କାନପୁର,୨୫ ।୧୨: ଉତ୍ତର ପ୍ରଦେଶ କାନପୁରର ଜଣେ ବ୍ୟବସାୟୀଙ୍କ ଘରେ ଡିଜିଜିଆଇ ଦ୍ୱାରା ରେଡ କରାଯିବା ପରେ ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି । ପରଫ୍ୟୁମ ଓ କମ୍ପାଉଣ୍ଡ ଟ୍ରେଡର ପିୟୁଷ ଜୈନ ନାମକ ବ୍ୟବସାୟୀଙ୍କ ଘରେ ଆୟକର ବିଭାଗ ପକ୍ଷରୁ ରେଡ କରାଯିବା ପରେ ପୁଳା ପୁଳା ଟଙ୍କା ମିଳିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି । ଦୀର୍ଘ ୪୦ ଘଣ୍ଟା ମଧ୍ୟରେ ୧୩ଟି ମେଶିନ୍ ଲାଗି ଟଙ୍କା ଗଣାଯାଇଥିବା ବେଳେ ୧୭୯ କୋଟି ଟଙ୍କା ୮୦ଟି ବାକ୍ସରେ ଭର୍ତ୍ତି ହୋଇ ଷ୍ଟେଟବ୍ୟାଙ୍କର ମୁଖ୍ୟ ଶାଖାକୁ ପଠାଯାଇଛି । ଏତିକିରେ କଥା ସରିନି । ବିଳମ୍ବିତ ରାତି ପର୍ଯ୍ୟନ୍ତ ଗଣାଯାଇଥିବା ଟଙ୍କାର ମୂଲ୍ୟ ୧୭୯ କୋଟି ବୋଲି ଜଣାପଡିଛି । କେବଳ ସେତିକି ନୁହେଁ ଉକ୍ତ ବ୍ୟବସାୟୀଙ୍କ ଘରୁ କୋଟି ଖୋଟି ଟଙ୍କାର ଗହଣା ମଧ୍ୟ ଜବତ କରାଯାଇଛି । ପିୟୁଷଙ୍କ କନୌଜ ସ୍ଥିତ ଘରୁ ୧ କୋଟି ଟଙ୍କାରୁ ଊର୍ଦ୍ଧ୍ୱ ମୂଲ୍ୟର ଗହଣା ଜବତ କରାଯାଇଛି । ଶୁକ୍ରବାର ବିଳମ୍ବିତ ରାତିରେ ପିୟୁଷଙ୍କ କନୌଜ ସ୍ଥିତ ଘରେ ଚଢାଉ କରାଯାଇଥିଲା । ଆଲମିରା ଚାବି ନ ମିଳିବାରୁ ଏହାକୁ ଭାଙ୍ଗି ଦିଆଯାଇଥିଲା । ସେଠାରୁ ୪ କୋଟି ଟଙ୍କା ଓ ୧କୋଟିରୁ ଊର୍ଦ୍ଧ୍ୱ ମୂଲ୍ୟର ଗହଣା ମିଳିଥିବା ସୂଚନା ରହିଛି । ପିୟୁଷଙ୍କ ଆନନ୍ଦପୁରୀ ବାସଭବନର ପାଚେରୀରୁ ବିଡା ବିଡା ଟଙ୍କା ମିଳିଥିବା ସୂଚନା ମିଳିଛି । ବୁଧବାର ପିୟୁଷଙ୍କ ଘରେ ଚଢାଉ କରାଯାଇଥିବା ବେଳେ କିଛି ଆଲମିରା ବନ୍ଦଥିଲା ଓ ଏହାର ଚାବି ନ ମିଳିବାରୁ ଡୁପ୍ଲିକେଟ ଚାବି ମାଧ୍ୟମରେ ଆଲମିରା ଖୋଲାଯାଇ ଶୁକ୍ରବାର ଟଙ୍କା ଗଣତି କରାଯାଇଥିଲା ।
