ବାରିପଦା ଅଫିସ,୧୭ା୧୨: ଓଡ଼ିଆ ସିନେ ତାରକା ତଥା କେନ୍ଦ୍ରାପଡ଼ା ଏମ୍ପି ଅନୁଭବ ମହାନ୍ତିଙ୍କ ଏକ ବରବେଶ ଫଟୋ ଓ ଭିଡିଓକୁ ନେଇ ଚର୍ଚ୍ଚା ଜୋର ଧରିଛି। ତେବେ ଏହା ରିଲ୍ ନା ରିୟଲ ତାହାକୁ ନେଇ ଅନୁଭବ ଓ ବର୍ଷା ପ୍ରିୟଦର୍ଶିନୀଙ୍କ ଶୁଭେଚ୍ଛୁମାନେ ଆଶଙ୍କା ପ୍ରକାଶ କରିଛନ୍ତି ା ଦୀର୍ଘ ଦିନ ଧରି ବର୍ଷା-ଅନୁଭବ ବିବାଦ ଲାଗି ରହିଥିବା ବେଳେ ଏଭଳିି ଫଟୋ ଓ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି।
ତେବେ ଏହି ଫଟୋ ଓ ଭିଡିଓ ଓଡ଼ିଆ ଫିଲ୍ମ ‘ଲଭ୍ ଇନ୍ ଲଣ୍ଡନ’ର ଦୃଶ୍ୟ। ଏହି ସିନେମାର ଏକ ଗୀତର କିଛି ଅଂଶ ସୁଟିଂ ବାରିପଦାରେ ଚାଲିଥିଲା। ବିବାହ ମଣ୍ଡପରେ ବାହାଘରର ସାଜସଜ୍ଜା ହୋଇଥିବା ବେଳେ ବନ୍ଧୁବାନ୍ଧବଙ୍କ ଗହଳି ଲାଗି ରହିଥିଲା। ସୁନ୍ଦର ସାଜସଜ୍ଜା ସହ ଏକ ବର୍ଣ୍ଣାଢ୍ୟ ପରିବେଶରେ ଏହାର ସୁଟିଂ କରାଯାଇଛି। ଉକ୍ତ ଫିଲ୍ମର ନିର୍ଦ୍ଦେଶନା ଦେଇଛନ୍ତି ମୟୂରଭଞ୍ଜ ଜିଲା ଖୁଣ୍ଟା ଅଞ୍ଚଳର ତାପସ ସରଘରିଆ ା କଳାର ସହର ବାରିପଦା ସ୍ଥିତ ରଘୁନାଥପୁର ଅଞ୍ଚଳରେ ଥିବା ସୁଭଦ୍ରା ବିବାହ ମଣ୍ଡପରେ ଏହି ଗୀତର ସୁଟିଂ କରାଯାଇଛି। ମୁଖ୍ୟ ଅଭିନେତା ଅନୁଭବ ମହାନ୍ତି, ନବାଗତା ଅଭିନେତ୍ରୀ ସୌମ୍ୟା, ପୁଷ୍ପା ପଣ୍ଡା ପ୍ରମୁଖ କଳାକାରମାନେ ଉପସ୍ଥିତ ଥିଲେ। ସୁଟିଂ ସେଟ୍ରେ ଫିଲ୍ମ ପ୍ରଯୋଜକ ଶୁଭେନ୍ଦୁ ସାହୁ, ସଞ୍ଜୀବ ଦ୍ୱିବେଦୀଙ୍କ ସହ ମୟୂରଭଞ୍ଜର ଅନେକ କଳାକାର ଓ ଟେକ୍ନିସିଆନ ଉପସ୍ଥିତ ଥିବା ଦେଖିବାକୁ ମିଳିଥିଲା।
