କୁରନୁଲ୍, ୧୮।୧୨: ଆନ୍ଧ୍ରପ୍ରଦେଶର କୁରନୁଲ୍ରେ ଥିବା ଶ୍ରୀ ବ୍ରମରମମ୍ବା ମଲ୍ଲକାର୍ଜୁନ ସ୍ବାମୀ ମନ୍ଦିରର ଶପିଂ କମ୍ପ୍ଲେକ୍ସ୍ ଲିଜ୍ ନିଲାମୀ ପ୍ରକ୍ରିୟାରେ ସବୁଧର୍ମର ଲୋକଙ୍କୁ ସାମିଲ୍ କରିବାକୁ ସୁପ୍ରିମ୍କୋର୍ଟ ନିର୍ଦ୍ଦେଶ ଜାରି କରିଛନ୍ତି। ଶୀର୍ଷ କୋର୍ଟ କହିଛନ୍ତି ଯେ, କେବଳ ଧର୍ମର ଆଧାରରେ କୌଣସି ବ୍ୟକ୍ତି ବିଶେଷଙ୍କୁ ନିଲାମୀ ପ୍ରକ୍ରିୟାରୁ ଦୂରେଇ ରଖି ହେବ ନାହିଁ। ବିଚାରପତି ଡି.ଓ୍ବାଇ.ଚନ୍ଦ୍ରଚୂଡ଼ ଏବଂ ଏ.ଏସ୍.ବୋପନ୍ନାଙ୍କ ନେତୃତ୍ୱରେ ଗଠିତ ଖଣ୍ଡପୀଠ ଏଭଳି ରାୟ ପ୍ରଦାନ କରିଛନ୍ତି।
୨୦୨୦ରେ ସର୍ବୋଚ୍ଚ ଅଦାଲତ ଆନ୍ଧ୍ରପ୍ରଦେଶ ହାଇକୋର୍ଟଙ୍କର ୨୦୧୯ ସେପ୍ଟେମ୍ବର ରାୟ ଉପରେ ରୋକ ଲଗାଇ ଦେଇଥିଲେ। ଏଥିରେ ୨୦୧୫ରେ ରାଜ୍ୟ ସରକାରଙ୍କ ପକ୍ଷରୁ ଜାରି ହୋଇଥିବା ନିର୍ଦ୍ଦେଶ ଆଧାରରେ ଅଣ-ହିନ୍ଦୁଙ୍କୁ ଏହି ନିଲାମୀ ପ୍ରକ୍ରିୟାରେ ସାମିଲ କରା ନ ଯିବା ନେଇ ଅନୁଚ୍ଛେଦ ୧୪ ଏବଂ ୧୫କୁ ଉଲ୍ଲଂଘନ ହେଉଥିବା ଲାଗି କରାଯାଇଥିବା ଏକ ରିଟ୍ ପିଟିଶନକୁ ଖାରଜ କରି ଦିଆଯାଇଥିଲା। ଏହା ସହିତ ଲିଜ୍ ଏବଂ ଲାଇସେନ୍ସ୍ ନିୟମ ୨୦୦୩ରେ ନିୟମ ୪(୨) ଏବଂ ୧୮କୁ ସାମିଲ୍ କରାଯାଇଥିଲା।
ଏହାକୁ ନେଇ ଆବେଦନକାରୀ ସୈୟନ ଜାନି ବାଶାଙ୍କ ପକ୍ଷରୁ ରାଜ୍ୟ ସରକାରଙ୍କ ରାଜସ୍ବ ବିଭାଗର ମୁଖ୍ୟ ବନ୍ଦୋବସ୍ତ ସଚିବ ଏବଂ ଶ୍ରୀ ବ୍ରମରମମ୍ବା ମଲ୍ଲକାର୍ଜୁନ ସ୍ବାମୀ ମନ୍ଦିରର କାର୍ଯ୍ୟକାରୀ ଅଧିକାରୀଙ୍କ ବିରୋଧରେ ଅଦାଲତ ଅବମାନନା କରୁଥିବା ନେଇ କାର୍ଯ୍ୟାନୁଷ୍ଠାନ ଦାବି କରାଯାଇଥିଲା।
