ନୂଆଦିଲ୍ଲୀ, ୨୬।୫-ରେସ୍ଲର ସାଗର ଧନକରଙ୍କ ମୃତ୍ୟୁ ମାମଲାରେ ଗିରଫ ହୋଇଥିବା ଅଲିମ୍ପିକ୍ସ ପଦକ ବିଜେତା ସୁଶୀଲ କୁମାରଙ୍କୁ ନର୍ଦ୍ଦର୍ନ ରେଲଓ୍ବେ ମଙ୍ଗଳବାର ଚାକିରିରୁ ନିଲମ୍ବିତ କରିଛି। ମେ’ ୨୩ଠାରୁ ଏହା ଲାଗୁ ହେବ ଏବଂ ପରବର୍ତ୍ତୀ ଆଦେଶ ପର୍ଯ୍ୟନ୍ତ ଏହି ନିଲମ୍ବନ ବଳବତ୍ତର ରହିବ ବୋଲି ଜଣେ ଅଫିସିଆଲ ପ୍ରକାଶ କରିଛନ୍ତି। ରେସ୍ଲର ସୁଶୀଲ ନର୍ଦ୍ଦର୍ନ ରେଲଓ୍ବେରେ ଜଣେ ସିନିୟର କମର୍ସିଆଲ ମ୍ୟାନେଜର ଭାବେ କାର୍ଯ୍ୟରତ ଥିଲେ। ୨୦୧୫ରେ ତାଙ୍କୁ ଡେପୁଟେଶନରେ ନ୍ୟୁ ଦିଲ୍ଲୀ ମ୍ୟୁନିସିପାଲ କାଉନ୍ସିଲ (ଏନ୍ଡିଏମ୍ସି)କୁ ପଠାଯାଇଥିଲା। ସେଠାରେ ସ୍କୁଲ ସ୍ତରରେ କ୍ରୀଡ଼ା ଉନ୍ନୟନର ଅଂଶବିଶେଷଭାବେ ଦିଲ୍ଲୀ ସରକାରଙ୍କ ପକ୍ଷରୁ ତାଙ୍କୁ ଛତ୍ରସାଲ ଷ୍ଟାଡିୟମରେ ଓଏସ୍ଡି (ଅଫିସର ଅନ୍ ସ୍ପେଶାଲ ଡ୍ୟୁଟି) ଭାବେ ନିଯୁକ୍ତି ଦିଆଯାଇଥିଲା। ସାଗରଙ୍କ ମୃତ୍ୟୁ ମାମଲାରେ ସମ୍ପୃକ୍ତି ଅଭିଯୋଗ ଆସିବା ପରେ ସୁଶୀଲ ପାଖାପାଖି ୨ ସପ୍ତାହ ଫେରାର ରହିବା ପରେ ମୁଣ୍ଡକାରୁ ଗିରଫ ହୋଇଥିଲେ। ଗତ ସୋମବାର ଉଭୟ ଏନ୍ଡିଏମ୍ସି ଓ ରେଲଓ୍ବେ ବୋର୍ଡ ପକ୍ଷରୁ ତାଙ୍କ ଗିରଫ ସମ୍ପର୍କରେ ନର୍ଦ୍ଦର୍ନ ରେଲଓ୍ବେକୁ ଲିଖିତଭାବେ ଅବଗତ କରାଯାଇଥିଲା। ସାଗରଙ୍କ ମୃତ୍ୟୁ ମାମଲାର ତଦନ୍ତ ଚାଲୁ ରହିଥିବାବେଳେ ବର୍ତ୍ତମାନ ଜେଲ୍ରେ ଥିବା ଗ୍ୟାଙ୍ଗଷ୍ଟର ନୀରଜ ବାଓ୍ବାନାଙ୍କ କ୍ରାଇମ୍ ନେଟ୍ଓ୍ବର୍କ ସହ ସୁଶୀଲଙ୍କ ସମ୍ପର୍କ ରହିଛି କି ନାହିଁ ତାହା ପୋଲିସ ଛାନ୍ଭିନ୍ କରୁଛି।
