ଭୁବନେଶ୍ୱର,୪।୫(ବ୍ୟୁରୋ): ଖାରବେଳନଗର ଥାନା ଅନ୍ତର୍ଗତ ରାଜକୁମାର ବସ୍ତିରେ ଏକ ଅଭାବନୀୟ ଘଟଣା ଘଟିଛି। ସୋମବାର ବନ୍ଦ କୋଠରୀରୁ ଝୁଲନ୍ତା ଅବସ୍ଥାରେ ଜଣେ ନାବାଳକଙ୍କ ମୃତଦେହକୁ ପୋଲିସ ଜବତ କରିଛି। ଉକ୍ତ ଘରେ ତାଙ୍କ ସାଙ୍ଗ ଶୋଇଥିବାବେଳେ ମୃତଦେହ ନିକଟରେ ଏକ ମୋବାଇଲ୍ ଫୋନ୍ ମିଳିଛି। ମୋବାଇଲ୍ରେ ଫ୍ରି-ଫାୟାର ଗେମ୍ ଅନ୍ ରହିଥିବାରୁ ବାଳକଙ୍କ ମୃତ୍ୟୁ ସହ ଏହାର ଲିଙ୍କ୍ ରହିଥିବା ପୋଲିସ ସନ୍ଦେହ କରୁଛି। ଏପଟେ ପରିବାର ଲୋକେ ମଧ୍ୟ ସମାନ ଆଶଙ୍କା କରୁଛନ୍ତି। ଗେମ୍ ପାଇଁ ଆତ୍ମହତ୍ୟା କରିଥାଇପାରନ୍ତି ବୋଲି ବୟାନ ରେକର୍ଡବେଳେ ପୋଲିସକୁ କହିଛନ୍ତି। ପୋଲିସ ମୃତଦେହକୁ କ୍ୟାପିଟାଲ ହସ୍ପିଟାଲରେ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି। ଏନେଇ ଏକ ଅପମୃତ୍ୟୁ ମାମଲା (ନଂ.୧୪/୨୧) ରୁଜୁ କରି ଅନ୍ୟସବୁ ଦିଗକୁ ମଧ୍ୟ ତଦନ୍ତ ପରିସରଭୁକ୍ତ କରିଛି।
ମୃତ ନାବାଳକ ହେଲେ ଯଶୋବନ୍ତ ରାଉତରାୟ। ବୟସ ମାତ୍ର ୧୨ ବର୍ଷ। ସେ ଜାଭିୟର ସ୍କୁଲ୍ର ଛାତ୍ର। ତାଙ୍କ ବାପାଙ୍କ କହିବାନୁସାରେ, ସ୍କୁଲ୍ ଛୁଟି ଥିବାରୁ ଯଶୋବନ୍ତ ସବୁବେଳେ ମୋବାଇଲ୍ ଫୋନ୍ରେ ଫ୍ରି-ଫାୟାର ଗେମ୍ ଖେଳନ୍ତି। ରବିବାର ରାତିରେ ତା’ର ଜଣେ ସାଙ୍ଗ ଘରକୁ ଆସିଥିଲେ। ଖାଇସାରିବା ପରେ ଦୁହେଁ ଏକାଠି ଗୋଟିଏ ଘରେ ଶୋଇଥିଲେ। ସକାଳ ହେବାରୁ ବାପା ଘର କବାଟ ବାଡ଼େଇଥିଲେ। ହେଲେ କେହି କବାଟ ଫିଟାଇ ନ ଥିଲେ। ସନ୍ଦେହରେ କବାଟ ଭାଙ୍ଗିଦେଇଥିଲେ। ଭିତରେ ପୁଅ ବେକରେ ଗାମୁଛା ବାନ୍ଧି ଫ୍ୟାନ୍ରେ ଝୁଲୁଥିବା ଦେଖି ହତବାକ ହୋଇଯାଇଥିଲେ। ଏଥିସହିତ ନାବାଳକଙ୍କ ସାଙ୍ଗ ବେଡ୍ରେ ନିଦରେ ଶୋଇଥିଲେ। ତୁରନ୍ତ ଘଟଣା ସମ୍ପର୍କରେ ଖାରବେଳନଗର ଥାନାକୁ ଫୋନ୍ କରି ଜଣାଇବା ପରେ ପୋଲିସ ଟିମ୍ ପହଞ୍ଚତ୍ଥିଲା। ପରେ ସାଇଣ୍ଟିଫିକ୍ ଟିମ୍ ପହଞ୍ଚତ୍ ଛାନ୍ଭିନ୍ କରିଥିଲା। ପୋଲିସ ପରିବାର ଲୋକଙ୍କ ବୟାନ ରେକର୍ଡ ଘଟଣାର ଅଧିକ ତଦନ୍ତ ଜାରି ରଖିଥିବା କହିଛି।
ସୂଚନାଯୋଗ୍ୟ, ବର୍ତ୍ତମାନ ସ୍କୁଲ୍ ବନ୍ଦ ରହିଥିବାରୁ ପିଲାମାନେ ଏବେ ଘରେ ରହୁଛନ୍ତି। ଅଧିକାଂଶ ପିଲା ପାଠପଢ଼ା ପରେ ମୋବାଇଲ୍ ଫୋନ୍ ସହ ସମୟ ବିତାଉଛନ୍ତି। ଇଣ୍ଟରନେଟ୍ରେ ମନଇଚ୍ଛା ସାଇଟ୍ ଖୋଲି ଦେଖୁଛନ୍ତି। ଅଧିକାଂଶ ବିଭିନ୍ନ ଗେମ୍ରେ ନିଜକୁ ନିମଗ୍ନ ରଖୁଛନ୍ତି। ଫଳରେ ଗେମ୍ ଦ୍ୱାରା ପିଲାଙ୍କ କୋମଳ ମନ ପ୍ରଭାବିତ ହୋଇ ଆତ୍ମହତ୍ୟା ଭଳି ପନ୍ଥାକୁ ଆପଣାଉଥିବା ପୂର୍ବରୁ ନଜିର ରହିଛି। ତେଣୁ ପିଲାଙ୍କୁ ମୋବାଇଲ୍ ଦେବା ପୂର୍ବରୁ ଅଭିଭାବକମାନେ ଗାଇଡ୍ କରିବା ସହ ନଜର ରଖିବା ଆବଶ୍ୟକ ବୋଲି ମନସ୍ତତ୍ତ୍ୱବିତ୍ମାନେ କହିଛନ୍ତି।
