ଭଦ୍ରକ ଅଫିସ/ସ୍ବ.ପ୍ର., ୨୪।୫: ଭାରତୀୟ ପ୍ରଶାସନିକ ସେବା ପରୀକ୍ଷାରେ ୨୪୮ ର଼୍ୟାଙ୍କ୍ରେ ସ୍ଥାନ ପାଇଛନ୍ତି ଭଦ୍ରକ ଜିଲାର ସୁଶ୍ରୀ ଶୁଭାଙ୍ଗୀ ଖୁଣ୍ଟିଆ(୨୬)। ଭଦ୍ରକ ବଙ୍କସାହିର ସାଇବର ଦୋକାନୀ ସତ୍ୟନାରାୟଣ ଖୁଣ୍ଟିଆ ଓ ସବିତା ଖୁଣ୍ଟିଆଙ୍କ ଝିଅ ଶୁଭାଙ୍ଗୀ। ସେ ପୂର୍ବରୁ ୯୭ ର଼୍ୟାଙ୍କ ରଖି ଓଏଏସ୍ ପାଇ ଜିଲାପାଳଙ୍କ କାର୍ଯ୍ୟାଳୟରେ ଆଡ୍ମିନିଷ୍ଟ୍ରେଟିଭ ଅଫିସର ଭାବେ କାର୍ଯ୍ୟରତ ଅଛନ୍ତି। ଜିଲାପାଳଙ୍କ କାର୍ଯ୍ୟାଳୟରେ ଟ୍ରେନିଂରେ ଥିବା ସହ ଭାରତୀୟ ପ୍ରଶାସନିକ ସେବା ପାଇଁ ନିଜକୁ ପ୍ରସ୍ତୁତ କରିଥିଲେ। ୨୦୨୨ରେ ଆଇଏଏସ୍ ପରୀକ୍ଷା ଦେଇଥିଲେ। ମଙ୍ଗଳବାର ଅପରାହ୍ନରେ ତାଙ୍କ ସାଙ୍ଗ ପାଖରୁ ଆଇଏଏସ୍ରେ ୨୪୮ ର଼୍ୟାଙ୍କରେ ଉତ୍ତୀର୍ଣ୍ଣ ହୋଇଥିବା ଫୋନ କଲ୍ ପାଇବା ପରେ ବିଶ୍ୱାସ କରି ନ ପାରି ନିଜେ ରୋଲ୍ ନମ୍ବରକୁ ର଼୍ୟାଙ୍କିଙ୍ଗ୍ ତାଲିକାରେ ୪ଥର ମିଳାଇବା ପରେ ସେ ନିଶ୍ଚିତ ହୋଇଥିଲେ ବୋଲି କହିଛନ୍ତି। ସୁଯୋଗ ମିଳିଲେ ଜଣେ ଭଲ ସିଭିଲ ସର୍ଭାଣ୍ଟ ଭାବେ ଶିକ୍ଷା ବିଭାଗର ସଚିବ ଭାବେ କାର୍ଯ୍ୟ କରିବା ପାଇଁ ସେ ଇଚ୍ଛା ପ୍ରକାଶ କରିଛନ୍ତି। ଗ୍ରାଜୁଏଶନ ପରେ ପ୍ରଥମ ଥର ୨୦୧୯ରେ ସେ ଆଇଏଏସ୍ ପରୀକ୍ଷା ଦେଇଥିବା ବେଳେ ଏହା ତାଙ୍କର ୪ର୍ଥ ଥର ଥିଲା। ଦିନକୁ ୮ରୁ ୧୦ ଘଣ୍ଟା ପରିଶ୍ରମ କରୁଥିଲେ। ପରିଶ୍ରମ ସାର୍ଥକ ହୋଇଛି। ଧୈର୍ଯ୍ୟ ଧରିବା ସହ ପରୀକ୍ଷାକୁ ବୁଝିନେଲେ ସଫଳତା ନିଶ୍ଚିତ ମିଳିବ ବୋଲି ଶୁଭାଙ୍ଗୀ ଅନ୍ୟମାନଙ୍କୁ ବାର୍ତ୍ତା ଦେଇଛନ୍ତି। ଶୁଭାଙ୍ଗୀ ହାଇଦ୍ରାବାଦ ଗୁଣ୍ଟୁରରେ ବିଏସ୍ସି ଏଗ୍ରିକଲଚରରେ ୟୁନିଭର୍ସିଟିରେ ଗୋଲ୍ଡ ମେଡାଲ ପାଇଥିଲେ। ଦିଲ୍ଲୀର ବାଜିରାମ ଏଣ୍ଡ ରବି ଏବଂ ଜାମିଆ ମିଲିଆ ଇସ୍ଲାମିଆରେ କୋଚିଂ ନେଉଥିଲେ। ସେଠାକାର ପ୍ରତିଯୋଗିତା ଓ ପ୍ରେରଣା ପାଇଁ ଆଜି ଏ ସଫଳତା ମିଳିଛି। ବାପା, ମା’, ବଡ଼ଭାଇ ଓ ସମ୍ପର୍କୀୟଙ୍କୁ ତାଙ୍କର ଏହି ସଫଳତା ପାଇଁ ଶ୍ରେୟ ଦେଇଛନ୍ତି। ଶୁଭାଙ୍ଗୀଙ୍କ ବାପା ଭଦ୍ରକ ସହରର ଟାଉନହଲ୍ ଛକରେ ଏକ ସାଇବର କାଫେ କରି ପରିବାର ପ୍ରତିପୋଷଣ କରନ୍ତି। ଏହି ରୋଜଗାରରେ ଦୁଇପୁଅ ଓ ଏକମାତ୍ର ଝିଅକୁ ବହୁ କଷ୍ଟରେ ପାଠ ପଢ଼ାଇଛନ୍ତି। ଝିଅର ରେଜଲ୍ଟ ଖବର ପାଇବା ପରେ ପରିବାରରେ ଖୁସିର ମାହୋଲ ଖେଳିଯାଇଥିବା ବେଳେ ବାପା ସତ୍ୟନାରାୟଣ ଖୁସିରେ ଆତ୍ମହରା ହୋଇପଡ଼ିଛନ୍ତି।
