ନୂଆଦିଲ୍ଲୀ,୩୧।୮: କକରୋଚ ଜନତା ପାର୍ଟି (CJP) ପକ୍ଷରୁ ଆସନ୍ତା ୫ ସେପ୍ଟେମ୍ବରରେ ଦିଲ୍ଲୀରେ ପୁଣି ଏକ ବିରୋଧ ମାର୍ଚ୍ଚ ଆୟୋଜନ କରାଯିବାକୁ ଘୋଷଣା ହୋଇଛି। ଏହି ପ୍ରସ୍ତାବିତ ମାର୍ଚ୍ଚକୁ ନେଇ ସୋମବାର ସୁପ୍ରିମକୋର୍ଟରେ ଶୁଣାଣି ହୋଇଥିଲା। ତେବେ କୋର୍ଟ CJPର ମାର୍ଚ୍ଚ ଉପରେ ରୋକ ଲଗାଇବାକୁ ମନା କରିଛନ୍ତି।
ସୁପ୍ରିମକୋର୍ଟ କହିଛନ୍ତି , ଆଇନଶୃଙ୍ଖଳା ବଜାୟ ରଖିବା ସରକାର ଓ ପୋଲିସର ଦାୟିତ୍ୱ। ସମସ୍ତ ପକ୍ଷ ଦାୟିତ୍ୱବୋଧ ସହିତ ଶାନ୍ତିପୂର୍ଣ୍ଣ ଭାବେ ଏବଂ ଆଇନର ସୀମା ମଧ୍ୟରେ ରହି କାର୍ଯ୍ୟ କରିବେ ବୋଲି କୋର୍ଟ ଆଶା ପ୍ରକାଶ କରିଛନ୍ତି।
ଚିଫ ଜଷ୍ଟିସ ସୂର୍ଯ୍ୟକାନ୍ତଙ୍କ ନେତୃତ୍ୱାଧୀନ ଖଣ୍ଡପୀଠ ୫ ସେପ୍ଟେମ୍ବରରେ ହେବାକୁ ଥିବା CJP ମାର୍ଚ୍ଚ ବିରୋଧରେ ଏହି ପର୍ଯ୍ୟାୟରେ କୌଣସି ନିର୍ଦ୍ଦେଶ ଦେବାକୁ ମନା କରିଛନ୍ତି। କୋର୍ଟ କହିଛନ୍ତି ଯେ ସମସ୍ତେ ଦାୟିତ୍ୱବାନ ଭାବେ, ଶାନ୍ତିପୂର୍ଣ୍ଣ ଓ ଆଇନ ଅନୁଯାୟୀ ବ୍ୟବହାର କରିବେ ବୋଲି ଧରିନିଆଯାଉଛି।
କୋର୍ଟଙ୍କ କହିବା ଅନୁସାରେ, ବର୍ତ୍ତମାନ ଏପରି କୌଣସି ଠୋସ କାରଣ ତାଙ୍କ ସାମ୍ନାରେ ନାହିଁ, ଯାହା ଆଧାରରେ ମାର୍ଚ୍ଚ ସମୟରେ କିଛି ଅପ୍ରୀତିକର ଘଟଣା ଘଟିବ ବୋଲି ଧରାଯାଇପାରେ। ସୁପ୍ରିମକୋର୍ଟ କହିଛନ୍ତି ଯେ ଶାନ୍ତିପୂର୍ଣ୍ଣ ଭାବେ ପ୍ରଦର୍ଶନ କରିବା ଲୋକଙ୍କ ଅଧିକାର, କିନ୍ତୁ ଆଇନଶୃଙ୍ଖଳା ରକ୍ଷା କରିବା ସରକାର ଓ ପୋଲିସର ଦାୟିତ୍ୱ। ଏହି ମାମଲାକୁ ସଲିସିଟର ଜେନେରାଲଙ୍କ ସାମ୍ନାରେ ରଖିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି। ଏହା ସହ ମାମଲାକୁ ଅନ୍ୟ ଲମ୍ବିତ ଯାଚିକା ସହ ୧୦ ସେପ୍ଟେମ୍ବରରେ ଶୁଣାଣି ପାଇଁ ତାଲିକାଭୁକ୍ତ କରିବାକୁ କୁହାଯାଇଛି। ଯଦି କୌଣସି ଗୁରୁତର କିମ୍ବା ଚିନ୍ତାଜନକ ପରିସ୍ଥିତି ସୃଷ୍ଟି ହୁଏ, ତେବେ ସମ୍ପୃକ୍ତ ପକ୍ଷ ତୁରନ୍ତ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇପାରିବେ ବୋଲି କୋର୍ଟ ସ୍ପଷ୍ଟ କରିଛନ୍ତି।
