ଭୁବନେଶ୍ୱର, ୨୪।୭(ସୁନିତ୍ ମିଶ୍ର): ବିଧାନସଭା ଅଧିବେଶନରେ କେଉଁଦିନ କ’ଣ ସବୁ ପ୍ରସଙ୍ଗକୁ ନେଇ ସରକାରୀ ଦଳକୁ ଟାର୍ଗେଟ କରାଯିବ ସେଥିଲାଗି ପ୍ରତ୍ୟେକ ଦିନ କଂଗ୍ରେସ ପକ୍ଷରୁ ନିଷ୍ପତ୍ତି ହେବ। ତେଣୁ ପ୍ରତିଦିନ କଂଗ୍ରେସର ବିଧାୟକ ଦଳ ବୈଠକ ସକାଳ ସାଢ଼େ ୯ଟାରୁ ୧୦ ମଧ୍ୟରେ ବସିବ ବୋଲି ବିଧାୟକ ଦଳ ନେତା ରାମଚନ୍ଦ୍ର କାଡାମ କହିଛନ୍ତି। ତେବେ ମଙ୍ଗଳବାର ମଧ୍ୟ ସମାନଭାବେ ବିଧାୟକ ଦଳ ବୈଠକ ଅନୁଷ୍ଠିତ ହୋଇଯାଇଛି। ହେଲେ ଏଥିରେ ଦଳର ବରିଷ୍ଠ ବିଧାୟକ ତାରାପ୍ରସାଦ ବାହିନୀପତି ଯୋଗଦେଇ ନ ଥିବା କାଡାମ କହିଛନ୍ତି। ସେ କହିଛନ୍ତି, ତାରାବାବୁ ବିଧାୟକ ଦଳ ବୈଠକକୁ ଆସି ନ ଥିଲେ, ହେଲେ ଗୃହକୁ ଆସୁଛନ୍ତି।
ଅନ୍ୟପଟେ ବିଧାୟକ ଦଳ ବୈଠକରେ ଯୋଗଦେଉ ନ ଥିବା ନେଇ ତାରାଙ୍କୁ ପଚାରିବାରୁ ସେ କହିଛନ୍ତି, ସବୁଦିନ ବିଧାୟକ ଦଳ ବୈଠକ ବସୁଛି ବୋଲି ସେ ଜାଣିନାହାନ୍ତି। ଗୃହକୁ ଯାଉଛନ୍ତି ଏବଂ କଂଗ୍ରେସ ତରଫରୁ ଯେଉଁସବୁ ପ୍ରସଙ୍ଗ ଉଠାଯିବା କଥା ଉଠାଉଛନ୍ତି ବୋଲି ତାରା କହିଛନ୍ତି। ସୂଚନାଯୋଗ୍ୟ, ବିଧାୟକ ଦଳ ନେତା ପଦକୁ ନେଇ ତାରା ଏବଂ କାଡାମଙ୍କ ନାଁ ଚର୍ଚ୍ଚାରେ ରହିଥିଲା। ବରିଷ୍ଠତା ଦୃଷ୍ଟିରୁ ଦେଖାଗଲେ ତାରା ସବୁଠାରୁ ଆଗରେ ରହିବା କଥା। ହେଲେ ଅଖିଳ ଭାରତ କଂଗ୍ରେସ କମିଟି(ଏଆଇସିସି) ୩ ଥରର ବିଧାୟକ କାଡାମଙ୍କ ନଁା ବିଧାୟକ ଦଳ ନେତା ଭାବେ ଘୋଷଣା କରିଛି; ଯାହାକୁ ନେଇ ତାରା ଅସନ୍ତୁଷ୍ଟ ଥିବା ଚର୍ଚ୍ଚା ହେଉଛି। ଏଥିଲାଗି ବିଧାୟକମାନଙ୍କ ମଧ୍ୟରେ ସମନ୍ବୟ ଅଭାବ ରହିଥିବା ଜଣେ ବିଧାୟକ ନିଜ ନାମ ଗୋପନ ରଖି କହିଛନ୍ତି।
