ଟିମ୍ ଇଣ୍ଡିଆ।
ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିବା ଭାରତୀୟ ଦଳକୁ ଆରମ୍ଭରୁ ୩ ଝଟ୍କା ଦେଇଥିଲେ ଇଂଲଣ୍ଡର ଅଭିଜ୍ଞ ପେସର ଜେମ୍ସ ଆଣ୍ଡରସନ। ଐତିହାସିକ ଲଡର୍ସ ଟେଷ୍ଟରେ ଶତକ ହାସଲ କରିଥିବା ରାହୁଲ ଖାତା ଖୋଲି ପାରି ନ ଥିଲେ। ପୂଜାରା ୧ ଓ ୭ ରନ୍ କରି ଆଉଟ୍ ହୋଇଥିଲେ ଅଧିନାୟକ କୋହଲି। ଏହାପରେ ସ୍ଥିତି ସମ୍ଭାଳିବାକୁ ଚେଷ୍ଟା କରିଥିଲେ ରୋହିତ ଓ ରାହାନେଙ୍କ ଯୋଡ଼ି। କିନ୍ତୁ କିଛି ଖାସ କରି ପାରି ନ ଥିଲେ ଦୁହେଁ। ରାହାନେ (୧୮)ଙ୍କ ପଛେ ପଛେ ଦଳର ସମସ୍ତ ବ୍ୟାଟ୍ସମ୍ୟାନ ପ୍ୟାଭିଲିୟନ ଫେରି ଯାଇଥିଲେ। କ୍ରିଜ୍ରେ ଦୀର୍ଘ ସମୟ ଧରି ଛିଡ଼ା ହୋଇଥିବା ରୋହିତ (୧୯) ମଧ୍ୟ ଫେଲ୍ ମାରିବାରୁ ଟିମ୍ ଇଣ୍ଡିଆ ୭୮ ରନ୍ରେ ସୀମିତ ରହିଛି। ଆଣ୍ଡରସନ ଏବଂ କ୍ରେଗ ଓଭରଟନ ୩ , ଓଲି ରବିନସନ ଓ ସାମ କୁରାନ ୨ ଉଇକେଟ ଲେଖାଏ ସଫଳତା ହାତେଇଥିଲେ।
