ଭୁବନେଶ୍ୱର, ୧।୭: (କ୍ରୀଡ଼ା ପ୍ରତିନିଧି)- ସ୍ବ୍ରିଣ୍ଟ କୁଇନ୍ ଦୂତୀ ଚାନ୍ଦ ଯାହା ଆଶା କରୁଥିଲେ ତାହା ହେଲା। ଯୋଗ୍ୟତା ଟାଇମିଂ ନ ହେଲେବି ବିଶ୍ୱ ର଼୍ୟାଙ୍କିଙ୍ଗ ଅନୁସାରେ ତାଙ୍କୁ ଟୋକିଓ ଅଲିମ୍ପିକ୍ସର ୧୦୦ ଓ ୨୦୦ ମିଟରରେ ଅଂଶଗ୍ରହଣ କରିବା ପାଇଁ ସୁଯୋଗ ମିଳିଛି। କ୍ରମାଗତ ଦ୍ୱିତୀୟ ଥରପାଇଁ ଅଲିମ୍ପିକ୍ସରେ ଭାଗ ନେବାକୁ ଯାଉଥିବାରୁ ଉଲ୍ଲସିତ ହୋଇ ପଡ଼ିଛନ୍ତି ଏହି ଓଡ଼ିଆ ଆଥଲେଟ୍। ଇଣ୍ଡିଆନ ଗାଁ ପ୍ରିର ୧୦୦ ମିଟରରେ ସେ ୧୧.୧୭ ସେକେଣ୍ଡ ସମୟ ନେଇ ଅଲିମ୍ପିକ୍ସ ଯୋଗ୍ୟତାଠାରୁ ମାତ୍ର ୨ ସେକେଣ୍ଡ ଦୂରରେ ରହି ଯାଇଥିଲେ। ମାତ୍ର ଅଲିମ୍ପିକ୍ସରେ ୧୧.୧୦ ସେକେଣ୍ଡ ତାଙ୍କର ଟାର୍ଗେଟ ରହିବ। ଏହା ହୋଇପାରିଲେ ସେ ଅତିକମ୍ରେ ସେମିଫାଇନାଲ ପର୍ଯ୍ୟନ୍ତ ଯାଇପାରିବେ। ଫଳରେ ଫାଇନାଲରେ ପ୍ରବେଶ କରିବାର ସୁଯୋଗ ରହିବ ବୋଲି ସମ୍ପ୍ରତି ପଟିଆଲାରେ ଟ୍ରେନିଂ ଜାରି ରଖିଥିବା ଦୂତୀ ପ୍ରକାଶ କରିଛନ୍ତି। ଟୋକିଓରେ ଭଲ ଟ୍ରାକ୍ ମିଳିବ। ମୁଁ ସେତେବେଳକୁ ମାଂଶପେଶୀ ସମସ୍ୟାରୁ ମଧ୍ୟ ମୁକୁଳି ସାରିଥିବି। ତେଣୁ ନିଶ୍ଚିତ ଭଲ ପ୍ରଦର୍ଶନ ନେଇ ଆଶାବାଦୀ ଅଛି ବୋଲି ସେ କହିଛନ୍ତି। ଅଲିମ୍ପିକ୍ସରେ ୧୧ ସେକେଣ୍ଡରୁ କମ୍ ସମୟ ମଧ୍ୟରେ ରେସ୍ ଫିନିଶ୍ କରିବା ଦକ୍ଷତା ରଖିଥିବା ଆଥଲେଟ୍ ମଧ୍ୟ ରହିବେ। ତେଣୁ ତାଙ୍କ ସହିତ ପ୍ରତିଦ୍ୱନ୍ଦ୍ୱିତା କଲେ ନିଶ୍ଚିତ ପ୍ରଦର୍ଶନରେ ଉନ୍ନତି ଆସିବ ବୋଲି ସେ ଆଶାବ୍ୟକ୍ତ କରିଛନ୍ତି। ତାଙ୍କ ଅସୁବିଧା ସମୟରେ ସମର୍ଥନ ଯୋଗାଇ ଦେଇଥିବାରୁ ଦୂତୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କିଟ୍ ଓ କିସ୍ର ପ୍ରତିଷ୍ଠାତା ଅଚ୍ୟୁତ ସାମନ୍ତ, ନିଜ ପରିବାର ବର୍ଗ ବିଶେଷ କରି ତାଙ୍କୁ ଟ୍ରାକ୍କୁ ଆଣିଥିବା ବଡ଼ ଭଉଣୀ ସରସ୍ବତୀ ଚାନ୍ଦ, ଆଥଲେଟିକ୍ ଫେଡେରେଶନ ଅଫ୍ ଇଣ୍ଡିଆ, ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ, କ୍ରୀଡ଼ା ମନ୍ତ୍ରୀ କିରେନ ରିଜିଜୁ, ପୁଲେଲା ଗୋପିଚାନ୍ଦ, କୋଚ୍ ନାଗାପୁରୀ ରମେଶ, ଶିବପ୍ରସାଦ ମିଶ୍ର, ଓଡ଼ିଶା ଅଲିମ୍ପିକ୍ ଆସୋସିଏଶନ ପ୍ରମୁଖ ସମସ୍ତଙ୍କୁ ଧନ୍ୟବାଦ ଜଣାଇଛନ୍ତି।
