ନୂଆଦିଲ୍ଲୀ, ୧୯।୯ : ୧୯୮୯ ମସିହାରେ କଶ୍ମୀରୀ ପଣ୍ଡିତଙ୍କ ହତ୍ୟା ଘଟଣାରେ ଏସଆଇଟି ଯାଞ୍ଚ ପାଇଁ ଏକ ଆବେଦନ ଶୁଣାଣି କରିବାକୁ ସୁପ୍ରିମକୋର୍ଟ ସୋମବାର ମନା କରି ଦେଇଛନ୍ତି। ଏହି ହତ୍ୟାକାଣ୍ଡରେ ନିହତ ହୋଇଥିବା ଟିକା ଲାଲ ଟପଲୁଙ୍କ ପୁଅ ଅଶୁତୋଷ ଟପଲୁଙ୍କ ପକ୍ଷରୁ ଏହି ପିଟିଶନ ଦାଖଲ କରାଯାଇଥିଲା। ସୁପ୍ରିମକୋର୍ଟଙ୍କ ପରାମର୍ଶ କ୍ରମେ ସେ ଏହି ଆବେଦନ ପ୍ରତ୍ୟାହାର କରିଛନ୍ତି।
ଉପଯୁକ୍ତ ମଞ୍ଚରେଏହି ଦାବି କରିବାକୁ ଟପଲୁଙ୍କୁ କୋର୍ଟ କହିଛନ୍ତି। କଶ୍ମୀରରେ ହୋଇଥିବା ହତ୍ୟାକାଣ୍ଡରେ ଟିକା ଲାଲ ଟପଲୁଙ୍କୁ ଜେ.କେ.ଏଲ.ଏଫ ଆତଙ୍କବାଦୀମାନେ ଅତି ନିର୍ମମ ଭାବେ ହତ୍ୟା କରିଥିଲେ। ଆବେଦନରେ କୁହାଯାଇଥିଲା ଯେ ଘଟଣାକୁ ୩୨ ବର୍ଷ ବିତିଗଲାଣି। ପରିବାର ଜାଣି ନାହାଁନ୍ତି ଯେ ଏହି ଘଟଣାରେ କେଉଁ ପ୍ରକାର ଅନୁସନ୍ଧାନ କରାଯାଇଥିଲା। ପରିବାରକୁ ଏଫଆଇଆର କପି ମଧ୍ୟ ଦିଆଯାଇ ନଥିଲା।
୧୯୮୪ରେ ହୋଇ ଶିଖ ଦଙ୍ଗାର ତିନି ଦଶନ୍ଧି ପରେ ତଦନ୍ତ ପାଇଁ ସୁପ୍ରିମକୋର୍ଟଙ୍କ ଦ୍ୱାରା ସ୍ଥାପିତ ହୋଇଥିବା ଏସଆଇଟିକୁ ଆବେଦନକାରୀ ମଧ୍ୟ ଦର୍ଶାଇଥିଲେ ଏବଂ ଟପଲୁଙ୍କ ହତ୍ୟା ଘଟଣାରେ ମଧ୍ୟ ଏସଆଇଟି ଯାଞ୍ଚ୍ ଲାଗି ଅନୁରୋଧ କରିଥିଲେ। କୋର୍ଟ କହିଛନ୍ତି ଯେ ଆମେ ପୂର୍ବରୁ ମଧ୍ୟ ସମାନ ଆବେଦନକୁ ଖାରଜ କରିଛୁ। ବର୍ତ୍ତମାନ ଆମେ ଏହାର ଶୁଣାଣି କରି ପାରିବୁ ନାହିଁ।
