ନୂଆଦିଲ୍ଲୀ,୨୫।୩: ଚଳିତ ବର୍ଷ ଶେଷରେ ହେବାକୁ ଥିବା ଟି୨୦ ବିଶ୍ୱକପ୍ ଲାଗି ଖେଳାଳି ଚୟନକୁ ନେଇ ଆଲୋଚନା ଜାରି ରହିଛି। ଏପରି ସମୟରେ ଭାରତର ପୂର୍ବ ବ୍ୟାଟ୍ସମ୍ୟାନ୍ ଭିଭିଏସ୍ ଲକ୍ଷ୍ମଣ ଦୁଇଜଣ କ୍ରିକେଟର ବିଶ୍ୱକପ୍ ଦଳରେ ସାମିଲ ହେବାର ଯୋଗ୍ୟତା ରଖିଥିବା କହିଛନ୍ତି। ସେମାନେ ହେଲେ ଈଶାନ କିଶନ ଏବଂ ସୂର୍ଯ୍ୟକୁମାର ଯାଦବ। ଉଭୟ ଅନ୍ତରାଷ୍ଟ୍ରୀୟ କ୍ରିକେଟରେ ପଦାର୍ପଣ କରି ସମସ୍ତଙ୍କୁ ଚମକାଇଛନ୍ତି। ଈଶାନ ଇଂଲଣ୍ଡ ବିପକ୍ଷରେ ୩୨ ବଲ୍ରେ ୫୬ ରନ୍ ଏବଂ ଯାଦବ ଚତୁର୍ଥ ଏବଂ ପଞ୍ଚମ ଟି୨୦ ମୁକାବିଲାରେ କ୍ରମଶଃ ୩୧ ବଲ୍ରେ ୫୭ ଏବଂ ୧୭ ବଲ୍ରେ ୩୨ ରନ୍ କରିଛନ୍ତି।
ଷ୍ଟାର ସ୍ପୋଟ୍ସର ଏକ କାର୍ଯ୍ୟକ୍ରମରେ ଲକ୍ଷ୍ମଣ କହିଛନ୍ତି, ଚଳିତ ଶୃଙ୍ଖଳାରେ ଅନେକ ଯୁବ କ୍ରିକେଟର ନିଜ ନିଜର ପ୍ରତିଭାକୁ ବେଶ ଭଲ ଭାବେ ପ୍ରଦର୍ଶନ କରିଛନ୍ତି। ମିଳିଥିବା ସୁଯୋଗର ଭରପୂର ଫାଇଦା ସେମାନେ ଉଠାଇଛନ୍ତି। ହେଲେ ଈଶାନ ଏବଂ ସୂର୍ଯ୍ୟକୁମାର ଯେଉଁଭଳି ନିଜର ପ୍ରଥମ ପାଳିରେ ଖେଳିଛନ୍ତି, ଲାଗୁଛି ୧୫ ସଦସ୍ୟ ବିଶିଷ୍ଟ ବିଶ୍ୱକପ୍ ଟିମ୍ରେ ସେମାନେ ସ୍ଥାନ ପାଇବେ। ଏହା ଚୟନ କରିବା କଷ୍ଟକର ହେଲେ ହେଁ ଉଭୟ ଏଥିପାଇଁ ଯୋଗ୍ୟ ବୋଲି ସେ କହିଛନ୍ତି।
