କୋକସରା,୮।୧୨(ଡି.ଏନ୍.ଏ.): ୨୬ ନମ୍ବର ଜାତୀୟ ରାଜପଥ କଳାହାଣ୍ଡି ଜିଲା ନବରଙ୍ଗପୁର ସୀମାନ୍ତ ଆମପାଣି ଘାଟିରେ ଗୁରୁବାର ଏକ ପେଟ୍ରୋଲ ବୋଝେଇ ଟ୍ୟାଙ୍କର ଓଲଟି ପଡିଛି। ପାରାଦ୍ୱୀପରୁ ବୋରିଗୁମ୍ମା ଯାଉଥିବା ବେଳେ ଘାଟି ବୁଲାଣିରେ ଟ୍ୟାଙ୍କର(ନଂ.ଓଡି-୭୮୪୬) ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ପେଟ୍ରୋଲ ଏବଂ ଡିଜେଲ ଲିକ୍ ହେବାରୁ ସୁରକ୍ଷା ଦୃଷ୍ଟିରୁ ଆମପାଣି ପୋଲିସ, କୋକସରା ଅଗ୍ନିଶମ ବିଭାଗ କର୍ମଚାରୀ ପହଞ୍ଚି ରାସ୍ତା ଅବରୋଧ କରି ଗାଡ଼ି ଚଳାଚଳକୁ ବନ୍ଦ କରାଯାଇଥିଲା। ଗାଡ଼ି ଡ୍ରାଇଭର ଶଙ୍କର ଚୌହାନ ଆହତ ହୋଇଥିବା ଜଣାପଡିଛି।
ଗୁରୁବାର ମଧ୍ୟାହ୍ନରେ ଏହି ଦୁର୍ଘଟଣା ଘଟିଥିବା ବେଳେ ସ୍ଥାନୀୟ ଆମପାଣି ପୋଲିସ ଏନେଇ ଜିଲା ପ୍ରଶାସନକୁ ଖବର ଦେଇଥିଲା। ଘଟଣାସ୍ଥଳରେ ଧର୍ମଗଡ଼ ଉପ ଜିଲାପାଳ ବେଦ ଭୂଷଣ, ଧର୍ମଗଡ଼ ଏସ୍ଡିପିଓ ଧିରଜ ଚୋପଦାର, କୋକସରା ତହସିଲଦାର ଦେବବ୍ରତ କରାଟି, ବିଡ଼ିଓ ଉତ୍ତମ କୁମାର ବାଗ, ଡେପୁଟି ଅଗ୍ନିଶମ ଅଧିକାରୀ, ଆମପାଣି ଥାନା ଅଧିକାରୀ ଚତୁର୍ଭୁଜ ନାଏକ, ରେଞ୍ଜର ଧର୍ମଗଡ଼ ଭବାନୀ ଶଙ୍କର କାଉର, ଭାରତ ପେଟ୍ରୋଲିୟମର ସେଲ ଅଫିସର ରାହୁଲ କୁମାର, କୋକସରା ବ୍ଲକ ଉପାଧ୍ୟକ୍ଷ ରାଜୀବ ଅଗ୍ରୱାଲ ଓ ବିଧାୟକ ପ୍ରତିନିଧି ମାନସ ରଞ୍ଜନ ବାଗ, ସରପଞ୍ଚ ପ୍ରତିନିଧି ମନୋରଞ୍ଜନ ବାଣୁଆ ପହଞ୍ଚି ସ୍ଥିତି ଅନୁଧ୍ୟାନ କରି ଟ୍ରାଫିକ ବ୍ୟବସ୍ଥା ସ୍ବଭାବିକ କରିବାକୁ ପାଇଁ ଉଦ୍ୟମ ଆରମ୍ଭ କରିଥିଲେ। ଓଲଟି ପଡିଥିବା ଟ୍ୟାଙ୍କରରେ ୪ ହଜାର ଲିଟର ଡିଜେଲ ଏବଂ ୮ ହଜାର ଲିଟର ପେଟ୍ରୋଲ ରହିଛି। ଅନ୍ୟପକ୍ଷେ ଡିଜେଲ, ପେଟ୍ରୋଲ ଲିକ୍ ହୋଇ ରାସ୍ତାରେ ନିର୍ଗତ ହେବାରୁ ସତର୍କ ଦୃଷ୍ଟିରୁ ଦୁର୍ଘଟଣା ସ୍ଥାନର ଦୁଇପଟୁ ଯାନବାହନ ସହ ଲୋକଙ୍କ ଯାତାୟାତକୁ ବାରଣ କରାଯାଇଛି। ହେଲେ ବର୍ତ୍ତମାନ ସୁଦ୍ଧା ଉଦ୍ଧାର କାର୍ଯ୍ୟ ଜାରି ରହିଛି।
