ନୂଆଦିଲ୍ଲୀ,୧୫ା୬(ପି.ଟି.): ଚଳିତ ବର୍ଷର ମେଡିକାଲ ପ୍ରବେଶିକା ପରୀକ୍ଷା ଏନ୍ଇଇଟି-ୟୁଜିରେ ପ୍ରଶ୍ନପତ୍ର ଲିକ୍ ଓ ଅନିୟମିତତା ଅଭିଯୋଗର ସିବିଆଇ ତଦନ୍ତ ପାଇଁ ହୋଇଥିବା ଏକ ଆବେଦନ ଉପରେ ସୁପ୍ରିମକୋର୍ଟ ଶୁକ୍ରବାର କେନ୍ଦ୍ର ସରକାର ଏବଂ ପରୀକ୍ଷା ପରିଚାଳନାକାରୀ ସଂସ୍ଥା ଏନ୍ଟିଏକୁ ଜବାବ ମାଗିଛନ୍ତି। ହିତେନ ସିଂ କାଶ୍ୟପ ଓ ଅନ୍ୟମାନଙ୍କ ଦ୍ୱାରା ଦାଏର ଜନସ୍ବାର୍ଥ ମାମଲାର ଶୁଣାଣି କରି ଜଷ୍ଟିସ୍ ବିକ୍ରମ ନାଥ ଏବଂ ସନ୍ଦୀପ୍ ମେହେଟ୍ଟାଙ୍କ ଖଣ୍ଡପୀଠ ସିବିଆଇ ଏବଂ ବିହାର ସରକାରଙ୍କୁ ମଧ୍ୟ ୨ ସପ୍ତାହ ମଧ୍ୟରେ ଜବାବ ଦାଖଲ କରିବାକୁ କହିଛନ୍ତି। ଅନ୍ୟ ପିଟିଶନଗୁଡ଼ିକ ସହ ଉପରୋକ୍ତ ପିଟିଶନ୍ର ଶୁଣାଣି ଜୁଲାଇ ୮ରେ ହେବ।
ଶୁକ୍ରବାର ଶୁଣାଣି ସମୟରେ ଛାତ୍ରମାନଙ୍କ ପକ୍ଷର ଜଣେ ଓକିଲ ସିବିଆଇ ତଦନ୍ତ ଏବଂ ଏନ୍ଇଇଟି କାଉନସେଲିଂ ସ୍ଥଗିତ ରଖିବା ପାଇଁ ଦାବି କରିବା ସହ ରାଜସ୍ଥାନର କୋଟା ଆତ୍ମହତ୍ୟା ପ୍ରସଙ୍ଗ ଉଠାଇବାରୁ ଖଣ୍ଡପୀଠ କ୍ଷୁବ୍ଧ ହୋଇଥିଲେ। ଅନାବଶ୍ୟକ ଭାବାବେଗ ସୃଷ୍ଟିକାରୀ ଯୁକ୍ତି ନ କରିବା ପାଇଁ ଜଷ୍ଟିସ୍ ନାଥ କହିବା ସହ କାଉନ୍ସେଲିଂ ଉପରେ ରୋକ୍ ଲଗାଇବାକୁ ମନା କରିଦେଇଥିଲେ। ସିବିଆଇ ତଦନ୍ତ ନିର୍ଦ୍ଦେଶ ଦେବା ପୂର୍ବରୁ ଏନ୍ଟିଏର ଜବାବ ଜରୁରୀ। ୧,୫୬୩ ପରୀକ୍ଷାର୍ଥୀଙ୍କ ଗ୍ରେସ୍ ମାର୍କକୁ ବାତିଲ କରାଯାଇଥିବା କେନ୍ଦ୍ର ଏବଂ ଏନ୍ଟିଏ ଗୁରୁବାର ସୁପ୍ରିମକୋର୍ଟଙ୍କୁ ଜଣାଇଥିଲେ। ସେମାନେ ଚାହିଁଲେ ପୁନର୍ବାର ପରୀକ୍ଷା ଦେଇପାରିବେ ନଚେତ ସେମାନଙ୍କୁ ମିଳିଥିବା ଗ୍ରେସ୍ ମାର୍କ ହରାଇବାକୁ ପଡ଼ିବ। ଏନ୍ଇଇଟି-ୟୁଜି ପରୀକ୍ଷା ବିବାଦକୁ ନେଇ ବିଭିନ୍ନ ହାଇକୋର୍ଟରେ ମାମଲାଗୁଡ଼ିକ ବିଚାରାଧୀନ ଥିବାରୁ ସେଗୁଡ଼ିକୁ ସୁପ୍ରିମକୋର୍ଟକୁ ସ୍ଥାନାନ୍ତର କରିବା ପାଇଁ ଏନ୍ଟିଏ ଆବେଦନ କରିଥିଲା। ଏହାର ଶୁଣାଣି କରି ଖଣ୍ଡପୀଠ ବିଭିନ୍ନ ଘରୋଇ ପକ୍ଷଙ୍କୁ ନୋଟିସ୍ ଜାରି କରିଛନ୍ତି।
ସୂଚନାଯୋଗ୍ୟ, ଡାକ୍ତରୀ ପାଠ୍ୟକ୍ରମରେ ନାମଲେଖା ଲାଗି ଗତ ମେ’ ୫ରେ ୨୪ ଲକ୍ଷ ଛାତ୍ରୀଛାତ୍ର ଦେଶର ୪,୭୫୦ ସେଣ୍ଟରରେ ଏନ୍ଇଇଟି-ୟୁଜି ପରୀକ୍ଷା ଦେଇଥିଲେ। ଜୁନ୍ ୧୪ରେ ପରୀକ୍ଷା ଫଳ ପ୍ରକାଶ ପାଇବା ଆଶା କରାଯାଉଥିବାବେଳେ ୪ ତାରିଖ ଲୋକ ସଭା ନିର୍ବାଚନ ଭୋଟଗଣନା ଦିନ ଘୋଷଣା କରାଯାଇଥିଲା। ବିହାର ଭଳି କେତେକ ରାଜ୍ୟରେ ପ୍ରଶ୍ନପତ୍ର ଲିକ୍ ହେବା ସହ ପରୀକ୍ଷାରେ ଅନିୟମିତତା ନେଇ ଅଭିଯୋଗ ହୋଇଥିଲା। ୬୭ ଜଣ ପିଲା ୭୨୦ରୁ ୭୨୦ ନମ୍ବର ରଖିଥିଲେ, ଯାହା କି ଏନ୍ଟିଏ ଇତିହାସରେ ଅଭୂତପୂର୍ବ। ପ୍ରଥମ ର଼୍ୟାଙ୍କ୍ ପାଇଥିବା ୬୭ ପିଲାଙ୍କ ମଧ୍ୟରେ ହରିୟାଣାର ଫରିଦାବାଦସ୍ଥିତ ଗୋଟିଏ ସେଣ୍ଟରର ୬ ଜଣ ପରୀକ୍ଷାର୍ଥୀ ଥିଲେ। ଫଳରେ ପରୀକ୍ଷାରେ ଅନିୟମିତତା ହୋଇଥିବା ସନ୍ଦେହ ଦୃଢ଼ୀଭୂତ ହୋଇଥିଲା। ଏହା ବିରୋଧରେ ଦେଶବ୍ୟାପୀ ଆନ୍ଦୋଳନ ହେବା ସହ ସୁପ୍ରିମକୋର୍ଟ ଏବଂ ୭ ହାଇକୋର୍ଟରେ ପିଟିଶନ ଦାଏର ହୋଇଥିଲା। ଏହି ପରୀକ୍ଷା ଉପରେ ୨୪ ଲକ୍ଷ ପିଲାଙ୍କ ଭବିଷ୍ୟତ ନିର୍ଭର କରୁଥିବାରୁ ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ ଅନିୟମିତତା ଅଭିଯୋଗର ତଦନ୍ତ ପାଇଁ କଂଗ୍ରେସ ଦାବି କରିଥିଲା। ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏପର୍ଯ୍ୟନ୍ତ ଏହା ଉପରେ ନୀରବତା ଅବଲମ୍ବନ କରୁଥିବାରୁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ଏହାକୁ ନେଇ ପ୍ରଶ୍ନ ଉଠାଇଛନ୍ତି। ଏନ୍ଇଇଟି ଦୁର୍ନୀତିକୁ ଚାପିଦେବା ପାଇଁ ମୋଦି ସରକାର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ଏନ୍ଟିଏ ଜରିଆରେ ଉଦ୍ୟମ ଆରମ୍ଭ କରିଥିବା ଖାର୍ଗେ ଶୁକ୍ରବାର କହିଛନ୍ତି।
