ଅନ୍ତର୍ଜାତୀୟ କ୍ରିକେଟକୁ ଅଲବିଦା କହିଥିବା ସୁରେଶ ରାଇନା ପୁଣିଥରେ ପଡ଼ିଆକୁ ଫେରିବାକୁ ଯାଉଛନ୍ତି। ଖୁବଶୀଘ୍ର ତାଙ୍କୁ କ୍ରିକେଟ ଖେଳୁଥିବା ଦେଖିବାକୁ ମିଳିବ। ରାଇନା ନିଜେ ଏହି ସୂଚନା ଦେଇଛନ୍ତି। ଅନ୍ତର୍ଜାତୀୟ କ୍ରିକେଟରୁ ଅବସର ନେବା ପରେ ପାରିବାରିକ କାରଣ ଦର୍ଶାଇ ରାଇନା ଆଇପିଏଲର ୧୩ତମ ସିଜିନ ଖେଳି ନ ଥିଲେ। ଏବଂ ସେ ୟୁଏଇରୁ ଭାରତ ଫେରିଥିଲେ। ଏହାକୁ ନେଇ ଅନେକ ପ୍ରଶ୍ନ ମଧ୍ୟ ଉଠିଥିଲା, କିନ୍ତୁ ସେ ଆସନ୍ତା ବର୍ଷ ହେବାକୁ ଥିବା ଆଇପିଏଲରେ ଅଂଶଗ୍ରହଣ କରିବେ ବୋଲି କହିଛନ୍ତି। ଉତ୍ତରପ୍ରଦେଶର କାନପୁରରେ ହେବାକୁ ଥିବା ଅଭ୍ୟାସ ଶିବିରରେ ସେ ଯୋଗଦେବେ। ଏହା ସହିତ ସେ ୧୩ରୁ ୧୫ ଡିସେମ୍ବର ପର୍ଯ୍ୟନ୍ତ ଅଭ୍ୟାସ ମ୍ୟାଚ ଖେଳିବେ। ରାଇନା କହିଛନ୍ତି ଯେ ସେ ଚଳିତ ବର୍ଷ ସୟଦ ମୁସ୍ତାକ ଅଲ୍ଲୀ ଟି -୨୦ ଟ୍ରଫିରେ ଉତ୍ତରପ୍ରଦେଶ ଦଳକୁ ପ୍ରତିନିଧିତ୍ୱ କରିବେ। ଏହା ପରେ ଆସନ୍ତା ବର୍ଷ ଆୟୋଜିତ ହେବାକୁ ଥିବା ଆଇପିଏଲ ଉପରେ ତାଙ୍କର ସମ୍ପୂର୍ଣ୍ଣ ଧ୍ୟାନ ରହିବ। ସମ୍ପ୍ରତି ଭାରତର ପୂର୍ବତନ ଅଲରାଉଣ୍ଡର ରାଇନା ଜମ୍ମୁ-କଶ୍ମୀରରେ ନିଜର ୬ଟି କ୍ରିକେଟ ଏକାଡେମୀ ଖୋଲିବାରେ ବ୍ୟସ୍ତ ଅଛନ୍ତି। ନିକଟରେ ସେ କାଶ୍ମୀରରେ ପିଲାମାନଙ୍କ ପରୀକ୍ଷା ମଧ୍ୟ ନେଇଥିଲେ।
