ନୂଆଦିଲ୍ଲୀ,୧୯ ।୮: ଆଫଗାନିସ୍ତାନ ଉପରେ ତାଲିବାନ କବଜା କରିବା ପୂର୍ବରୁ ଆଫଗାନୀସ୍ତାନର ପୂର୍ବତନ ରାଷ୍ଟ୍ରପତି ଅଶରଫ ଘନି ଦେଶ ଛାଡି ପଳାୟନ କରିଥିଲେ । ସେ ବିଭିନ୍ନ ଦେଶ ସହ ସମ୍ପର୍କ କରିଥିଲେ ମଧ୍ୟ କେହି ତାଙ୍କୁ ରଖିବାକୁ ରାଜି ହୋଇ ନ ଥିଲେ । ଶେଷରେ ଯୁନାଇଟେଡ ଅରବ ଏମିରାଟ୍ସ ବା ୟୁଏଇରେ ଘନି ଶରଣ ନେଇଛନ୍ତି । ଗଣମାଧ୍ୟମ ସୂତ୍ରରୁ ଜଣାପଡିଛି କି ତାଲିବାନ ଭାରତଠାରୁ ସମସ୍ତ ଆମଦାନୀ ରପ୍ତାନୀ ବନ୍ଦ କରି ଦେଇଛି । ଏହାକୁ ଦୃଷ୍ଟିରେ ରଖି ଭାରତ-ତାଲିବାନର ସମ୍ପର୍କକୁ ନେଇ ଏବେ ନାନା ପ୍ରଶ୍ନ ଉଠୁଛି । ଇତିମଧ୍ୟରେ ଭାରତୀୟ ଜନତା ପାର୍ଟି(ଭାଜପା) ନେତା ସୁବ୍ରମଣ୍ୟମ ସ୍ୱାମୀ କହିଛନ୍ତି, ଘନିଙ୍କୁ ଭାରତରେ ଆଶ୍ରୟ ଦେବାର ଥିଲା । ସୁବ୍ରମଣ୍ୟମ ସ୍ୱାମୀଙ୍କ ଏହି ବୟାନ ଏବେ ଭିନ୍ନ ପ୍ରଶ୍ନ ସୃଷ୍ଟି କରିଛି । ସ୍ୱାମୀ ଗୁରୁବାର ଟୁଇଟ୍ କରି କହିଛନ୍ତି ଭାରତକୁ ଆଫଗାନିସ୍ତାନର ପୂର୍ବତନ ରାଷ୍ଟ୍ରପତି ଡା. ଅଶରଫ ଘନିଙ୍କୁ ନିଜ ଦେଶକୁ ନିମନ୍ତ୍ରଣ କରି ଶରଣ ଦେବାର ଥିଲା । କାରଣ ସେ ଅପେକ୍ଷାକୃତ ଉଚ୍ଚ ଶିକ୍ଷିତ । ଯେତେବେଳେ ତାଲିବାନ ଆମେରିକା ଦ୍ୱାରା ପ୍ରସ୍ତୁତ ଆଧୁନିକ ଅସ୍ତ୍ରଶସ୍ତ୍ର ସହ ପାକ୍ ଅଧିକୃତ କଶ୍ମୀରରେ ପ୍ରବେଶ କରିବ ସେତେବେଳେ ଘନି ଆମକୁ ସାହାଯ୍ୟ କରିଥାଆନ୍ତେ ବୋଲି ସ୍ୱାମୀ କହିଛନ୍ତି ।
