ସୁନ୍ଦରଗଡ଼,୩୧।୧୨(ଡି.ଏନ୍.ଏ.): ପୌର କର୍ମଚାରୀଙ୍କ ୟୁନିଫର୍ମ ବିଲ୍ ମଞ୍ଜୁର ପାଇଁ ଜଣେ ଦରଜିଙ୍କଠାରୁ ୧୫ହଜାର ଟଙ୍କା ଲାଞ୍ଚ ଗ୍ରହଣ କରୁଥିବା ବେଳେ ଗୁରୁବାର ସୁନ୍ଦରଗଡ ପୌର ନିର୍ବାହୀ ଅଧିକାରୀ ଅଶୋକ କୁମାର ମିଶ୍ର ଭିଜିଲାନ୍ସ ବିଭାଗ ହାତରେ ଧରାପଡିଛନ୍ତି। ଭିଜିଲାନ୍ସ ବିଭାଗ ଅଧିକାରୀମାନେ ତାଙ୍କ ଠାରୁ ରାସାୟନିକ ପ୍ରଲେପ ଦିଆ ଲାଞ୍ଚ ଟଙ୍କା ଜବତ କରିବା ସହ ତାଙ୍କୁ ଗିରଫ କରିଛନ୍ତି। ଭିଜିଲାନ୍ସ ବିଭାଗ ପକ୍ଷରୁ ମିଳିଥିବା ସୂଚନା ମୁତାବକ, ୨୦୧୭ରୁ ଝାରସୁଗୁଡାର ସାଇନ୍ ଟେଲରର ପ୍ରୋପ୍ରାଇଟର ସୟଦ ହକ୍ ସୁନ୍ଦରଗଡ ପୌରପାଳିକାକୁ ସଫେଇ କର୍ମଚାରୀ ଓ ଅନ୍ୟ କର୍ମଚାରୀଙ୍କ ସକାଶେ ୧ଲକ୍ଷ ୭୭ହଜାର ଟଙ୍କା ମୂଲ୍ୟର ୟୁନିଫର୍ମ ଦେଇଥିଲେ। ହେଲେ ଦୀର୍ଘ ଦିନଧରି ତାଙ୍କର ବିଲ୍ ମଞ୍ଜୁର ହେଉ ନ ଥିଲା। ନିର୍ବାହୀ ଅଧିକାରୀ ମିଶ୍ର ବିଲ୍ ମଞ୍ଜୁର ସକାଶେ ୧୫ହଜାର ଟଙ୍କା ଦାବି କରିଆସୁଥିଲେ। ଏ ସମ୍ପର୍କରେ ଟେଲର ମାଷ୍ଟର ରାଉରକେଲା ଭିଜିଲାନ୍ସ ଥାନାରେ ରିପୋର୍ଟ କରିଥିଲେ। ରିପୋର୍ଟ ପରେ ରାଉରକେଲା ଭିଜିଲାନ୍ସ ଏସ୍ପି ସୁବାସ ସ୍ବାଇଁଙ୍କ ନିର୍ଦ୍ଦେଶକ୍ରମେ ଏକ ମାମଲା ରୁଜୁ କରାଯାଇଥିଲା। ଯୋଜନା ମୁତାବକ ସୁନ୍ଦରଗଡ଼ ପୌରପାଳିକା କାର୍ଯ୍ୟାଳୟରେ ନିର୍ବାହୀ ଅଧିକାରୀ (ଇଓ) ଟେଲର ମାଷ୍ଟରଙ୍କ ଠାରୁ ୧୫ହଜାର ଟଙ୍କା ଲାଞ୍ଚ ଗ୍ରହଣ କରୁଥିବା ବେଳେ ଛପିରହିଥିବା ଭିଜିଲାନ୍ସ ଅଧିକାରୀମାନେ ତାଙ୍କୁ କାବୁ କରି ଟଙ୍କା ଜବତ କରିଥିଲେ। ସୁନ୍ଦରଗଡ଼ ଭିଜିଲାନ୍ସ ଡିଏସ୍ପି ବୀରେନ୍ଦ୍ର କୁମାର ନାଏକଙ୍କ ନେତୃତ୍ୱରେ ଇନ୍ସିପେକ୍ଟର ସୁଧାଂଶୁ ଶେଖର ପୂଜାରୀ, ଝାରସୁଗୁଡା ଇନି୍ସପେକ୍ଟର ପି.କେ ଆଇନ୍ଦ, ଦେବଗଡ ଇନ୍ସିପେକ୍ଟର ଯୋଗେଶ କୁମାର ପଟେଲ ଓ ରାଉରକେଲା ଇନ୍ସିପେକ୍ଟର ସୁଧୀର ସାହୁ ପ୍ରମୁଖ ଏହି ଚଢାଉରେ ଅଂଶଗ୍ରହଣ କରିଥିଲେ।
