ଇସଲାମବାଦ,୫।୩: ୨୦୨୬ ମସିହାରେ ପାକିସ୍ତାନ କ୍ରିକେଟ ଦଳର ଟି-୨୦ ବିଶ୍ୱକପ ବିପର୍ଯ୍ୟୟଜନକ ଥିଲା, ଯାହା ଫଳରେ ଖେଳାଳିମାନେ ସମାଲୋଚନାର ଶିକାର ହୋଇଥିଲେ। ପାକିସ୍ତାନ କ୍ରିକେଟ ବୋର୍ଡ ଖେଳାଳିମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ମଧ୍ୟ ନେଇଛି। ଏସବୁ ମଧ୍ୟରେ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି। ପାକିସ୍ତାନ ଦଳ ତାର ସମସ୍ତ ମ୍ୟାଚ ଶ୍ରୀଲଙ୍କାରେ ଖେଳିଥିଲା। ଟିମ ହୋଟେଲରେ ଥିବାବେଳେ ଏପରି ଏକ ଘଟଣା ଘଟଥିଲା, ଯାହା ଫଳରେ ପାକିସ୍ତାନ ଦଳର ପରିଚାଳକ ନାଭିଦ ଚିମା କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ।
ଶ୍ରୀଲଙ୍କାରେ ଜଣେ ପାକିସ୍ତାନୀ ଖେଳାଳି ହୋଟେଲ କର୍ମଚାରୀଙ୍କ ସହ ଖରାପ ବ୍ୟବହାର କରିଥିବା ଅଭିଯୋଗ ହୋଇଛି, ଯାହା ଫଳରେ ତାଙ୍କୁ ଜରିମାନା ଦେବାକୁ ପଡିଛି। ଗଣମାଧ୍ୟମ ରିପୋର୍ଟ ଅନୁଯାୟୀ, ଶ୍ରୀଲଙ୍କାର କାଣ୍ଡିର ଗୋଲଡେନ କ୍ରାଉନ ହୋଟେଲରେ ଏହି ଘଟଣା ଘଟିଛି, ଯେଉଁଠାରେ ବିଶ୍ୱକପ ସମୟରେ ପାକିସ୍ତାନ ଦଳ ରହୁଥିଲା। ଅଭିଯୋଗ ଅନୁଯାୟୀ, ଜଣେ ଖେଳାଳି ମହିଳା ହାଉସକିପିଂ କର୍ମଚାରୀଙ୍କ ସହ ଖରାପ ବ୍ୟବହାର କରିଥିଲେ। ହୋଟେଲ ଅଧିକାରୀମାନେ ଟିମ ମ୍ୟାନେଜର ନାଭିଦ ଚିମାଙ୍କ ନିକଟରେ ଅଭିଯୋଗ କରିଥିଲେ। ପରିଚାଳକ ଖେଳାଳିଙ୍କୁ ଜରିମାନା କରିଥିଲେ ଏବଂ ହୋଟେଲ ପରିଚାଳନାକୁ କ୍ଷମା ମାଗିଥିଲେ।
