ବେଙ୍ଗାଲୁରୁ, ୧୦।୧୦: ସୁଲତାନ ଜୋହର କପ୍ ଜୁନିୟର ହକି ଟୁର୍ନାମେଣ୍ଟର ୧୧ଶ ସଂସ୍କରଣ ମାଲେସିଆର ଜୋହରଠାରେ ଚଳିତ ମାସ ୨୭ରୁ ନଭେମ୍ବର ୪ ପର୍ଯ୍ୟନ୍ତ ଅନୁଷ୍ଠିତ ହେବ। ପୂର୍ବରୁ ଏହି ପ୍ରତିଯୋଗିତାରେ ୬ଟି ଲେଖାଏ ଦଳ ଖେଳୁଥିବାବେଳେ ଏଥର ଏହା ୮ ଦଳ ବିଶିଷ୍ଟ ହେବ। ଜୁନିୟର ସ୍ତରର ଏହି ସମ୍ମାନଜନକ ପ୍ରତିଯୋଗିତା ପାଇଁ ସୋମବାର ୨୦ ଜଣିଆ ଭାରତୀୟ ଦଳ ଘୋଷଣା କରାଯାଇଛି। ଏଥିରେ ଓଡ଼ିଶାର ଅମନଦୀପ ଲାକ୍ରା ସୁନୀଲ ଜୋଜୋ, ସୁନୀତ ଲାକ୍ରା ସାମିଲ ହୋଇଛନ୍ତି। ଉତ୍ତମ ସିଂଙ୍କୁ ଭାରତୀୟ ଦଳର ଅଧିନାୟକ ଓ ରାଜିନ୍ଦର ସିଂଙ୍କୁ ଉପ ଅଧିନାୟକ କରାଯାଇଛି। ଭାରତ ପୁଲ୍ ‘ବି’ରେ ମାଲେସିଆ, ପାକିସ୍ତାନ ଓ ନ୍ୟୁଜିଲାଣ୍ଡ ସହିତ ସ୍ଥାନ ପାଇଛି। ପୁଲ୍ ‘ଏ’ରେ ଜର୍ମାନୀ, ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା ଓ ଗ୍ରେଟ ବ୍ରିଟେନ ଦଳ ରହିଛନ୍ତି। ପ୍ରତି ଗ୍ରୁପ୍ର ଶ୍ରେଷ୍ଠ ୨ଟି ଲେଖାଏ ଦଳ ସେମିଫାଇନାଲ ପାଇଁ ଯୋଗ୍ୟତା ଅର୍ଜନ କରିବେ। ଆଗାମୀ ପ୍ରତିଯୋଗିତାରେ ଭାରତୀୟ ଦଳର ଉତ୍ତମ ପ୍ରଦର୍ଶନକୁ ନେଇ କୋଚ୍ ସି.ଆର. କୁମାର ବେଶ୍ ଆଶାବାଦୀ ଅଛନ୍ତି। ଅଧିନାୟକ ଉତ୍ତମ ସିଂ କହିଛନ୍ତି ଯେ, ପ୍ରତିଯୋଗିତା ପାଇଁ ସମସ୍ତ ଖେଳାଳି ଟ୍ରେନିଂ ସମୟରେ କଠିନ ପରିଶ୍ରମ କରିଛନ୍ତି। ମ୍ୟାଚବେଳେ ଶ୍ରେଷ୍ଠ ପ୍ରଦର୍ଶନ ପାଇଁ ଅପେକ୍ଷାରେ ଅଛନ୍ତି। ଆଗକୁ ଜୁନିୟର ହକି ବିଶ୍ୱକପ ଆସୁଥିବାରୁ ଏଥରର ସୁଲତାନ ଜୋହର କପ୍ ସବୁ ଦଳ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ଭାରତୀୟ ଦଳ
ଗୋଲକିପର୍ସ: ମୋହିତ ଏଚ୍.ଏସ୍., ରଣବିଜୟ ସିଂ ଯାଦବ।
ଡିଫେଣ୍ଡର୍ସ: ଅମନଦୀପ ଲାକ୍ରା, ରୋହିତ, ସୁନୀଲ ଜୋଜୋ, ସୁଖବିନ୍ଦର, ଅମିର ଅଲୀ, ଯୋଗେମ୍ବର ରାଓ୍ବତ।
ମିଡ୍ଫିଲ୍ଡର୍ସ: ବିଷ୍ଣୁକାନ୍ତ ସିଂ, ପୁଭନ୍ନା ସି.ବି., ରାଜିନ୍ଦର ସିଂ, ସୁନୀତ ଲାକ୍ରା, ଅବଦୁଲ ଆହଦ।
ଫରଓ୍ବାଡର୍ସ: ଉତ୍ତମ ସିଂ, ଅରୁଣ ସାହାଣି, ଆଦିତ୍ୟ ଲାଲାଗେ, ଅଙ୍ଗଦ ବୀର ସିଂ, ଗୁରଜୋତ ସିଂ, ସତୀଶ ବି.।
