ଜୋହାନ୍ସବର୍ଗ,୩।୧: ଆଉଟ୍ ଅଫ୍ ଫର୍ମ ଥିବା ଦୁଇ ଭେଟେରାନ ଚେତେଶ୍ୱର ପୂଜାରା ଓ ଅଜିଙ୍କ୍ୟ ରାହାନେ ଦକ୍ଷିଣ ଆଫ୍ରିକା ବିପକ୍ଷ ଦ୍ୱିତୀୟ ଟେଷ୍ଟରେ ଫେଲ୍ ମାରିଛନ୍ତି। ଏହି ଦୁଇ ଖେଳାଳିଙ୍କ କ୍ୟାରିୟର ଉପରେ ବଡ଼ ବୟାନ ଦେଇଛନ୍ତି ପୂର୍ବତନ ଭାରତୀୟ ଅଧିନାୟକ ତଥା ବ୍ୟାଟିଂ କିମ୍ବଦନ୍ତୀ ସୁନୀଲ ଗାଭାସ୍କର। କ୍ୟାରିୟରର ବଞ୍ଚାଇବା ପାଇଁ ଦୁଇ ସିନିୟର ଖେଳାଳିଙ୍କ ପାଖରେ ମାତ୍ର ଗୋଟିଏ ଇନିଂସ ଥିବା ସେ କହିଛନ୍ତି।
ଡୁଆନେ ଓଲିଭରଙ୍କ ଅଫ୍ ଷ୍ଟମ୍ପ ବାହାର ଶର୍ଟ ପିଚ୍ ବଲକୁ ଡିଫେନ୍ସ କରିବାକୁ ଉଦ୍ୟମ କରିଥିଲେ ପୂଜାରା। କିନ୍ତୁ ୩୩ ବଲର ସମ୍ମୁଖୀନ ହୋଇ ୩ ରନ୍ କରିଥିବା ଟେଷ୍ଟ ସ୍ପେଶାଲିଷ୍ଟଙ୍କ ବ୍ୟାଟ୍ ହ୍ୟାଣ୍ଡେଲରେ ବଲ ବାଜିଥିଲା, ଯାହାକୁ କ୍ୟାଚ୍ କରିଥିଲେ ତେମ୍ବା ବଭୁମା। ଏହାର ପରବର୍ତ୍ତୀ ବଲରେ ଆଉଟ୍ ହୋଇଥିଲେ ରାହାନେ। ସେ ଅଫ୍ ଷ୍ଟମ୍ପ ବାହାର ବଲକୁ ଠେଲିବାକୁ ଉଦ୍ୟମ କରି ୩ୟ ସ୍ଲିପରେ ଧରା ପଡ଼ିଥିଲେ।
“ ଦଳରେ ସେମାନଙ୍କ ସ୍ଥାନ ଉପରେ ପ୍ରଶ୍ନ ଉଠିବା ଆରମ୍ଭ ହୋଇଗଲାଣି। କ୍ୟାରିୟର ବଞ୍ଚାଇବାକୁ ହେଲେ ପୂଜାରା ଓ ରାହାନେଙ୍କ ଲାଗି ପରବର୍ତ୍ତୀ ଇନିଂସ ସମ୍ଭବତଃ ଶେଷ ସୁଯୋଗ ହୋଇପାରେ। ଯଦି ସେମାନଙ୍କୁ ଆଉ ଏକ ଇନିଂସ ମିଳେ, ତେବେ ସେମାନଙ୍କୁ ଦଳରେ ସ୍ଥାନ ବଜାୟ ରଖିବା ଲାଗି ସ୍କୋର କରିବାକୁ ପଡ଼ିବ” ବୋଲି କମେଣ୍ଟ୍ରି ବେଳେ ଗାଭାସ୍କର କହିଥିଲେ। ଉଲ୍ଲେଖଯୋଗ୍ୟ, ୨୦୧୯ଠାରୁ ପୂଜାରାଙ୍କ ବ୍ୟାଟରୁ ଶତକ ବାହାରି ନ ଥିବା ବେଳେ ଗତ ଦୁଇ ବର୍ଷ ହେଲା ଖରାପ ଫର୍ମ ଦେଇ ଗତି କରୁଛନ୍ତି ରାହାନେ।
