ବମ୍ବେ: ଏକ ସମୟରେ ପରସ୍ପରର ଭଲ ବନ୍ଧୁ ଥିଲେ ବଲିଉଡ୍ ଅଭିନେତା ସୁନିଲ ସେଟ୍ଟୀ-ଅକ୍ଷୟ କୁମାର। ପରଦାରେ ଉଭୟଙ୍କ ଯୋଡ଼ି ସୁପରହିଟ୍ ହୋଇଥିଲା। ‘ମୋହରା’, ‘ହେରାଫେରି’, ‘ଫିର ହେରା ଫେରି’, ‘ଧଡକନ୍’, ‘ଦିବାନେ ହୁଏ ପାଗଲ’, ‘ସପୁତ’ ଭଳି ଫିଲ୍ମରେ ଦୁହେଁ ଏକାଠି କାମ କରିଥିଲେ। ସବୁ ଫିଲ୍ମ ବକ୍ସ ଅଫିସରେ ଭଲ ରୋଜଗାର କରିଥିଲା। ହେଲେ ପରବର୍ତ୍ତୀ ସମୟରେ ଭୁଲ ବୁଝାମଣା ଯୋଗୁ ଉଭୟଙ୍କ ସମ୍ପର୍କରେ ଫାଟ ସୃଷ୍ଟି ହୋଇଥିଲା।
୧୯୯୪ରେ ଫିଲ୍ମ ‘ମୋହରା’ରେ ସୁନିଲ ପୋଲିସ ଅଫିସର ଭୂମିକାରେ ଅଭିନୟ କରିଥିଲେ। ଫିଲ୍ମରେ ଅକ୍ଷୟ ମଧ୍ୟ ଥିଲେ। ଏହା ବକ୍ସଅଫିସରେ ଜବରଦସ୍ତ ହିଟ୍ ସାବ୍ୟସ୍ତ ହୋଇଥିଲା। ଏଭଳି ସଫଳତା ପରେ ଦୁହେଁ ଏକାଧିକ ଫିଲ୍ମରେ ନଜର ଆସିଥିଲେ। ୨୦୦୨ରେ ‘ହେରାଫେରି’ରେ ପରେଶ ରାଓ୍ବଲଙ୍କ ସହ ଉଭୟ କଳାକାର ନଜର ଆସିଥିଲେ। ସମସ୍ତଙ୍କର ନିଖୁଣ ଅଭିନୟ ଦର୍ଶକଙ୍କ ମନରେ ଛାପ ଛାଡ଼ିଥିଲା। ହେଲେ ଫିଲ୍ମ ବେଳେ ଉଭୟଙ୍କ ମଧ୍ୟରେ ମତଭେଦର ଖବର ଶୁଣିବାକୁ ମିଳିଥିଲା। ଅକ୍ଷୟ ଫିଲ୍ମରେ ତାଙ୍କ ସିନ୍ କାଟି ଦେଇଥିବା ସୁନିଲଙ୍କୁ ଲାଗିଥିଲା। ଏଥିରେ ସେ ଏତେ ଖପ୍ପା ହୋଇଥିଲେ ଯେ ଅକ୍ଷୟଙ୍କୁ ମୁହଁ ଦେଖିବାକୁ ଚାହୁଁ ନ ଥିଲେ।
ଏକ ସାକ୍ଷାତକାରରେ ସୁନିଲ ଅକ୍ଷୟକୁ ଜଣେ ଖରାପ ସହ ଅଭିନେତା ବୋଲି କହିଥିଲେ। ଯେତେବେଳେ ସୁନିଲ ଏଭଳି କହିଥିବା ଅକ୍ଷୟ ଜାଣିଥିଲେ ସେ ତୁରନ୍ତ ଅଭିନେତାଙ୍କୁ ଫୋନ କରିଥିଲେ। ଏହି ସମୟରେ ସେ ତାଙ୍କର କୈାଣସି ଦୃଶ୍ୟ କାଟି ନ ଥିବା ବୁଝାଇଥିଲେ। ସେତେବେଳେ ସୁନିଲ ନିଜର ଭୁଲ ବୁଝିପାରି ଥିଲେ। ଫଳରେ ସେମାନେ ପୂର୍ବଭଳି ବନ୍ଧୁ ହୋଇଥିଲେ। ତେବେ ଆଜି ହେଉଛି ସୁନିଲ ସେଟ୍ଟୀଙ୍କ ହାପି ବର୍ଥ ଡେ। ଏହାକୁ ନେଇ ଅଭିନେତାଙ୍କ ପାଖକୁ ଶୁଭେଚ୍ଛାର ସୁଅ ଛୁଟୁଛି।
