ବମ୍ବେ: ବିବାଦର ଅନ୍ୟନାମ କଙ୍ଗନା। ବଲିଉଡ୍ର ଏହି ଅଭିନେତ୍ରୀ କାହା ସହ ବି ପଙ୍ଗା ନେଇପାରନ୍ତି। ଏବେ ସେ ନିଜର ଟୁଇଟ୍କୁ ନେଇ ଚର୍ଚ୍ଚାରେ। ଦିନକୁ ଦିନ ତାଙ୍କୁ ନେଇ ନୂଆ ବିବାଦ ଦେଖାଦେଉଛି। ମାତ୍ର ଅଭିନେତ୍ରୀ ହିସାବରେ ସେ ବେଶ୍ ଲୋକପ୍ରିୟ। ନାରୀକୈନ୍ଦ୍ରିକ ଫିଲ୍ମରେ ତାଙ୍କର ଦବଦବା ଦେଖିବାକୁ ମିଳେ। ଆଜିର ଏହି ସଫଳ ନାୟିକା କେତେ ପାଠୋଇ କ’ଣ ଆପଣ ତାହା ଜାଣନ୍ତି। ହୁଏତ ନା।
ତେବେ ୧୯୮୬ ମସିହାରେ ହିମାଚଳ ପ୍ରଦେଶର ଭାମ୍ଭଲାର ଏକ ରାଜପୁତ ପରିବାରରେ କଙ୍ଗନାଙ୍କ ଜନ୍ମ। ତାଙ୍କ ବାପାଙ୍କ ନାମ ଅମରଦୀପ ରାଣାଓ୍ବତ ଏବଂ ମା’ଙ୍କ ନାମ ଆଶା। କଙ୍ଗନା ନିଜର ସ୍କୁଲ ପାଠପଢ଼ା ଚଣ୍ଡିଗଡ଼ରୁ କରିଛନ୍ତି। ଦ୍ୱାଦଶ ଶ୍ରେଣୀରେ ସେ ବିଜ୍ଞାନକୁ ପ୍ରମୁଖ ବିଷୟ ନେଇଥିଲେ। ପେସାରେ ସେ ଜଣେ ଡାକ୍ତର ହେବାକୁ ଚାହୁଁଥିଲେ। ହେଲେ ରସାୟନ ବିଜ୍ଞାନର ଏକ ପ୍ରାକ୍ଟିକାଲରେ ବିଫଳ ହେବା ଯୋଗୁ ସେ ଏଆଇପିଏମ୍ଟି ପରୀକ୍ଷା ଦେଇ ନ ଥିଲେ। ୧୬ ବର୍ଷ ବେଳେ ତାଙ୍କ ମା’ କଙ୍ଗନାଙ୍କ ବିବାହ କରିଦେବାକୁ ଚାହୁଁଥିଲେ। ହେଲେ ସେ ଦ୍ୱିଲ୍ଲୀ ଚାଲିଆସିଥିଲେ।
ରାଜଧାନୀରେ ସେ ମଡେଲିଂ ଏଜେନ୍ସିଂରେ ସାମିଲ ହୋଇ ମଡେଲ ଭାବେ କାମ ଆରମ୍ଭ କରିଥିଲେ। ପରେ ଥିଏଟର ନିର୍ଦ୍ଦେଶକ ଅରବିନ୍ଦ ଗୌଡ଼ଙ୍କଠାରୁ ଟ୍ରେନିଂ ନେଇଥିଲେ। ନାନାଦି ନାଟକରେ ଭାଗ ନେଇଥିଲେ ସେ। ଦର୍ଶକମାନଙ୍କଠାରୁ ପ୍ରେରଣା ପାଇବା ପରେ ସେ ବମ୍ବେ ଯିବାକୁ ନିଷ୍ପତ୍ତି ନେଇଥିଲେ। ଆଶା ଚନ୍ଦ୍ରାଙ୍କ ଡ୍ରାମା ସ୍କୁଲରେ ଚାରି ମାସ ପାଇଁ ଅଭିନୟ କୋର୍ସ କରିଥିଲେ ସେ।
ଇତିମଧ୍ୟରେ କଙ୍ଗନା ପାଞ୍ଚଥର ଫୋବ୍ସ ଇଣ୍ଡିଆର ଟପ୍-୧୦୦ ସେଲିବ୍ରିଟି ତାଲିକାରେ ନିଜ ସ୍ଥାନ ନିରୂପଣ କରିଛନ୍ତି। ଫିଲ୍ମ ଗ୍ୟାଙ୍ଗଷ୍ଟରରୁ ନିଜର କ୍ୟାରିୟର ଆରମ୍ଭ କରିଥିବା କଙ୍ଗନା ଏବେ ଆଗଧାଡ଼ିର ନାୟିକା ପାଲଟିଛନ୍ତି।
