ଡୁଙ୍ଗୁରିପାଲି,୨୯।୮(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ବ୍ଲକ ରାମପୁର ଥାନା ଅନ୍ତର୍ଗତ ବଡ଼ଭାଲୁପାଲି ଗ୍ରାମରେ ଅନ୍ଧବିଶ୍ୱାସ ଯୋଗୁ ଜଣେ ବୃଦ୍ଧଙ୍କର ଅକାଳ ମୃତ୍ୟୁ ଘଟିଛି। ବିଷାକ୍ତ ସାପ କାମୁଡ଼ା ପରେ ହସ୍ପିଟାଲ ନନେଇ ରାତିସାରା ଗୁଣିଆ ଡାକି ଝଡ଼ାଫୁଙ୍କା କରିବା ସମ୍ପୃକ୍ତ ବୃଦ୍ଧଙ୍କ ପାଇଁ କାଳ ହୋଇଛି। ମୃତକ ହେଲେ ବଡ଼ଭାଲୁପାଲି ଗ୍ରାମର ଛଣ ମାଝୀ (୬୭)।
ସୂଚନା ଅନୁସାରେ, ଶୁକ୍ରବାର ରାତି ପ୍ରାୟ ୨ଟା ସମୟରେ ଛଣ ମାଝୀ ବିଛଣାରୁ ଉଠି ପରିସ୍ରା ଯିବା ପାଇଁ ଖଟ ତଳେ ପାଦ ପକାଇବା ବେଳେ ଏକ କ୍ରେତ୍ (କଲେତ) ସାପକୁ ମାଡ଼ି ଦେଇଥିଲେ। ସାପଟି ତାଙ୍କ ଡାହାଣ ଗୋଡ଼ ଆଙ୍ଗୁଠିରେ କାମୁଡ଼ି ଦେଇଥିଲା। ଏହା ପରେ ପରିବାର ଲୋକେ ତୁରନ୍ତ ଡାକ୍ତରଖାନା ନ ନେଇ ଅନ୍ଧବିଶ୍ୱାସର ବଶବର୍ତ୍ତୀ ହୋଇ ରାତିସାରା ଗୁଣିଆ ଡାକି ଝଡ଼ାଫୁଙ୍କା କରାଇଥିଲେ। ଗୁଣିଆର ମନ୍ତ୍ର-ଯନ୍ତ୍ର କିଛି କାମ ଦେଇ ନ ଥିଲା ଏବଂ ସମୟ ବିତିବା ସହ ଶରୀର ସାରା ବିଷ ବ୍ୟାପି ଯାଇଥିଲା।
ଶନିବାର ସକାଳ ୮ଟାରେ ଅବସ୍ଥା ଅତି ଗୁରୁତର ହେବାରୁ ପରିବାର ଲୋକେ ତାଙ୍କୁ ଡୁଙ୍ଗୁରିପାଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ମାତ୍ର ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ଡାକ୍ତର ତାଙ୍କୁ ମୃତ ଘୋଷଣା କରିବା ପରେ ପରିବାର ପକ୍ଷରୁ ରାମପୁର ଥାନାରେ ଲିଖିତ ସୂଚନା ଦିଆଯାଇଥିଲା। ରାମପୁର ପୋଲିସ ମୃତଦେହ ଜବତ କରି କେସ୍ ନଂ ୬/୨୬ରେ ଅପମୃତ୍ୟୁ ମାମଲା ରୁଜୁ କରିବା ସହ ବିନିକା ମେଡିକାଲକୁ ମୃତଦେହ ବ୍ୟବଚ୍ଛେଦ ପାଇଁ ପଠାଇଥିଲା। ମୃତଦେହ ବ୍ୟବଚ୍ଛେଦ ପରେ ସନ୍ଧ୍ୟାରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିବା ଥାନା ଅଧିକାରୀ ବିନୋଦିନୀ ବରିହା ସୂଚନା ଦେଇଛନ୍ତି।
