ଶେରଗଡ଼/ ହିଞ୍ଜିଳିକାଟୁ,୩ା୫(ଡି.ଏନ୍.ଏ):ଶିକ୍ଷାର ଭିତ୍ତିଭୂମି ସୁଦୃଢ଼ କରି ସରକାରୀ ସ୍କୁଲ ଛାତ୍ରୀଛାତ୍ରଙ୍କୁ ଆଧୁନିକ ଶୈଳୀରେ ପାଠ ପଢ଼ାଇବା ପାଇଁ ସରକାର ଗୁରୁତ୍ୱାରୋପ କରୁଛନ୍ତି। ଗତବର୍ଷ ରାଜ୍ୟରେ ପ୍ରଥମେ ଗଞ୍ଜାମ ଜିଲାର ଶେରଗଡ଼ ଓ ହିଞ୍ଜିଳିକାଟୁ ବ୍ଲକ ଅଧୀନ ବିଭିନ୍ନ ହାଇସ୍କୁଲ ରୂପାନ୍ତରଣ କରାଯାଇଥିଲା। ଏହି ରୂପାନ୍ତରିତ ହାଇସ୍କୁଲରେ ଉତ୍ତମ ଶିକ୍ଷା ଗ୍ରହଣ ଲାଗି ସମସ୍ତ ବ୍ୟବସ୍ଥା କରାଯାଇଛି। ତେବେ ଏଭଳି ଏକ ସ୍ମାର୍ଟ ସ୍କୁଲରେ ଲାଗିଥିବା ଏଲିଡ୍ ଟିଭିରେ କେତେଜଣ ଛାତ୍ର ଚର୍ଚ୍ଚିତ ଫିଲ୍ମ ‘ପୁଷ୍ପା’ ଦେଖି ତାହାର ଅନୁକରଣ କରିବା ସହ ଆଧୁନିକ ଓଡ଼ିଆ ଗୀତ ‘ଗୁଆଘିଅ’ ତାଳେ ତାଳେ ନାଚୁଥିବା ଭିଡିଓ ସୋସିଆଲ ମିଡ଼ିଆରେ ଭାଇରାଲ ହେଉଛି। ଏପରକି ସ୍ମାର୍ଟ ଶ୍ରେଣୀ ଗୃହରେ ଶିକ୍ଷକଙ୍କ ଚେୟାରରେ ଜଣେ ଛାତ୍ର ବସି ପୁଷ୍ପା ଦେଖୁଥିବା ଉକ୍ତ ଭିଡିଓରେ ରହିଛି। ଏହି ଭିଡିଓଟି ଶେରଗଡ଼ ବ୍ଲକ ବରମୁଣ୍ଡଳୀ ରୂପାନ୍ତରିତ ହାଇସ୍କୁଲର ବୋଲି ସ୍ପଷ୍ଟ ହୋଇଛି। ଏପରି ଭିଡିଓକୁ ବୁଦ୍ଧିଜୀବୀମାନେ ନାପସନ୍ଦ କରିଥିବା ବେଳେ ଶିକ୍ଷକଙ୍କ ଅନୁପସ୍ଥିତିରେ ଛାତ୍ରମାନେ ସ୍ମାର୍ଟ ଶ୍ରେଣୀଗୃହକୁ ଦୁରୂପଯୋଗ କରିିବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ନେଇ ଶେରଗଡ଼ ଗୋଷ୍ଠୀ ଶିକ୍ଷାଧିକାରୀ ଭାସ୍କର ଲେଙ୍କାଙ୍କୁ ପଚାରିବାରେ ସେ କହିଛନ୍ତି, କିଛିଦିନ ତଳେ ଦଶମ ଶ୍ରେଣୀ ପିଲାଙ୍କ ଲାଗି ବିଦାୟ ସମ୍ବର୍ଦ୍ଧନା କାର୍ଯ୍ୟକ୍ରମ ଆୟୋଜିତ ହୋଇଥିଲା। ଉକ୍ତ କାର୍ଯ୍ୟକ୍ରମ ପରେ ଶିକ୍ଷକଙ୍କ ଅନୁପସ୍ଥିତିରେ ୫ ଜଣ ଛାତ୍ର ଏପରି କରିଥିଲେ। ସେମାନଙ୍କୁ ଶିକ୍ଷକ ତାଗିଦ୍ କରିଥିଲେ ବୋଲି କହିଛନ୍ତି। ସେହିପରି ଜିଲା ଶିକ୍ଷା ଅଧିକାରୀ (ଡିଇଓ) ବିନୀତା ସେନାପତିଙ୍କ ସହ ଯୋଗାଯୋଗ କରିବାରେ, ଏହି ଘଟଣାର ତଦନ୍ତ କରାଯିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି।
