ଭଦ୍ରକ ଅଫିସ,୩୧।୮: – ମୋବାଇଲ ଚୋରି ସନ୍ଦେହରେ ବିଚ ବଜାରରେ ଯୁବକଙ୍କୁ ରଶିରେ ବାନ୍ଧି ଘୋଷାଡ଼ି ଘୋଷାଡ଼ି ନେଲେ ଅନ୍ୟ ଜଣେ ଯୁବକ। ଏପରି ଅଭାବନୀୟ ଘଟଣା ଘଟିଛି ଧୂଷୁରୀ ଥାନା ବେତାଳିଗାଁ ବଜାରରେ। ସୂଚନା ଅନୁଯାୟୀ, ବେତାଳିଗାଁ ଗ୍ରାମର ଦୁଇଜଣ ଯୁବକ ନଦୀରେ ମାଛ ଧରିବାକୁ ଯାଇଥିଲେ। ଉଚ୍ଚ ସ୍ଥାନରେ ମୋବାଇଲ ରଖି ଜଣେ ଯୁବକ ମାଛ ଧରିବାକୁ ପାଣି ଭିତରକୁ ପଶିଥିଲେ। ଏହି ସମୟରେ ଜଣେ ଯୁବକ ସେଠାରୁ ପଳେଇ ଆସିବା ପରେ ଅନ୍ୟ ଜଣେ ଯୁବକ ତାଙ୍କ ମୋବାଇଲ ରଖିଥିବା ସ୍ଥାନରେ ଆଉ ନିଜ ମୋବାଇଲଟି ପାଇ ନ ଥିଲେ। ସାଥୀ ହୋଇ ଯାଇଥିବା ଯୁବକଟି ପଳେଇ ଆସିବାରୁ ମୋବାଇଲ ସେ ଚୋରି କରିଥିବା ନେଇ ସନ୍ଦେହ ଉପୁଜିଥିଲା। ବେତାଳିଗାଁ ବଜାର ଉପରେ ସମ୍ପୃକ୍ତ ଯୁବକଙ୍କୁ ଅଟକାଇ ଏକ ରଶିରେ ବାନ୍ଧି ଘୋଷାଡ଼ି ଘୋଷାଡ଼ି ବଜାରରେ ବୁଲେଇବା ସହ ମାଡ ମଧ୍ୟ ମାରିଥିଲେ। ତେବେ ଏଭଳି ଘଟଣାକୁ ସମସ୍ତେ ଦେଖୁଥିଲେ ମଧ୍ୟ କୌଣସି ବ୍ୟକ୍ତି ଏହାର ବିରୋଧ କରି ନ ଥିଲେ। ଏନେଇ ଥାନାରେ କୌଣସି ଏତଲା ଦିଆଯାଇନାହିଁ।
