କାବୁଲ,୨୨ ।୧୧: ପୁଣିଥରେ ପଦାକୁ ଆସିଛି ତାଲିବାନର ଅସଲ ଚେହେରା । ଆଫଗାନିସ୍ତାନରେ ଶାସନ ଭାର ନେଇଥିବା ତାଲିବାନ ଏବେ ତା’ର ମନମୁଖି ଶାସନ ଆରମ୍ଭ କରିଛି । ବିଶେଷ କରି ତାଲିବାନ ଶାସନରେ ଯାହା ଅନୁମାନ କରାଯାଉଥିଲା ତାହା ଦେଖିବାକୁ ମିଳୁଛି । ତାଲିବାନ ଶାସନରେ ମହିଳା ଓ ଶିଶୁଙ୍କ ମାନବାଧିକାରକୁ ସମ୍ପୂର୍ଣ୍ଣ ଭାବେ ଲୋପ କରି ଦେବାଭଳି କାର୍ଯ୍ୟ ହେଉଛି । ପ୍ରଥମେ କର୍ମଜୀବି ମହିଳାଙ୍କୁ ଘରେ ରହିବାକୁ ତାଲିବାନ ସରକାର କହିଥିବା ବେଳେ ଏବେ ଟେଲିଭିଜନ ଚ୍ୟାନେଲର ନାଟକରେ ମହିଳାମାନେ ଅଭିନୟ କରି ପାରିବେ ନାହିଁ ବୋଲି କହିଛି ତାଲିବାନ । ଏମିତିକି ରିପୋଟର୍ସ ଓ ପ୍ରେଜେଣ୍ଟରମାନେ ଟେଲିଭିଜନ ସ୍କ୍ରିନରେ ଆସିବା ସମୟରେ ହେଡ ସ୍କାର୍ଫ ବ୍ୟବହାର କରିବାକୁ ନିର୍ଦ୍ଦେଶ ଦିଆଯାଇଛି । ଏଥିରେ ମହିଳାଙ୍କ ସ୍ୱାଧିନତା କ୍ଷୁର୍ଣ୍ଣ ହେଉଛି ବୋଲି ଆଲୋଚନା ହେଉଛି । ତାଲିବାନ ପକ୍ଷରୁ ନିକଟରେ ଜାରି କରାଯାଇଥିବା ନିର୍ଦ୍ଦେଶରେ ୮ଟି ପ୍ରତିବନ୍ଧକ ଲଗାଯାଇଛି । ଏମିତିକି ସ୍କୁଲ ଯାଉଥିବା ଛାତ୍ରିମାନଙ୍କୁ ସ୍କୁଲ ଯିବାକୁ ମନା କରାଯିବା ସହ କର୍ମଜୀବିଙ୍କୁ ଚାକିରି ଛାଡି ଘରେ ରହିବାକୁ କହିଛି ତାଲିବାନ । ବିଶ୍ୱର ଏକମାତ୍ର ଦେଶଭାବେ ତାଲିବାନ ସମ୍ପୂର୍ଣ୍ଣ ଜନସଂଖ୍ୟାର ଅଧା ଲୋକଙ୍କୁ ଶିକ୍ଷତ ହେବାରୁ ବଞ୍ଚିତ କରିଛି ।
